•  ¿Ima ninmi Biblia?

•  ¿Imaynapitaq María manaraq pi qhariwanpas puñushaspa juj wawata onqokuran?

•  ¿Imaraykun manaraq pi qhariwanpas puñuq sipasmanta Jesús nacenan karan?

•  Jesusta onqokusqan qhepaman, ¿juj wawakunayoqchu María karan?

•  ¿María mana juchayoqpunichu kanman karan Jesusta onqoq rijuriqtin?

•  ¿Adorananchischu Mariata?

 Bibliapin willan Mariaqa manaraq pi qhariwanpas puñushaspa Jesusta onqokusqanta, chay milagrotaqa Diosmi ruwaran. Bibliapiqa Isaías libropin willaranña chay milagromanta, imayna junt’akusqantaq kashan Mateo, Lucas librokunapi.

 Mesías nacenanmantan profeta Isaías kayta willaran: “¡Qhawaychis! Juj sipasmi onqoq kashan, paymi qhari wawata wachakunqa”, nispa (Isaías 7:14). Diospa yuyaychasqanmi Mateo librota qelqaqqa profeta Isaiaspa willasqanta Jesuspa nacenanwan tupanachiran. Mateoqa willaranmi Diospa milagro ruwasqanwan María onqoq rijurisqanta, chaymantapas kaytan nillarantaq: “Tukuy chaykunan karan Jehová Diospa willasqan junt’akunanpaq, paymi profetanwan niran: “Juj sipasmi a onqoq rijurinqa, jinan juj qhari wawata onqokunqa, ‘Emmanuel’ nispataq sutichanqaku”, nispa. Chay sutiqa “noqanchiswanmi Diosqa kashan” ninantan nin”, nispa (Mateo 1:22, 23).

 Lucas librota qelqaqpas willaranmi María juj milagrowan onqoq rijurinanmanta, niranmi: “Diosqa ángel Gabrieltan kacharan [...] María sutiyoq sipasman, paymi Davidpa mirayninmanta José sutiyoq qhariwan casarakunanpaq rimaykusqa kasharan”, nispa (Lucas 1:26, 27). María kikinpunin niran manaraq pi qhariwanpas puñusqanta. Chaymi Jesuspa maman kananta uyarispa angelta tapuran: “¿Imaynataq chayri kanman? Manaraqmá noqaqa pi qhariwanpas kaniraqchu”, nispa (Lucas 1:34).

 Mariaqa santo espirituq atiyninwanmi onqoq rijuriran, chay santo espirituqa Diospa atiyninmi (Mateo 1:18). Ángel Gabrielmi Mariata niran: “Santo espiritun qanman chayamusunki, ancha jatun Diospa atiynintaq llanthuykusunki. Chaymi naceq wawaqa ‘ch’uya, Diospa Churin’ nisqa kanqa”, nispa (Lucas 1:35). b Diosmi juj milagrota ruwaspa Mariaq wijsanman wawanpa kausayninta astamuran, chhaynapin Mariaqa onqoq rijuriran.

 Diosmi ajllaran manaraq pi qhariwanpas puñuq sipasta Jesús ch’uya cuerpoyoq nacenanpaq, chhaynapi llapa runakunata juchamanta wañuymantawan librawananchispaq (Juan 3:16; Hebreos 10:5). Diosmi Mariaq wijsanman Jesuspa kausayninta astamuran, chaymantataq santo espiritunwan pakaykuran mamanpa juchan mana wawaman pasananpaq (Lucas 1:35).

 Imaynan Adanpas manaraq juchallikushaspa ch’uya runa karan, chhaynan Jesuspas naceran mana juchayoq ch’uya runa. Bibliapunin nin: “Jesusqa manan jayk’aqpas juchallikuranchu”, nispa (1 Pedro 2:22). Chaymi Jesusqa mana juchayoq kasqanrayku pagayta atiran llapa runakuna juchamanta wañuymantawan kacharichisqa kananchispaq (1 Corintios 15:21, 22; 1 Timoteo 2:5, 6).

 Bibliapi nisqan jina Mariaqa Jesusta onqokusqan qhepamanqa juj wawakunayoqmi karan qosan Josewan (Mateo 12:46; Marcos 6:3; Lucas 2:7; Juan 7:5).

 Manan. Enciclopedia de la Religión Católica nisqa qelqapin Mariamanta nin: “Virgen Mariaqa mana ima juchayoqmi naceran. Paytaqa mamanpa wijsallanpiraq kashaqtinmi Diosqa pakaykuran ima juchamantapas”, nispa.

 Ichaqa Bibliaq nisqan jina Mariaqa juchayoqmi naceran (Salmos 51:5; Romanos 5:12). Mariapunin juchayoq kasqanta yacharan, chaymi Diospa kamachikuy simiq nisqanman jina, onqokusqan qhepaman juj sacrificiota Diosman aparan, chhaynapi juchanmanta perdonasqa kananpaq (Levítico 12:2-8; Lucas 2:21-24). Enciclopedia Católica Online nisqa qelqapin nin: “Bibliapiqa manan maypipas ninchu Mariaqa mana juchayoqmi naceran”, nispaqa. Chhaynaqa, chay yachachikuyqa iglesia catolicamantan jamun.

 Mariaqa anchatan Diosta munakuran, allin iñiyniyoq, kasukuq, juch’uyaykukuq iman karan. Ñaupa tiempopi tukuy sonqonkuwan Diosta serviq runakuna jinan karan, noqanchispas paykuna jinan kananchis (Hebreos 6:12).

 Ichaqa, Jesuspa mamanña María karan chaypas, Bibliapiqa manan yachachinchu: “Mariatan adorananchis, paymantan mañakunanchis”, nispaqa. Jesusqa manan jayk’aqpas Mariataqa jatuncharanchu nitaq qatikuqninkunatapas kamachiranchu jatunchanankupaq. Nuevo testamento nisqapiqa 27 librokunan kan, chaykunamantan pisqa librokunallapi Mariamanta willashan (Hechos 1:14).

 Chaymantapas Bibliaq nisqan jina ñaupa tiempopi cristianokunaqa manan Mariataqa jatuncharankuchu nitaq adorarankupaschu. Aswanmi Bibliapiqa yachachishan Diosllata adorananchispaq (Mateo 4:10).