1, 2. a) ¿Imayna regalon qanpaq chaniyoq kanman? b) ¿Ima raykun ima chaskisqaykimantapas kacharichiy aswan chaniyoq regalo?

¿MAYQENMI aswan sumaq regalo chaskisqayki? Manan askha qolqewan rantisqa regalollachu chaniyoqqa. Sichus kawsayniykipi yanapasunki, kusichisunkitaq chayqa, chay regalon chaniyoqqa.

² Llapa regalokuna chaskisqaykimantaqa hukllan aswan chaniyoq. Runakunaman Diospa regalo qosqanmi. Jehová Diospa imaymana qowasqanchismantaqa kacharichiymi aswan chaniyoqqa: chayqa Churin Jesucristoq sacrificakusqanmi (leey Mateo 20:28). Kay capitulopin yachasun kacharichiyqa aswan chaniyoq regalo kasqanta, chaymi cheqaq kusikuyta qowasun ima necesitasqanchistapas. Kacharichiywanmi Jehová Dios rikuchin khuyay munakuwasqanchista.

3. ¿Imataq kacharichiyri? ¿Imataraqmi yachananchis kacharichiy ancha chaniyoq kasqanta entiendenapaq?

³ Kacharichiyqa Jehová Diospa qosqanmi huchamanta wañuymantawan runakunata qespichinanpaq (Efesios 1:7). Chay yachachikuyta entiendenapaqqa Edén  huertapi sucedesqantaraqmi yachana. Adanpa ima chinkachisqanta allinta yachaspallan reparasun kacharichiy ancha chaniyoq kasqanta.

4. ¿Imaynatan Adán kawsaran ch’uya runa kashaspa?

⁴ Jehová Dios Adanta kamaspaqa ancha chaniyoq regalota qoran: ch’uya kawsayta. May allinchá paypaqqa karan. Ch’uya cuerpowan ch’uya yuyaywanqa manan hayk’aqpas onqonanchu, machuyananchu nitaq wañunanchu karan. Hinaspapas sumaqtan Jehová Dioswan kawsakuran. Biblia nin, Adanqa ‘Diospa kamasqan [churin] karan’, nispa (Lucas 3:38). Imayna huk munakuq tayta churinwan sumaqpi kawsan chay hinatan Adanpas Dioswan kawsaran. Arí, Kamaqqa rimanakuranmi churinwan, sumaq llank’anata qoran yachachirantaqmi ima ruwanantapas (Génesis 1:28-30; 2:16, 17).

5. ¿Imapin Adán ‘Diosman rikch’akuran’?

⁵ Jehová Diosqa payman “rikch’akuqtan” Adanta kamaran (Génesis 1:27). Ichaqa manan Dios hinachu karan. Huk capitulopi yachasqanchis hina Jehová Diosqa mana rikuna espiritun (Juan 4:24). Diosqa manan aychayoqchu nitaq tulluyoqchu. Adanqa Diosman rikch’akuran kay sumaq kayninkunapin: munakuq-kayninpi, yachayniyoq-kayninpi, chaninniyoq-kayninpi, atiyniyoq-kayninpi, huk sumaq kayninkunapiwan. Hinaspapas Taytan hinan payllamanta akllakuran ima ruwanantapas ima munasqantapas. Manan máquina hinachu karan kamachisqallata ruwananpaq. Aswanmi payllamanta akllaran allin kaqta mana allin kaqtapas. Dios kasukuyta akllakuspaqa wiñaypaqmi Paraisopi tiyanman karan.

6. ¿Imatan Adán chinkachiran Diosta mana kasukusqanwan, imataq sucederan llapa mirayninwan?

⁶ Mana kasukusqanmantan Adán wañunanpaq huchachasqa karan. Huchallikusqanwanmi chinkachiran ch’uya  kawsayta sumaq saminchayninkunatawan (Génesis 3:17-19). Adanqa manan payllapaqchu chinkachiran chay ch’uya kawsayta aswanpas mirayninpaqwanmi. Diospa Simin Qelqa nin: “Imaynan huk runallawan [Adanwan] huchaqa kay pachapi qallarirqan, huchawantaq wañuypas rikhurirqan, chay hinallataqmi, wañuyqa llapa runaman chayarqan llapallan huchallikusqankurayku”, nispa (Romanos 5:12). Arí, Adanpa miraynin kasqanchis rayku llapallanchis huchayoq kanchis. Bibliaq yachachisqan hina, Adanqa paytawan kuskan llapanchista ‘vendewaranchis’ chay rayku huchaq kamachin, wañuypa kamachinpas kapunchis (Romanos 7:14). Adanwan Evawanqa paykunallamantan Diosta mana kasukurankuchu, chay rayku paykunapaqqa mana ima suyakuypas karanñachu. Ichaqa, ¿iman sucedenan karan llapa mirayninwan?

