Mateo 12:1-50
-
Jesús samana p’unchaypa Señornin kasqanmanta (1-8)
-
Makin ch’akisqa runa qhaliyachisqa kasqanmanta (9-14)
-
Diospa munasqa serviqninmanta (15-21)
-
Diospa atiyninwan supaykunata qarqokusqanmanta (22-30)
-
Mana perdonana juchamanta (31, 32)
-
Juj sach’aqa imayna rurusqanpi reqsisqa kasqanmanta (33-37)
-
Jonaspa señalninmanta (38-42)
-
Millay espíritu kutiqtin imachus pasananmanta (43-45)
-
Jesuspa mamanmanta wayqenkunamantawan (46-50)
12 Juj kutinmi Jesusqa samana p’unchaypi* chajra-chajranta purisharqan. Discipulonkunataq yarqachikuspanku trigota p’itispa* mijuyta qallarirqanku.+
2 Fariseokunataq chayta rikuspa nirqanku: “¡Qhawariy! Discipuloykikunan samana p’unchaypi mana ruwanata ruwashanku”,+ nispa.
3 Jesustaq nirqan: “¿Manachu leerqankichis imatachus David ruwarqan chayta? Runankunapiwan yarqasqa kashaspan+
4 payqa Diospa wasinman jaykurqan, jinaspa Diosman jaywasqa t’antata chaskikuspa chayta runankunapiwan mijurqan,+ chay t’antaqa manan paykunaq mijunanpaqchu karqan, aswanpas sacerdotekunallapaqmi karqan.+
5 ¿Manachu kamachikuy simipipas leerqankichis sacerdotekunaqa samana p’unchaypi templopi llank’ashaspapas mana juchayoq kasqankumanta?+
6 Chaymi niykichis: Templomantapas aswan allin kaqmi kaypi kashan.+
7 Diosmi nirqan: Khuyapayakuq kanaykichistan munani,+ manan sacrificiokuna jaywawanaykichistachu,+ nispa; chayta entiendewaqchis karqan chayqa, manachá juchachawaqchischu karqan mana juchayoqkunataqa.
8 Runaq Churinqa samana p’unchaypa Señorninmi”,+ nispa.
9 Chaymanta ripuspataq paykunaq sinagoganman jaykurqan,
10 chaypin kasharqan jujnin makin ch’akisqa runa,+ jinan Jesusta tapurqanku: “¿Allinchu kanman samana p’unchaypi pitapas qhaliyachiy?”,+ nispa. Chaytaqa nirqanku imallamantapas juchachayta munaspan.
11 Jesustaq paykunata nirqan: “¿Mayqenniykichistaq juj ovejaykichis samana p’unchaypi t’oqoman urmaykuqtin mana orqowaqchischu?+
12 ¿Manachu runaqa ovejamantapas astawan valen? Chhaynaqa, allinmi samana p’unchaypi allin kaqta ruwayqa”, nispa.
13 Chaymantataq chay runata nirqan: “Makiykita jaywarimuy”, nispa; paytaq makinta jaywarirqan, jinan makinqa juj kaq makin jina qhali kapurqan.
14 Fariseokunataq chaymanta lloqsispa Jesusta wañuchinankupaq rimanakurqanku.
15 Chayta yacharuspan Jesusqa chaymanta ripurqan, askha runakunataqmi qatikurqankupas,+ paytaq llapa onqosqakunata qhaliyachirqan.
16 Paykunatan allin-allinta kamachirqan ama pimanpas paymanta willanankupaq.+
17 Chhaynapin junt’akurqan profeta Isaiaspa willasqan, paymi nirqan:
18 “¡Qhawariychis, payqa kamachiymi,+ paytan munakuni! ¡Payqa ajllakusqaymi, payqa sonqoypaq jinan!+ Paymanmi espirituyta qosaq,+ paymi nacionkunaman yachachinqa imachus chanin kay chayta.
19 Manan piwanpas jap’inakunqachu,+ manan qaparkachanqachu, manataqmi pipas jatun ñankunapiqa paypa kunkanta uyarinqachu.
20 Manan q’ewisqa carrizotapas* p’akinqachu, manan wañunayashaq mechatapas wañuchinqachu+ chanin kayta allinta tajyachinankama.
21 Paypa sutinpin nacionkuna suyakunqa”,+ nispa.
22 Jesusmanmi pusamurqanku supaypa junt’aykusqan ñausa upa runata, paytaq chay runata qhaliyachirqan, jinan chay runaqa rimaripurqan qhawaripurqan ima.
23 Llapan runakunataq ancha admirasqa ninakurqanku: “¿Paychu icha Davidpa Churinqa kanpas?”, nispa.
24 Chayta uyarispan fariseokunaqa nirqanku: “Kayqa supaykunata kamachiq Belcebupa* atiyninwanmi supaykunata qarqon”,+ nispa.
25 Jesustaq paykunaq imachus piensasqankuta yachaspa nirqan: “Mayqen nacionpas t’aqanasqa kaspaqa tukukapunmanmi, mayqen llaqtapas mayqen familiapas t’aqanasqa kaspaqa chinkapunmanmi.
26 Chhaynaqa Satanaschus payllatataq qarqokunman chayqa, pay kikinmi t’aqanasqa kashanman, chhayna kaqtinqa, ¿imaynapitaq gobiernonri sayashallanman?
27 Noqachus Belcebupa atiyninwan supaykunata qarqoni chayqa, ¿piqpa atiyninwantaq qankunata qatikuq runakunari qarqonku? Chayraykun paykunaqa qankunata juzgasunkichis.
