21 huatacunata charij Elaine jovenga ninmi: “Colegiopica pipash shuj huarmihuan cashcata parlajpica, tucuicuna ama huashaman quidangapaj nishpami chaita rurangapaj munan carca”.

 ¿Tucuicuna jarihuan huarmihuan puñushcata yachashpachu quiquinbash chaita rurangapaj munashcangui?

 ¿Ima horapash quiquinba novia o novio pacta puñushun nishcachu?

 Pipash jarihuan huarmihuan pacta puñuchun atichinajujpi o quiquinllata chai munaita charijpica cai temapa yuyaicunami ali decisiongunata japichun ayudaita ushan.

•  Llulla yuyaicuna, Cierto yuyaicuna

•  Jarihuan huarmihuan cachun atichinajujpica ama chaita rurapai

•  Huaquin jovengunaca imatata nin

 LLULLA YUYAI: Tucuicunami shuj jarihuan shuj huarmihuan pacta puñushca, ñucallami chaitaca na rurashcani.

 CIERTO YUYAI: 18 Huatacunata charij jovengunata shuj huarmihuan shuj jarihuan puñushcata na puñushcata tapujpica, ashtacacunami shuj jarihuan shuj huarmihuan na puñushcataca nirca. Shinaca “na tucuicunachu” shuj jarihuan shuj huarmihuan puñushca.

 LLULLA YUYAI: Ñucanchi noviota o noviata juyashcata ricuchingapaj pacta puñuna.

 CIERTO YUYAI: Huaquin jari jovengunaca paipa noviataca pacta puñushpallami juyarishcataca ricuchishun ninmi. Shinapash chaica na ciertochu can, ashtaca jaricunaca paipa noviahuan pacta puñushca jipallami jichun. Chaimi huarmica culiralla llaquilla quidan. a

 LLULLA YUYAI: Bibliaca shuj jarihuan shuj huarmihuan pacta puñunaca nalichu can ninmi.

 CIERTO YUYAI: Bibliapica shuj jarihuan shuj huarmihuan pacta puñuna na ali cashcataca na ninllu. Ashtahuangarin cazarashcacunallami pacta puñuna cashcata yachachin (Génesis 1:28; 1 Corintios 7:3).

 LLULLA YUYAI: Bibliapi yachachishcacunata cazushpaca na cushilla causaita ushashachu.

 CIERTO YUYAI: Nara cazarashpallata shuj jarihuan shuj huarmihuan pacta puñushpaca ashtaca llaquicunatami charipangui. Chaimi shuj jarihuan shuj huarmihuan pacta puñungapaca cazaranata shuyana capangui. Shinallami cushilla causaita ushapangui.

 Imatata yachajunchi: Cazarashpa shuj jarihuan shuj huarmihuan puñunaca cushilla causachunmi ayudashca. Pero nara cazarashpallata shuj jarihuan shuj huarmihuan puñunaca ashtacacunatami llaquichishca.

•   Ima ali cajta, ima na ali cajtami aliguta yachana capangui. Bibliapica “ali yuyaicunata charishpa aliguta yachajushca cashpami alita, nalitapash yachai ushajcuna” can nin (Hebreos 5:14). Ima ali cajta, ima na ali cajta aliguta yachajcunaca, shujcuna nalita rurachun atichinajujpipash nalitaca na ruranllu.

   16 huatacunata charij Alicia jovenga cashnami nin: “Alita rurangapaj, shujcunapaj ñaupapi ali ricuringapami esforzarini. Chaimi ima nalitapash na rurangapaj munani”.

   Caipi yuyapai: Shujcunapa ñaupapica ¿imashinata ricuringapaj munapangui? ¿Shujcunapa ñaupapi ama nali quidangapa nishpallachu ima na alitapash rurapangui?

•   Jipaman ima pasanapi yuyapai. Bibliapica cashnami nin: “maijan imata tarpushpapash, chaitallatami japinga” (Gálatas 6:7). Shuj jarihuan shuj huarmihuan pacta puñuchun atichinajujpica, jipaman ima pasanatami ali yuyana capangui. b

   16 huatacuna charij Sienna jovenga cashnami nin: “Nara cazarashpallata shuj jarihuan shuj huarmihuan puñushpaca, llaquilla, pipash na ciertopachaca juyahuanllu nishpami yuyaita ushapangui. Shinallata na munashpata vijsandi quidaita ushangui o imapash nanaicunami japita ushan”.

   Caipi yuyapai: Sex Smart nishca libropica cashnami nin: “Nali cosascunata rurachun atichinajuj amigocunahuanga ¿amigashpa catinachu capangui? ¿Chai amigocuna consejocunata cujpica, chai consejocunata cazunachu capangui?”.

•   Shuj jarihuan shuj huarmihuan pacta puñunamandaca imata pensana capangui. Shuj jarihuan shuj huarmihuan pacta puñunaca nalica na canllu. Bibliapica cazarashcacuna pacta puñui ushashcatami yachachin (Proverbios 5:18, 19).

   17 huatacuna charij Jeremi jovenga cashnami nin: “Taita Diosmi shuj jarihuan shuj huarmihuan pacta puñuchun rurashca. Shinapash Taita Diosca cazarashcacunalla pacta puñuchun ninmi. Chaimi Taita Diosllata cazaranataca callarichirca”.

   Caipi yuyapai: Cazarashpallami quiquinba huarmihuan cusahuan pacta puñuita ushapangui. Shinallami cai temapi parlashca llaquicunata na charipangui.