¿IMAN YANAPANMAN WAÑUQNIYOQKUNATA?

Wañupuqninkumanta llakikuqkunapaq allin yanapay

QALLARIY

KAY ÚLTIMO WATAKUNAPIN ASKHA ESTUDIAQ RUNAKUNA WAÑUPUQNINKU RUNAMANTA LLAKIKUQKUNATA YANAPANANKUPAQ IMAYMANATA INVESTIGARQANKU. Chay estudiaq runakunaq nisqanqa tupashanmi Bibliapi nisqanwan. Chaywanmi yachanchis Bibliapi kaq yuyaychaykunaqa kay tiempopaqpas allinpuni kasqanta. Chaymantapas Bibliapi kaq yachachikuykunaqa allintan yanapawasunman wañupuqninchis runamanta ama nishuta llakikunanchispaq, chay jina yanapaytaqa manan maypipas tarisunmanchu.

Willawanchismi wañupuqninchis runakuna mana ñak’arishasqankuta.

Eclesiastés 9:5 textopin willashan wañupuqkunaqa mana “imatapas yachasqankuta”. Manañataqmi imapipas yuyaykunkuñachu (Salmos 146:4). Wañupuq runaqa misk’i puñuypi jinan kashan (Juan 11:11).
Yanapawanchismi munakuwaqninchis Diospi iñinanchispaq.

Bibliapin nishan: “Jehová * Diospa ñawinqa allin kausaq runakunatan qhawashan, paykunaq rogakusqankutan ninrinpas uyarishan”, nispa (1 Pedro 3:12). Jehová Diosmanta mañakuspaqa manan llakikuyninchiskunallatachu willakushanchis, chaymantapas Diosmanta mañakusqanchismi yanapawanchis paywan sumaqta kausananchispaq. Jinan payqa atiyninwan yanapawasun ama nishuta llakikunanchispaq.
Willawanchismi jamuq tiempopi sumaq kausay kananta.

Bibliapiqa askha partepin nishan wañupuqkuna kausarimpunankuta. Jamuq tiempopiqa kay pachapin sumaq kausay kanqa, chaymi Apocalipsis 21:3, 4 textopin nishan: “Diosmi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu”, nispa. Chhaynapi kausayqa may munaypunichá kanqa.

Wañupuqninku runakunawan jamuq tiempopi jujmanta tupanankupi piensaymi askha runakunata yanapan ama nishuta llakikunankupaq. Ann warmimanta yachasun, paypa qosanmi wañupurqan 65 watakunaña casarasqa kasqanku qhepaman. Paymi nin: “Bibliapin sut’ita nishan wañupuqninchis runakuna mana ñak’arishasqankuta, chaymantapas willashanmi Diospa yuyayninpi kaqkunaqa kausarimpunankuta. Chayta yachaymi yanapawan wañupuqniy qosayta yuyarispa ama nishuta llakikunaypaq”, nispa.

Ñaupaqpi rimamusqanchis Tinapas ninmi: “Qosay Timo wañupusqan p’unchaymantapachan repararqani Jehová Dios yanapawasqanta. Sinchi llakisqa kashaqtiymi Jehová Diosqa sumaqta yanapawarqan. Chaymantapas tukuy sonqoywanmi iñini kausarimpuy kananpi, chaymi kallpata qowan ama pisipanaypaq”, nispa.

Millonninpi runakunan paykuna jina Bibliaq nisqanpi confianku. Yaqapaschá ninki: “Bibliaq nisqanqa mosqoy jinamá”, nispa. ¿Imaynapin yachawaq Bibliaq nisqanpas chaypi kaq promesakunapas confianapaq jina kasqanta? Chayta yachanaykipaqmi tiempoykita orqowaq. Chhaynapin reparanki Bibliaq nisqanqa wañupuqninku runamanta llakikuqkunata allinta yanapasqanta.