Jehová a Diosmi qallariypi Adanta Evatawan casarachirqan kusisqa kawsanankupaq. Adanman warmita apamuqtinmi, payqa ancha kusisqa nirqan: “¡Kaymá! Tulluy tulluyoqqa, aychay aychayoqqa”, nispa (Génesis 2:22, 23). Kunanpas Diosqa munashallanmi casarasqakuna kusisqa kawsanankuta.

Wakinqa yaqapaschá yuyaykunku casarakuspaqa kusisqalla kawsanankuta. Ichaqa maytaña casarasqakuna munanakunqaku chaypas, kanqapunin sasachakuykunaqa (1 Corintios 7:28). Chaymi kay folletopi casarasqakunapaq familiakunapaqpas ancha allin yanapaykuna kashan. Sichus chay yanapaykunaman hina kawsankichis chayqa, kusisqan kankichis (Salmo 19:8-11).

BIBLIAN NIN: ‘Qosaqa familianpa umanmi’, nispa (Efesios 5:23).

Qosakuna, Diosmi qankunata kamachisunkichis esposaykichista munakuywan cuidanaykichispaq (1 Pedro 3:7). Diosmi esposata qorqasunkichis yanapanasuykichispaq, chaymi munakuywan respetowan ima rikunaykichis (Génesis 2:18). Hinaspapas esposaykichispa allinnintan ñawpaqta maskhanaykichis, chaypin paykuna yachanqaku munakusqaykichista (Efesios 5:25-29).

Esposakuna, Diosmi qankunatapas kamachisunkichis qosaykichista respetanaykichispaq, yanapanaykichispaq ima (1 Corintios 11:3; Efesios 5:33). Chayrayku tukuy sonqowan yanapaychis ima decidisqanpipas ima ruwasqanpipas (Colosenses 3:18). Sichus chayta ruwankichis chayqa, sumaqtan qosaykichispas Jehová Diospas qhawarisunkichis (1 Pedro 3:1-6).

¿IMATAN RUWAWAQ?

• Esposaykita, qosaykita tapuriy: “¿Imakunapin pantashaniraq? ¿Imatan ruwayman aswan allin qosa, esposa kanaypaq?”, nispa. Nisqasuykiman hinataq kallpachakuy cambianaykipaq.

• Pacienciayoq kay, payta kusichinaykipaq hinataq imatapas ruway.

BIBLIAN NIN: ‘Hukkunaq allinninta ñawpaqta maskhay’, nispa (Filipenses 2:3, 4). Jehová Diosmi cristianokunata kamachin llapa runatapas sumaqta qhawarinankupaq, chaymi esposaykitapas, qosaykitapas sumaqta qhawarinayki (2 Timoteo 2:24). Imata ninaykipaqpas allinta yuyaykuspan rimanayki, Biblian nin: “Hawan-ukhunta rimaqqa espadawan hinan k’irin, yachayniyoqkunaq rimasqanmi ichaqa hampi”, nispa (Proverbios 12:18). Diospa yanapayninta mañakuy munakuywan, sumaq simiwan rimanaykipaq (Gálatas 5:22, 23; Colosenses 4:6).

¿IMATAN RUWAWAQ?

• Imamantapas esposaykiwan, qosaykiwan rimanaykipaqqa, ñawpaqta Diosmanta mañakuy ama phiñakuspalla, ama yuyaykusqaykiman hinalla rimanaykipaqpas.

• Allinta yuyaykuy ima rimanaykita imayna rimanaykitapas.

BIBLIAN NIN: ‘Casarasqakunaqa huk cuerpollan kapunku’, nispa (Mateo 19:5). Huk cuerpolla kapunkichis chaypas, manan kaqllatachu imatapas munankichis nitaq yuyaykunkichis. Chaymi kallpachakunaykichis kanqa huk hinalla imatapas decidinaykichispaq (Filipenses 2:2). Biblian nin: “Imatapas ruwanaykipaqqa yuyaychachikuyraq”, nispa (Proverbios 20:18). Ichaqa imatapas allinta decidinaykichispaqqa Bibliaq nisqanman hinan decidinaykichis (Proverbios 8:32, 33).

¿IMATAN RUWAWAQ?

• Sonqoykipi imayna sientekusqaykita willay.

• Manaraq imamanpas comprometekushaspa ñawpaqta esposaykiwan, qosaykiwan rimay.