“15 huatacunata charishpaca imata ruranata, imata na ruranata ñuca taitacuna mandajpica alicachinmi carcani. Shinapash cunan ña 19 huatata charishpaca huaquin cosascunataca ñucallata dicidingapami munani” (Sylvia).

 ¿Cambash Sylviashnachu yuyapashcangui? Canbash Sylviashna yuyashca cajpica caipi yachachishcacunami taitamamacunahuan parlachun ayudanga.

•  ¿Imatata ña yachana capangui?

•  Caitami rurai ushapangui

•  Jovengunaca ¿imatata nin?

 Can imata ruranata mandashcacunamanda taitamamacunahuan nara parlashpallatami, cai yuyaicunata yuyarina capangui:

•  Imata ruranata, imata na ruranata ni pi na ima nijpica ¿imashnashi causanchiman? Caita yuyapai. Ashtaca carrocuna purij ñambi señalcunapash illa, semaforocunapash illa, mashnacaman calpanatapash na imatapash nijujpica ¿imashi pasanman? Imashnami chaicunaca carrocuna ama imapash pasachun ayudan, shinallatami taitamamacunapa imata ruranata, imata na ruranata mandashcacunapash familiapi aliguta causachun ayudan.

•  Camba taitamamacunaca, canda juyaimandami imata ruranata, imata na ruranataca mandan. Camba taitacunaca, imata ruranata imata na ruranata na mandashpaca, canda na juyashcata, nali taitamamacuna cashcatapashmi ricuchinman.

 ¿YACHAPASHCANGUICHU? Taitamamacunapashmi imata ruranata, imata na ruranata mandashcataca cazuna can. Chaita na yachashca cashpaca, Génesis 2:24​pi imata nijta, Deuteronomio 6:6, 7​pi imata nijta, Efesios 6:4​pi imata nijta, 1 Timoteo 5:8​pi imata nijta ricupai.

 Shinapash, taitamamacunapa mandashcacunaca na alichu yuyashpaca ¿imatata rurai ushapangui?

 Nara parlashpallata aliguta yuyapangui. Taitamamacuna imata ruranata, imata na ruranata mandajpica ¿cazushpa pactachijunguichu? Na pactachijushpaca huaquin cosascunapi ñucallata dicidichun saquihuaichi nishpaca amara nipanguichu. “Ñuca taitamamacuna ñucapi confiachunga ¿imatata rurai ushani?” nishcatami lii ushapangui.

 Taitamamacuna mandashcata cazujushca cashpaca, imata taitamamacunaman ningapaj munajushcataca aliguta yuyapangui. Imata ningapaj munajushcatara anotapangui. Chaimi imata nigrijushca ali cashcata o na ali cashcata cuenta urmachun ayudanga. Chaipa jipaca, camba taitamamacunataca, ¿ima horashi parlaita ushanchiman? nishpa tapui. Paicunahuan parlajushpaca caicunata yaria capangui:

 Respetangui. Bibliapica ninmi: ‘Shinllita rimashca shimica, ñapashmi ashtahuan fiñachin’ nishpa (Proverbios 15:1). Shinaca taitamamacunahuan butaritara butarishpa, nali taitacunami canguichi nijushpaca na ali parlaita ushanguichichu. Chaitaca ama cunganguichu.

 “Ñuca taitacunata respetajpica paicunapashmi ñucataca ashtahuan respetan. Caishujmanda chaishujmanda respetarishpaca facilmi imatapash rurai ushanchi” (19 huatata charij Bianca).

 Aliguta uyangui. Bibliapica ‘aliguta uyajcuna, aliguta yarishpara rimajcunami’ cana canguichi ninmi (Santiago 1:19). Camba taitamamacunahuan parlajushcataca ama cunganguichu. Na canllaca parlajunachu cangui.

 “Ashtahuan viñajushpaca, ñucami ñuca taitamamacunamandaca ashtahuan yachani nishpachari pensai callarinchi. Shina yuyanaca napacha alichu. Taitamamacunapa consejocunata cazushpaca alimi causashun” (20 huatata charij Devan).

 Camba taitamamacuna canmanda preocuparishcata yuyai. Camba taitamamacuna imashna yuyanshna cambash yuyai. Bibliapica ama camballa ali canataca yuyaichu, shujcunapapash ali canatami yuyana cangui ninmi (Filipenses 2:4).

 “Pundacunaca ñuca taitamamacunataca amigocunatashna ricunapa randica contratashnami ricun carcani. Shinapash, ñucapash rucucunashna imatapash rurangapaj munajpimi, paicunapash ñuca ali viñachun ayudangapaj ninanda esforzarinajushcarca. Chaitaca chairami cuenta urmani. Ñucata juyaimandami tucuita ruran” (21 huatata charij Joshua).

 Ima ashtahuan taitamamacunapa ali canata nipangui. Nishpalla, camba taitacunaca fiestaman shuj horasta carrota manejachunga na munashcanman. Imamandapacha preocuparijtami yachana capangui. ¿Caru caruta manejana cashcamandachu preocuparin? O ¿fiesta tiashcamandachu preocuparin?

•   Caru caru cashcamanda preocuparinajushpaca, pipash alipacha manejanata yachajhuan ringapaj dicidirijpica, taitamamacunaca talvez ñana preocuparinmanllu

•   Chai fiestaman rigrijushcamanda preocuparinajushpaca, picunalla fiestapi canata yachashpa, pi fiestapi cuidagrijujta yachashpaca ñana yapata preocuparinmanllu

 Camba taitamamacunata aliguman parlashpa, imata nijpipash cazuna munaihuan uyapangui. Camba rimaicunahuan, ruraicunahuanbashmi ‘taitata, mamataca alicachina’ capangui (Efesios 6:2, 3). Chaicunata rurajpica ¿candaca fiestaman cachangacha? Cachajpi, o na cachajpipash caitaca ama cunganguichu:

 Camba taitamamacuna imata nijta aliguman cazui. Cazujpica, taitamamacunaca jipamanga huaquin shuj cosascunapi dicidichunmi saquinga. Huaquin jovengunaca chaitaca na cuenta japinllu. Taitamamacuna can munashcata rurachun na saquijpi paicunahuan butari callarijpica, cutinba can imatapash ñucallata dicidichun saquihuaichi nijpica na saquingachu. Cutin cushijushpa cazujpica talvez jipacunamanga ashtahuanmi canllata imatapash dicidichun saquinga.