7, 8. ¿Ima iskay ruwaywanmi tupan kacharichiy?

⁷ Kacharichiywanmi Jehová Diosqa runakunata qespichinqa. ¿Imawanmi tupan kacharichiy? Iskay ruwaykunawanmi tupan. Hukkaq: imatapas prendapi hap’ichisqata kutichipuwananchispaq pagaymi otaq secuestrasqa runata kacharinankupaq hayk’an mañakusqankuta pagay. Iskaykaq: Bibliapi kacharichiy simiqa tupan valesqanman hina imamantapas chanillanta pagaywanmi. Ejemplopaq, sichus pipas ima dañotaña ruwanman karan chayqa dañoq ruwasqanman hina chanillanta pagapunan karan.

⁸ Rikusqanchis hina Adanpa huchallikusqanmantan llapanchispaq sumaq kawsay chinkaran. ¿Imawanmi pagakunman Adanpa chinkachisqanta, huchamanta wañuymantapas qespichisqa kananchispaq? Kunanqa yachasun kacharichisqa kanapaq Jehová Diospa qosqanmanta, imakunapi allinniykipaq kasqantawan.

9. ¿Iman necesitakuran kacharichisqa kanapaq?

⁹ Ch’uya kawsaymi chinkaran. Huchayoq runaq kawsayninqa manan aypanmanchu chay ch’uya kawsaymanta paganapaq (Salmo 49:7, 8). Valesqanman hinan pagakunan karan. Chhaynatan Diospa Simin Qelqapi chanin kamachikuynin niran. Chay kamachikuy nisqanman hinan “kawsaymanta kawsayta” qokunan karan (Deuteronomio 19:21). Chhayna kaqtinqa, ¿imawanmi pagakunan karan Adanpa ch’uya kawsay chinkachisqanta? ‘Kacharichisqa kanapaqqa’ huk ch’uya kawsaymi necesitakuran (1 Timoteo 2:6).

10. ¿Imatan Jehová Dios ruwaran kacharichisqa kanapaq?

¹⁰ ¿Imatan Jehová Dios ruwaran kacharichisqa kanapaq? Angelninkunamanta huknin churintan kay Hallp’aman kachamuran. Ancha munakusqan sapan Churintan kachamuran (leey 1 Juan 4:9, 10). Chay Churiqa kasukuspan kusisqa kay pachaman hamuran (Filipenses 2:7). Tawa capitulopi yachasqanchis hina, Jehová Diosmi milagrota ruwaspa Mariaq wiksanman Churinpa kawsayninta astamuran. Diospa santo espirituq p’istuykusqanwanmi mana huchayoq ch’uya runa naceran (Lucas 1:35).

11. ¿Imaynapin huk runalla millonninpi runakunata kacharichiran?

¹¹ ¿Imaynapin huk runalla millonninpi runakunata kacharichinman? ¿Imaynapin llapa runakuna huchayoq kapuranku? Huchallikusqanwanmi Adanqa ch’uya kawsayta paypaq mirayninpaqpas chinkachiran. Huchatawan wañuyllatawanñan mirayninman saqeran. Biblian Jesusta sutichan ‘qhepakaq Adán’ nispa, payllan ch’uya kawsayniyoq karan, manataqmi hayk’aqpas huchallikuranchu (1 Corintios 15:45). Chaymi Jesús Adanpa rantinta qespichiwanchis. Lliwpin Taytanta kasukuran ñoqanchis  raykun ch’uya kawsaynintapas qoran. Chhaynapin Adanpa huchallikusqanmanta pagaran mirayninmantaq suyakuyta qowaranchis (Romanos 5:19; 1 Corintios 15:21, 22).

12. ¿Imatan Jesús rikuchiran sinchi ñak’arisqanwan?

