“Qolqe sonqo-kaymi tukuy mana allinkunaq saphinqa” (1 Timoteo 6:10)

¿IMA NINKUN RUNAKUNA?

Qolqen tukuy mana allinkunata paqarichin.

¿IMA NINMI BIBLIA?

Manan qolqechu mana allinkunataqa rikhurichin, aswanpas “qolqe sonqo kaymi”. Biblian riman sinchi qhapaq Salomón reymanta, paymi rimarqan qolqe sonqokuna kinsa sasachakuykunapi tarikusqankumanta: Imaymanamantan llakikunku, Eclesiastés 5:12 texton nin: ‘Qhapaqtaqa [...] askha kaqninkunan mana puñuchinchu’, nispa. Astawanmi munanku, Eclesiastés 5:10 texton nin: “Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan”, nispa. Leykunata mana kasukunankupaqmi tentasqa kanku, Proverbios 28:20 texton nin: “Usqhayllaman qhapaqyaqmi ichaqa huchachasqapuni kanqa”, nispa.

“Qolqeyoq kaypas runatan waqaychan” (Eclesiastés 7:12)

¿IMA NINKUN RUNAKUNA?

Qolqeyoq kaspaqa thakmi kusisqa kawsanki.

¿IMA NINMI BIBLIA?

Qolqeqa q’otukuqmi (Marcos 4:19). Runakunaqa qolqewanmi sonqonkuta suwachikunku, paykunaqa piensankun qolqeyoq kaspaqa kusisqa thakpi kawsanankupaq, ichaqa chayqa yanqapunin. Chaywanpas qolqeqa imaymana sasachakuykunapin yanapawasunman (Eclesiastés 10:19). Qolqewanmi rantiyta atisunman mikhunata hampikunatapas (2 Tesalonicenses 3:12).

Familiata uywanapaqpas yanapawanchismi. Biblian nin: “Pipas ayllunta mana yuyarinchu, aswantaqa familianta mana uywanchu chayqa, cheqaq iñiymantan t’aqakapun, mana iñiyniyoq runamantapas aswan millayraqmi kapun”, nispa (1 Timoteo 5:8).

“Gastananpaqmi ñawpaqtaraq qolqenta yupan” (Lucas 14:28)

¿IMA NINMI BIBLIA?

Qolqetaqa Diosta kusichinapaq hinan utilizananchis (Lucas 16:9). Chaymantapas qolqetaqa allintan utilizananchis manan engañanapaqchu (Hebreos 13:18). Kapuqnillanchiswan kawsaspaqa manan sasachakuykunapi tarikusunchu, chayraykun Biblia kayta niwanchis: “Ama qolqe sonqo kaychischu”, nispa (Hebreos 13:5).

Bibliaqa manan ninchu qolqemanta manupi kay hucha kasqanta, ichaqa willanmi manukuqqa manuqninpa kamachin kasqanta (Proverbios 22:7). Usqhaylla imapipas qolqeta gastayqa manan allinchu, Biblian nin: ‘Usqhayllata qhapaqyayta munaqqa wakchayapunmi’, nispa (Proverbios 21:5). Ichaqa importante ruwaykunapaq qolqenchista huñuyqa allinpunin, chaytaqa atisqanchisman hinan ruwasunman (1 Corintios 16:2).

Biblian yuyaychawanchis qoykukuq kananchispaq (Lucas 6:38). Diosta kusichiyta munaqqa qoykukuqmi kanan, “Diosqa kusisqa qoqtan munakun” (2 Corintios 9:7). Chayrayku ‘ama allinkaq ruwaytapas yanapakuytapas qonqaychischu, chay hina sacrificiokunawanmi Diosqa kusikun’ (Hebreos 13:16).