“Huaquinbica imata ninataca alimi yachani, shinapash huaquinbica imatapash na ali yuyashpa ninillami” (James).

 “Imamandapash pinganayachijushpaca na aliguta yuyashpa parlanillami, cutin tranquila cashpaca yapata imatapash nishpami nali sintichini. Shinami siempre pandarini” (Marie).

 Bibliapica: “jallutaca ninahuanmi ” chimbapuran, shinallata “shuj uchilla ninaca shuj jatun sachataca tucuchinlla” ninmi (Santiago 3:5, 6). ¿Imatapash na aliguta yuyashpa parlaimandachu problemacunata charingui? Shina cajpica cai yuyaicunami ninanda ayudanga.

•  ¿Imamandata na aliguta yuyashpa imatapash ninilla?

•  Nali yuyashpa parlanamanda jarcari

•  Jovengunaca ¿imatata nin?

 Juchamanda. Bibliapica ninmi: ‘Tucuicunami, imatapash pandata nishpa llaquichinchilla. Maijan runapash na pandata parlashpa na llaquichij cashpaca, ima pandatapash na rurajmi canman’ nishpa (Santiago 3:2). Juchayu cashcamandami ñapash, imatapash nishpa o rurashpa pandanchi.

 “Juchayu yuyaita, juchayu jalluta charimandami siempre imapipash pandarishun” (Anna).

 Yapata parlana. Bibliapica: “Imatapash ninandapacha parlanajujpica juchapash na illanllu” ninmi (Proverbios 10:19). Yapata parlaj gentecunaca, shujcuna parlajujta na uyanata yachaimandami imatapash nishpa llaquichin.

 “Ali yuyaita charijcunaca na siempre parlanajunllachu. Cai alpapica Jesusllami tucuipi ali yuyaita charirca, shinapash shuj viajeca upallami quedarca” (Julia).

 Nali, llaquichij shimicuna. Bibliapica: “Huaquingunaca, imata rimashpapash, espadahuan chugrichinshnami saquinajun” ninmi (Proverbios 12:18). Nali llaquichi shimicuna nishpaca, na aliguta pensarishpa yangata parlanata, pitapash nali sintichina yuyaihuan imatapash ninatami nisha nin. Nali llaquichi shimicunata nij gentecunaca asichingapallami shina nijuni ningapashchari. Shinapash shujcunata nali sintichinaca na asinaichu can. Bibliapica “Ima llaquipash japishpachari ali canman nijunatapash, imata nalita ruranatapash, tucuitami saquina canguichi” ninmi (Efesios 4:31).

 “Imatapash nishpa asichinataca ninandami gushtani. Shinapash na cuenta urmajtami shujcunata llaquichini” (Oksana).

 Imatapash nara parlashpallata jarcarinaca na facilchu can. Shinapash Bibliapa consejocunata catinami ninanda ayudanga. Caipi yuyapai:

 “Imata ningapaj munashpapash shungu ucupilla yuyashpa, upallaichi” (Salmo 4:4, NM).

 Huaquinbica upalla quedanami ali can. Laura shuti solteraguca ninmi: “Culira yalipica, culirashca cashpa imatapash ningapaj munashca yuyaicuna na ali cashcatami cuenta japini”. Shinallata: “culiramandalla imatapash na nishcamandami cushijuni”. Ashaguta upalla quedanaca aliguta pensarishpa parlachunmi ayudan.

 “Rinri uyajpimi, ali shimi cajta, nali shimi cajtapash yacharin. Shimiman micuna chayajpimi, imashna cajtapash yacharin” (Job 12:11).

 Ashtaca problemacunamanda jarcarichunga, cai tapuicunapi pensarinami ayudanga:

•   ¿Ciertotachu nigrini? ¿Juyashcatachu ricuchigrini? ¿Minishtirishcapachachu can? (Romanos 14:19).

•   ¿Ñucata shina nijpica imashinata sintiriniman? (Mateo 7:12).

•   ¿Shujcunapa yuyaita respetashcatachu ricuchigrini? (Romanos 12:10).

•   ¿Imahora parlanata ali canman? (Eclesiastés 3:7).

 “Paimi ñucatapash yali ashtahuan ali yashpami, na jariyashpa tucuicunatallata alicachina canguichi” (Filipenses 2:3).

 Cai consejota pactachinami shujcunamanda ali yuyachun, aliguta pensarishpa parlachun, ama yangata imatapash nichun ayudanga. Shinapash na aliguta pensarishpa parlashpa llaquichishca cashpaca humilde canami ayudanga. Humilde cashpaca uchallami perdonda mañangui (Mateo 5:23, 24). Imatapash aliguta yuyashpa parlangapaj esforzaripai.