Diosmanqa willasunmanmi imachus llakichiwasqanchista piensasqanchistapas. Profeta Davidmi Diosta niran: “Qanqa mañakusqatan uyarinki, llapa runan jamusunkiku”, nispa (Salmos 65:2). Ichaqa, ¿imaynatan Diosmanta mañakunanchis uyariwananchispaq yanapawananchispaqpas?

Salmos 62:8 nin: “Sonqoykichista payman mast’ariychis”, nispa. Diosmanqa willasunmanmi mana pimanpas willasqanchista, sonqonchispi imachus kasqanta. Tukuy atiyniyoq Diosninchisqa anchatan kusikun sonqomanta mañakuqtinchis.

Señor, Dios nispaña ninchis chaypas Diosqa sutiyoqmi, paypa sutinqa Jehová. Bibliapin nin: “Noqallan [Jehová] * Diosqa kani”, nispa (Isaías 42:8). Diospa sutinqa qanchis waranqa kutita jinan Bibliapi rijurin. Askha profetakunan sutinmanta Diosta wajakuranku. Jujninmi profeta Abrahán karan, paymi niran: “Kunanqa, [Jehová] Diosníy, ama phiñarukuychu yapa-yapa tapupayaqtiy”, nispa (Génesis 18:30). Noqanchispas Diosmanta mañakuspaqa sutinmantan wajakunanchis.

Ima simipiña Diosman rimapayasunman chaypas, payqa entiendenmi imachus llakichiwasqanchista piensasqanchistapas. Bibliapin niwanchis: “Kunanraqmi allinta entiendeni Diosqa lliutapas igual-llata rikusqanta, payta manchakuspa allin kaqta ruwaq runakunataqa may nacionmantaña kanku chaypas sumaqta chaskisqantawan”, nispa (Hechos 10:34, 35).

Diosninchis yanapawananchispaqqa manan mañakunallanchischu. Qatimuqpi yachasun imatachus ruwananchis kasqanta.