Mayninpiqa amigonkuwan parlashaqtinkun celularninkuman huk mensaje chayamun. Chhaynapi tarikuspa, ¿imatan ruwawaq?

1. Amigoykiwan rimashasqayki ratopichu mensajeta leewaq.

2. “Mensajeytaraq leerusaq” nispachu niwaq amigoykita.

3. Amigoykiwanchu rimashallawaq mensajeta mana leespa.

Parlashaqtiyki huk mensaje chayamusuqtiykiqa chaykunataraqmi qhawarinayki. ¿Imarayku?

Amigoykiwan rimashaspa mensajeta celularniykipi qelqay otaq leeyqa kanman, hukkunata mana respetaspa pukllay hinan. Ichaqa ninkipaschá: “Iskayninkupas amigoymi”, nispa. Arí, amigoykikuna kasqanraykun iskayninkutapas allinta tratanayki, kaypiqa manan imatachus ruwanaykitachu nishaykiku. Ichaqa sichus amigoykikunata mana respetowan tratanki chayqa tiempowanmi paykunaqa qanmanta karunchakapunqaku.

¿Imaraykun karunchakunkuman? Manan pipas munanmanchu mana allin tratanankutaqa, chayraykun amigoykikunaqa karunchakunkuman. Berta * sipasmi nin: “Mayninpiqa rimashaqtiykun amigaykunaqa sapa rato celularninkuta qhawashanku, chaypas aswan importante kanman hinatan ruwanku, chayqa phiñachiwanmi”, nispa. ¿Munawaqchu chhayna amigokunayoq kayta?

“¿Imapin wakin tarikunku?” nisqata hukmanta qhaway, mayqenta ruwaymi aswan allin kanman. Rimashasqayki ratopi mensajeta leeyqa mana respetoyoq kaymi kanman, qanpas chaytachá ninki. Ichaqa mayqenmi aswan allin kanman: ¿“Mensajeytaraq leerusaq” nispa amigoykita niychu; icha mensajeta mana leespa amigoykiwan rimashallaychu?

Chayta yachayqa manan facilchu. Ichaqa Bibliapi yachachikuymi yanapasunkiman, ninmi: “Imaynatachus qankunapaq runakunaq ruwananta munankichis, chay hinallatataq qankunapas paykunapaq ruwaychis”, nispa (Lucas 6:31). ¿Imaynatan chayta rikuchiwaq rimasqaykichis ratopi mensajeta apachispa otaq leespa?

Mana allinpaq hina qhawarisqayki ratopiqa ama mensajeta apachiychu nitaq leeypaschu. Richard nin: “Mayninpiqa tuta horaskunapin mana importante mensajekunata apachimuwanku”, nispa. Chayrayku tapukuy: “¿Hukkuna samasqanku ratopichu mensajekuna apachiyta yachani?”, nispa (Bibliaq yachachikuynin: Eclesiastés 3:1).

Imayna qelqasqaykita allinta qhawariy. Rimaqtinchisqa kunkanchispi uyanchispi iman reparakun imatachus niy munasqanchis, mensajeta apachiqtinchismi ichaqa mana. Chhaynaqa, ¿imaynatan qelqawaq? Jasmin nin: “Sumaq sonqo kasqayki reparakuchun, tapuy imayna tarikusqanmanta, churaytaq ‘ama hina kaspa’ ‘gracias’ nisqa simikunata”, nispa (Bibliaq yachachikuynin: Colosenses 4:6).

Mayqenmi aswan importante. “¿Imapin wakin tarikunku?” nisqaman kutisun. Sichus huk importante mensajeta suyashanki chayqa yaqapaschá rimasqaykichis ratopi leewaq. Ichaqa wakintaqa qhepamanñan leewaq. 17 watayoq Ana nin: “Amigoykiwan rimayta tukuqtiykiqa celularniykiqa manan chinkanqachu; ichaqa sichus mensajeykitaraq leenki chayqa, leeyta tukuqtiykiqa manañapaschá amigoykiqa chaypiñachu kapunqa”, nispa. 18 watayoq Juana nin: “Yachanaykin imay ratopi mensaje qelqayta. Rimashasqaykichis ratopi mensajeta leeypas otaq apachiypas kayta niy hinan kanman: ‘Manan gustawanchu qanwan kay, imallapas karunman ladoykimanta ripunaypaq’ nispa”, nispa.

Manaraq mensajeta apachishaspa allinta piensay. Qelqaspaqa kaykunata tapukuy: “¿Imaynatan entiendenqa mensaje apachisqayta? ¿Dibujokunayoq mensajeta apachiqtiy imatan entiendenqa? 21 watayoq Antonia nin: “Ima bromatapas nispaqa, huk kusisqa uyachata churay. Wakinqa cheqaqpaqmi qhawarinku ima bromatapas, chaymi phiñakunku otaq maqanakunku imaraq”, nispa (Bibliaq yachachikuynin: Proverbios 12:18).

Mensajeta apachispa respetoyoq kayqa ancha importanten.

Kaypi yuyaykuy: Munakuq kaspaqa respetoyoqmi kanki. ¿Imaynatan rikuchiwaq munakuq kasqaykita? Biblian nin: “Pipas munakuqqa muchukuqllan [pacienciakuqmi], sumaq sonqollan, munakuqqa manan envidiakunchu, manan k’ankaykachanchu, manan hatunchakunchu, manan mana ruwanakunatachu ruwan, manan payllapaq kanantachu munan, manan phiñakunpachachu, manan sientepakunchu”, nispa (1 Corintios 13:4, 5). Chaypi nisqanman hina, ¿imallapipas allinyanaykichu kashan?