¹² Biblian willan Jesús wañunan p’unchaypi sinchi ñak’arisqanta. Mana khuyapayaspan soq’aranku, clavokunawan takaspan kurkupi warkuranku, mayta ñak’arichispataq wañuchiranku (Juan 19:1, 16-18, 30; apéndice nisqata qhaway, ¿Cristianokuna hap’inankuchu cruzta? nisqa temata). ¿Ima rayku chhaynaniraqta ñak’ariran? Satanasmi runakunamanta niran, wateqasqa kaspaqa manan hukllapas Jehová Diosman hunt’aq kanmanchu nispa, chaytaqa ñawpaqmanñan astawan yachasun. Chhaynaniraqta ñak’arishaspapas Diosmanmi hunt’aq karan, chaywanmi Jesusqa Saqraq k’amisqanman allinta kutichiran. Chaywanmi rikuchiran ch’uya runaqa allin kaqta mana allin kaqta payllamanta akllanan kashaqtinpas atinmanmi tukuy sonqowan Diospaq hunt’aq kayta, Saqraña sasachakuykunapi churashaqtinpas. ¡Anchatachá Diosqa kusikuran munakusqan Churi hunt’aq sonqo kasqanmanta! (Proverbios 27:11.)

13. ¿Imaynatan pagakuran kacharichisqa kanapaq?

¹³ ¿Imaynatan pagakuran kacharichisqa kanapaq? 33 watapi Jesuspa hamusqan qhepata, nisán killapi, 14 p’unchaypin Dios hinallata qhawasqa mana huchayoq ch’uya Churin wañuchisqa kananta. Chhaynapin Jesusqa “ch’ulla kutillata wiñaypaq” ch’uya kawsayninta sacrificiopi haywaran (Hebreos 10:10). Wañusqanmanta kinsa p’unchaymanmi Jehová Dios kawsarichiran espíritu cuerpopi. Hanaq pachaman kutipuspan Jesusqa Taytanman haywaran chaniyoq ch’uya kawsayninta Adanpa mirayninta kacharichinanpaq (Hebreos 9:24). Jehová Diosqa chaskiranmi Jesuspa sacrificakusqanta, chay  sacrificiowantaq huchamanta wañuymantawan llapa runakunata kacharichin (leey Romanos 3:23, 24).

14, 15. ¿Imatan ruwananchis ‘huchanchiskuna panpachasqa’ kananpaq?

¹⁴ Huchayoq kashaspapas kacharichiywanmi sumaq saminchaykunata chaskisunman. Kunanqa yachasun imakunapin Diospa ancha sumaq regalon allinninchispaq kanman kunanpaq hamuq tiempopaqpas.

¹⁵ Huchakunata panpachan. Ñoqanchispaqqa sasan allinkaqta ruway huchayoq kasqanchis rayku. Rimaypipas ruwaypipas llapallanchismi huchallikunchis. Ichaqa, Jesuspa sacrificakusqanwanmi ‘huchanchiskuna panpachasqa’ kanman (Colosenses 1:13, 14). Panpachasqa kanapaqqa huchanchiskunatan saqepunanchis. Jehová Diosmantapas huch’uyaykukuspan panpachayninta mañakunanchis Churinpa sacrificakusqanpi iñisqanchis rayku (leey 1 Juan 1:8, 9).

16. ¿Ima rayku ch’uya concienciawan Diosta yupaychasunman? ¿Imapin ch’uya concienciayoq kay yanapawanchis?

¹⁶ Diospa ñawpaqenpi ch’uya concienciayoq kanchis. Qhelli concienciawanqa manan ima suyakuypas kanmanchu, mana imapaq valeq hinataqmi sientekunchis. Ichaqa kacharichiy raykun Jehová Dios panpachawanchis, sumaq kayninpitaq ch’uya concienciawan yupaychasqanchista chaskin, urmasqa runakunaña kanchis chaypas (Hebreos 9:13, 14). Chay rayku mañakuyninchispi mana manchakuspa paywan rimanchis (Hebreos 4:14-16). Hinaspapas ch’uya concienciayoq kaspaqa thakpin kawsasun aswan kusisqataq kasunpas.

