Estados Unidos llactamanda jovengunata shuj encuestata rurajpica casi tucuicunami Diostaca mañanchimi nishca. Shinapash ashacunallami tucui punllacuna Diostaca mañanchi nishca. Tal vez huaquingunaca cashnachari tapurishca: “¿Ali sintiringapallachu Diostaca mañana cani? nishpa.

•  Diosta mañana nishpaca ¿imatata ningapa munan?

•  ¿Ciertopachachu Diosca ñuca mañaicunataca uyan?

•  ¿Imacunamandallata Diostaca mañai ushani?

•  Shuj jovengunaca ¿imatata nin?

 Jehová Dioshuan parlanatami mañana nin. Jehová Diosca tucui ñucanchicunata yali ushaita charishpapash “paica ñucanchimandaca na carupi canllu” (Hechos 17:27). Chaimandami Bibliapica: “Taita Diospajman quimirichi. Shina quimirijpica, paipash cangunapaman quimiringami” nin (Santiago 4:8).

 Taita Diosman quimiringapaca ¿imatata rurai ushapangui?

•   Diosta mañana. Mañashpami quiquinga Dioshuan parlai ushapangui.

•   Bibliamanda yachajuna. Bibliamanda yachajujpimi Diosca quiquinhuan “parlai” ushan.

 Diosta mañana, Bibliamanda yachajunami Diospa ali amigocuna tucuchun ayudanga.

 “Jehová Dioshuan parlai ushanaca tucuicunapallatami shuj bendición can” (Jeremy).

 “Ñuca imashina sintirijushcata Jehová Dioshuan parlashpami paiman ashtahuan quimirini” (Miranda).

 Diospi crishpa, paita mañashpapash huaquinbica quiquinba mañaita Dios uyajujta crinaca shinllimi can. Shinapash Bibliapica Jehová Dios ñucanchi mañaicunata uyanbacha cashcata ricuchishpami “mañanajujtaca, canmi uyangui” nin (Salmo 65:2). Imamandapash preocupado cashpaca, Jehová Diosman tucuita villachunmi Bibliapica animan. ¿Imamandata shina rurai ushapangui? Porque Jehová Diosca quiquinmanda preocuparinmi (1 Pedro 5:7).

 Caipi yuyapai: Quiquinba amigocunahuanga ¿nachu seguido parlapangui? Jehová Dioshuanbash shinallatami cutin cutin parlai ushapangui. Paitaca paipa shutipimi parlai ushangui (Salmo 86:5-7; 88:9). Ashtahuanbash Bibliapica “Taita Diosta mañanataca, na saquinachu canguichi” ninmi (1 Tesalonicenses 5:17).

 “Mañashpami Jehová Dioshuan parlashpa paiman tucui tucuita villai ushani” (Moises).

 “Ñuca mamitaman o amigocunaman importante cosascunata villajuj cuendami Jehová Diosmanbash tucuita villani” (Karen).

 Bibliapica: ‘Taita Diosmanmi, imatapash villashpa ninanda mañana canguichi. Tucui imamandapash pagui nishpa mañaichilla’ ninmi (Filipenses 4:6).

 Shinaca ¿quiquinba tucuilla problemacunatachu Taita Diosmanga villai ushapangui? Ari. Bibliapica caita rurachunmi animan: “Llasha quipishna cambaj llaquitaca, Mandaj Diosman saquilla. Paica ayudangallami” ninmi (Salmo 55:22).

 Shinapash ¿quiquinba problemacunamandallachu parlana capangui? Chantelle jovenga cashnami nin: “Ñucata ayudachunlla Jehovata mañashpaca, paipa ali amigo cashcataca na ricuchijuimanllu”. “Ñuca yuyaipica Jehovata mañashpaca agradicitarami agradicina canchi. Jehová Diostaca ashtaca ashtaca cosascunamandami agradici usharin”.

 Caipi yuyapai: ¿Imacunamandallata Jehová Dioshuanga agradecido sintiripangui? Quimsa cosascunapi pensaripai. Chai cosascunamandami cunanga Jehová Diostaca agradici ushapangui.

 “Shuj juyailla sisaguta ricushpallatami Jehová Diosta mañashpa chai sisagumanda agradicingapaj munanchi” (Anita).

 “Shuj gushtashca textopi pensarishpa o Jehovapa rurashcacunata ricushpami Jehová Diostaca agradici ushangui” (Brian).