28 Ichaqa Diospa espiritunwanchus supaykunata qarqoni chayqa, Diospa gobiernonmi qonqaylla qankunaman chayaramun.+
29 Chaymantapas pipas juj kallpasapa runaq wasinta jaykuspa suwananpaqqa chay kallpasapa runataraqmi ñaupaqtaqa watanan ¿riki? Wataruspañan wasintaqa suwayta atinman.
30 Pipas mana noqawanchu kashan chayqa contraypin kashan, pipas mana noqawanchu juñuqqa ch’eqechishanmi.+
31 ”Chayraykun niykichis: Runaqa ima juchanmantapas pisichaspa k’amisqanmantapas perdonasqan kanqa; santo espirituta* k’amiqmi ichaqa mana perdonasqachu kanqa.+
32 Pipas runaq Churinpa contranpi rimaqqa perdonasqan kanqa,+ pipas santo espirituq contranpi rimaqmi ichaqa mana perdonasqachu kanqa, ni kay tiempopipas* ni jamuq tiempopipas.+
33 ”Allin sach’achus kankichis chayqa, allin rurutan rurunkichis; mana allin sach’achus kankichis chayqa, mana allin rurutan rurunkichis, sach’ataqa imayna rurusqanpin reqsikun.+
34 Mach’aqway miraykuna,+ ¿imaynapin allin kaqkunata rimawaqchis millay sonqoyoq kashaspaykichis? Simiqa riman+ imachus sonqopi junt’a kashan chaytan.
35 Allin runaqa sonqonpi allin kaqkuna kasqanraykun allin kaqkunata riman; millay runan ichaqa sonqonpi mana allin kaqkuna kasqanrayku millay kaqkunata riman.+
36 Noqan niykichis: Runakunaqa juicio p’unchaypin* cuentata qonqaku+ tukuy yanqa kaqkuna rimasqankumanta.
37 Imachus rimasqaykimantan chaninpaq qhawarisqa kanki, imachus rimasqaykimantan juchachasqapas kanki”, nispa.
38 Jinan kamachikuy simita yachachiqkuna fariseokunapiwan Jesusta nirqanku: “Yachachikuq, juj señaltan qanmanta rikuyta munayku”,+ nispa.
39 Jesustaq paykunata nirqan: “Yau Diosta mana kasukuq* millay runakuna,* ¿señaltachu rikuyta munashankichis? Manan ima señaltapas rikunkichischu, aswanpas profeta Jonasta imachus pasasqan milagrollan qankunapaqqa señal kanqa.+
40 Imaynan Jonasqa jatun challwaq wijsanpi kinsa p’unchay kinsa tuta karqan,+ chhaynallataqmi runaq Churinpas jallp’aq sonqonpi kinsa p’unchay kinsa tuta kanqa.+
41 Nínive llaqta runakunan kay tiempo runakunawan kuska juicio p’unchaypi jatarimunqaku, jinan kay tiempo runakunata juchachanqaku; paykunaqa Jonaspa willasqanwanmi juchankumanta kutirikurqanku.+ Qhawariychis, Jonasmantapas aswan jatun profetan kaypi kashan.+
42 Uray ladomanta kaq reinan kay tiempo runakunawan kuska juicio p’unchaypi jatarimunqa, jinan kay tiempo runakunata juchachanqa; payqa kay pachaq k’uchunmantaraqmi jamurqan Salomonpa yachaywan rimasqanta uyariq.+ Qhawariychis, Salomonmantapas aswan yachayniyoqmi kaypi kashan.+
43 ”Juj millay espíritu juj runamanta lloqsispaqa ch’aki ch’inneqkunapin purin mayllapipas samaykunanpaq maskhaspa, mana tarispataq+
44 nin: Lloqsimusqay wasiman aswanpas kutipusaq, nispa; wasiman chayaspataq tarin ch’inta, allin pichasqata, munay allichasqata.
45 Jinan payqa chaymanta rispa qanchis espiritukunatawan pusamun, paymanta aswan millaykunataraq, chay wasiman jaykuspankutaq chaypi tiyanku. Jinan chay runaqa ñaupaqpi imayna tarikusqanmantapas aswan mana allinpiraq tarikapun.+ Chhaynallataqmi kanqa kay tiempo millay runakunawanpas”, nispa.
46 Runakunata Jesús rimapayashaqtinmi mamanqa wayqenkunapiwan jamurqanku,+ jawapin paykunaqa kasharqanku paywan rimayta munaspa.+
47 Chaymi juj runa payman willarqan: “Mamaykin wayqeykikunapiwan jawapi sayashanku qanwan rimayta munaspa”, nispa.
48 Paytaq willaqnin runata nirqan: “¿Pitaq mamayri, pikunataq wayqeykunapasri?”, nispa.
49 Discipulonkunaman makinta jaywarispataq nirqan: “¡Paykunan kanku mamaypas wayqeykunapas!+
50 Pipas janaq pachapi kaq Taytaypa munayninta ruwaqmi wayqeypas, panaypas, mamaypas”,+ nispa.
Uraypi willakuykuna
^ P’itiytaqa “t’ipiy” nillankutaqmi.
^ Qhaway Explicasqa simikuna nisqapi “Samana p’unchay” nisqata.
^ Carrizotaqa “soqos, caña” nillankutaqmi.
^ Chaypiqa “Diospa atiyninta” nillanmantaqmi. Qhaway Explicasqa simikuna nisqapi “Santo espíritu” nisqata.
^ Qhaway Explicasqa simikuna nisqapi “Tiempo, pacha” nisqata.
^ Qhaway Explicasqa simikuna nisqapi “Juicio p’unchay” nisqata.
^ Griego rimaypiqa “Diosta wasanchaq” ninmi.
^ Chaypiqa “kay tiempo millay runakuna” nillanmantaqmi.