17. Jesús ñoqanchis rayku wañusqanmanta, ¿ima saminchaykunatan chaskisun?

¹⁷ Paraisopi wiñay kawsanapaq suyakuyta qowanchis.  “Huchaq pagayninqa wañuymi” nispan nin Romanos 6:23 texto. Nillantaq: “Diospa qokuyninmi ichaqa Señorninchis Jesucristopi wiñay kawsay”, nispa. Kinsa capitulopin yacharanchis Paraisopi sumaq saminchaykuna kananta (Apocalipsis 21:3, 4). Jesús ñoqanchis rayku wañusqanwanmi chay sumaq saminchaykunata chaskisun, wiñaypaq qhalilla kawsaytapas. Chay saminchaykunata chaskinapaqqa kacharichiymantan agradecido kasqanchista rikuchinanchis.

18. ¿Ima rayku Jehová Diosta agradecekunanchis kacharichiy qosqanmanta?

¹⁸ ¿Ima rayku Jehová Diosta tukuy sonqowan agradecekunanchis kacharichiy qosqanmanta? Sichus pipas tiemponta, kallpanta otaq qolqentapas sacrificaran regalota qowananchispaq chayqa, chay regalon aswan chaniyoqqa. Chaywanmi rikuchin ancha munakuwasqanchista chaytaq sonqonchista kusirichin. Kacharichiyta qospan Diospas ancha hatun sacrificiota ruwaran, chay rayku kacharichiyqa imamantapas aswan chaniyoq regalo.  Juan 3:16 texton nin: “Diosqa anchatapunin runakunata munakurqan, chaymi sapan Churinta kachamurqan”, nispa. Kacharichiy qosqanwanmi Jehová Dios rikuchiwanchis ancha munakuwasqanchista. Jesuspas ñoqanchis rayku kawsayninta qospan rikuchiran ancha munakuwasqanchista (leey Juan 15:13). Arí, kacharichiymi reparachiwananchis Jehová Dioswan Churinwan sapankata munakuwasqanchista (Gálatas 2:20).

19, 20. ¿Imakunapin rikuchiwaq kacharichiymanta agradecido kasqaykita?

¹⁹ ¿Imaynatan rikuchiwaq kacharichiymanta agradecido kasqaykita? Ñawpaqtaqa kacharichiy qoq Jehová Diostan allinta reqsinayki (Juan 17:3). Chaytaqa ruwawaq kay libroq yanapayninwan Bibliata estudiaspa. Jehová Diosta astawan reqsinki chayqa astawanmi munakunki. Astawan munakuspataq astawan kusichiyta munanki (1 Juan 5:3).

²⁰ Kacharichiypi iñiy. Jesusmanta kayta nikuran: “Churipi iñiqqa wiñay kawsayniyoqmi” kanqa, nispa (Juan 3:36). ¿Imaynatan rikuchisunman Jesuspi iñisqanchista? Manan simillanchiswanchu. Santiago 2:26 texton nin: “Allinkunata mana ruwaqtinchisqa iñiyninchispas wañusqa kashan”, nispa. Arí, ruwaywanmi cheqaq iñiytaqa rikuchikun. Jesuspi iñisqanchista rikuchinapaqqa kallpachakunan pay hina rimasqanchispi ruwasqanchispipas kananchispaq (Juan 13:15).

21, 22. a) ¿Ima rayku sapa wata Señorpa Cenanman rinanchis? b) ¿Imamantan yachasun 6, 7 capitulokunapi?

²¹ Sapa wata Señorpa Cenanman riy. 33 watapi, 14 nisán tutapin, Jesús qallarichiran huk yuyarina p’unchayta, chaytan Biblia sutichan ‘Señorpa Cenan’, nispa (1 Corintios 11:20; Mateo 26:26-28). Chaytan reqsikullantaq Jesuspa wañusqan Yuyarina P’unchay, nispa.  Jesusmi chayta qallarichiran apostolninkunapas llapa cheqaq cristianokunapas kayta yuyarinankupaq: wañuyninwanmi ch’uya kawsayninta qoran kacharichisqa kananchispaq. Kikin Jesusmi kamachiran: “Kaytan ruwankichis yuyariwanaykichispaq”, nispa (Lucas 22:19). Kacharichiywanmi Jehová Diospas Jesucristopas rikuchinku ancha munakuwasqanchista, chaytan yuyarichiwanchis Jesuspa wañusqan Yuyarina P’unchay. Kacharichiymanta agradecido kasqanchis rayku Señorpa Cenanman rinchis. *

²² Arí, kacharichiyqa Jehová Diospa ancha chaniyoq regalonmi (2 Corintios 9:14, 15). Kacharichiyqa wañupuqkunatapas yanapanmanmi, chaymantan 6, 7 capitulokunapi yachasun.