HIROSHIMA (Japón) llaqtapin Motoyasu mayu patapi tarikun bombaq mana thunisqan wasi, chay wasiqa 1945 watamantapachan imayna qhepasqan hinalla kashan. Yachasun imarayku chhaynalla kashasqanmanta.

Chay kinsa pisoyoq wasiqa cementomantawan ladrillomantawan ruwasqan, 1915 watapin wasichayta tukurqanku; chaypin organizaqku fabricakuna astawan yapakunanpaq. Ichaqa 6 agosto 1945 watamantapachan chayqa cambiapurqan, 8:15 horas tutamantanta. Ñawpaq kaq bomba atomican airepi t’oqyarqan chay wasiq qayllallanpi, 550 metro altopi hina. Chay wasipi kaqkunaqa kikin raton wañupurqanku, chay wasin ichaqa kaqlla sayarqan.

Runaqa mana khuyapayakuq kasqantan rikuchirqan “sinchi atiyniyoq ruwasqanku armawan” tukuyta thunispa, chayta yuyarinankupaqmi chay wasiqa mana allichasqachu karqan, chaytan nin UNESCO * nisqamanta huk qelqa. Chay wasitan reqsikun “Hiroshimapi thak kayta yuyarichiq” nispa, 1996 watapitaqmi Patrimonio Mundial nisqaq listanpi churasqa karqan.

Runaq mana khuyapayakusqanta yuyarinapaqqa imaymana monumentokunan kan, chaywanpas guerrakunaqa kashallanmi runakuna imaymanata munapayaq kasqankurayku, huk nacionniyoq huk religionniyoq kasqankumanta cheqninakusqankurayku ima. Chhaynaqa, ¿kallanqapunichu guerrakuna?

Manan, guerrakunaqa chinkapunqan. Salmo 46:9 textopin Biblia nin: “[Diosmi] teqsimuyuntinpi awqa-tinkuykunata qolluchin, wach’ina p’eqtakunatapas lanzakunatapas p’akirqarin, carretakunatapas ruphaykachin”, nispa. Chaywanmi yachanchis pisi tiempollamanta guerrakuna tukupunanta. Chaymantapas Diosqa gobiernokunaq rantinpin huk gobiernota churanqa, chaypin kamachinqa “Reykunaq Reynin” Jesucristo (Apocalipsis 11:15; 19:16).

Kay tiempopiqa monumentokunatan ruwanku guerrakuna runata ñak’arichisqanta yuyarinankupaq. Diospa gobiernon chayamuqtinmi ichaqa manaña chaykuna kanqañachu. Isaías 65:17 texton nin: “Ñawpaq sucedesqankunaqa qonqasqan kapunqa”, nispa.