JORDAN chaskishan juj tarjadorta, chayqa barco formayoqmi, manan nishu valorniyoqpaqchu qhawarikun. Jordan nin: “Wawallaraq kashaqtiymi unay tiempomanta amigoyku Russell regalawaran”, nispa. Russell wañupuqtinñan Jordanman willaranku, payqa tayta-mamanta abuelonta iman sasachakuykunapi tarikuqtinku anchatapuni yanapasqa. Jordan nillantaq: “Kunan astawanraq paymanta yachaspaymi regalonta aswan valorniyoqpaq qhawarini”, nispa.

Kay experiencian rikuchin agradecido runapaqqa regalo chaskisqanqa ancha valorniyoqmi kanman, wakinña pisipaq qhawarinkuman chaypas. Biblian willan ancha valorniyoq regalomanta, nin: “Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq”, nispa (Juan 3:16).

Wiñay kausayta qoq regalomanta, ¿kanmanchu ima regalopas aswan valorniyoq? Wakinkunaña mana chay jinatachu qhawarinku chaypas, cheqaq cristianokunapaqqa ‘ancha valorniyoqmi’ (Salmo 49:8; 1 Pedro 1:18, 19). Ichaqa, ¿imaraykun Dios sapan wawanta runakunarayku kachamuran?

Apóstol Pablon nin: “Juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12). Ñaupaq kaq runa Adanqa yachashaspan Diosta mana kasukuranchu, chaymi wañuypaq juchachasqa kapuran. Llapa mirayninpas wañuypaq juchachasqa kapullarantaq.

“Juchaq pagayninqa wañuymi, Diospa qokuyninmi ichaqa wiñay kausay, chay qokuyqa Señorninchis Cristo Jesusraykun” (Romanos 6:23). Diosqa runakunata wañuymanta salvananpaqmi  churin Jesucristota kay pachaman kachamuran, paymi ch’uya cuerponta entregaran llapa runakunarayku. Chay sacrificiorayku otaq ‘kacharichiyraykun’ wiñay kausayta chaskisun, sichus chaypi iñisun chayqa (Romanos 3:24).

Diosqa wawan Jesucristowanmi serviqninkunaman askha bendicionkunata qon, chaymantan apóstol Pablo niran: “Diosman gracias kachun ancha sumaq regalonmanta”, nispa (2 Corintios 9:15). Chhaynaqa, chay sumaq regaloqa kacharichiymi, chaytaqa manan imawanpas tupachisunmanchu. Chhaynaqa lliu regalokuna Diospa qowasqanchismanta, ¿imaraykun kacharichiy aswan sumaq regalo? ¿Imaraykun jujniray juj regalokunamanta? * ¿Imatan noqanchis ruwananchis? Qatimuq articulon kutichinqa chay tapuykunaman.