Japón nacionpin huk terremoto karqan, 2011 watapi 11 marzo killapi. Runakunaqa 15.000 más hinaraqmi wañurqanku, gastokunataqmi karqan 200.000 millones dolarkuna masraq. Lamar-qochaq lloqsimunantaqa willakurqanmi, chayta uyarispan 32 watanpi kashaq Kie sutiyoq runaqa aswan alto kaq cheqasman ayqekurqan. Paymi nin: “Qhepan p’unchaymi wasiyman kutirqani kaqniykunata apanaypaq, ichaqa manan imatapas tarirqanichu, wasiypa cimientollanñan kashasqa.

“Ñoqaqa cuentatan qokurqani tukuy kaqniykunata llapanta chinkachisqayta. Karqanmi carroy, llank’anaypaq computadoraykuna, mesaykunapas sillaykunapas; karqanmi sillonniykunapas, chaypin amigoykuna tiyaq; kallarqantaqmi guitarraypas, flautaypas huk tocanaykunapas; dibujanaypaqpas karqanmi tukuy herramientaykuna”, nispa.

Piensay imaykikunachus kashasqanpiraq, amataq imakunatachus chinkachisqaykipichu. Biblian nin: “Runaq kawsayninqa manan askha kaqniyoq kaspallachu allin kanqa”, nispa (Lucas 12:15). Kie runan yuyarin: “Imakunachus munasqaytan huk listapi anotarqani, chayta ruwaymi ichaqa chinkachisqay kaqkunata yuyarichiwarqan. Hinan necesitasqay kaqkunatañataq huk listapi churarqani, chaykunata conseguisqayman hinataqmi listamanta borrarqani. Chayta ruwaymi yanapawarqan ama sinchita llakikunaypaq”, nispa.

Ama qanllapichu yuyaykuy, aswanpas chay experienciaykiwan hukkunata sonqochay. Kie sutiyoq runa nin: “Amigoykunamantapas hukkunamantapas chaskirqanin yanapayta, ichaqa chayllatañan munarqani, hinan mana valeqpaq hina qhawarikurqani. Chaypin yuyarirqani Hechos 20:35 textoq nisqanta, ninmi: ‘Aswan kusisamiyoqqa qoqmi chaskiqmantaqa’, nispa. Manaña kaqniykuna karqanchu chaypas, sumaq simikunawanmi llakipi tarikuqkunata yanaparqani. Chayta ruwaymi anchata yanapawarqan”, nispa.

Llakikuyniykita imaynata atipanaykipaq Diosmanta mañakuy yachayta. Diosqa uyarinmi “wikch’usqa runaq mañakusqanta” (Salmo 102:17). Kie runaqa chay nisqanpin confiarqan, qanpas chayta ruway.

¿Yacharqankichu kayta? Runakunaqa desgraciakunaq kasqanwanmi tukuy kaqninkuta chinkachinku, hamuq tiempopiqa manañan chaykuna kanqañachu. Chaytan Biblia willan (Isaías 65:21-23). *