Testigo de Jehovacunaca semanapi ishcai viajetami Salón del Reino nishca huasicunapi tandanajun. Chaipica ¿imatata ruran? Chaiman rinaca ¿imapita quiquindaca ayudaita ushan?

•  Salón del Reino o Tandanajui Huasipica ¿imatata ruran?

•  Chaiman rinaca ¿imamandata ali can?

•  Shuj jovengunaca ¿imatata nin?

 Salón del Reino huasipica Bibliamanda consejocunata imashina pactachinatami yachachin. Chaipi tiashca tandanajuicunaca quiquindaca caicunapimi ayudanga:

•   Taita Diosmanda cabalta yachajui ushachun.

•   Cunanbi huaquin cosascuna imamanda pasajushcata intindi ushachun.

•   Ashtahuan ali causai ushachun.

•   Ali amigocunata tarita ushachun.

 ¿Yachaparcanguichu? Testigo de Jehovacunapa tandanajuna huasicunatami Salón del Reino nishpa rijsin. Chaipi tiashca reuniongunapi Diospa Gobiernomanda yachachijpimi shina shutihuan rijsin (Mateo 6:9, 10; 24:14; Lucas 4:43).

 Chaipi yachachishcacunaca ninandami ayudanga. Testigocunapa tandanajuipi Jehovapa yachachishcacunata yachajushpaca ali yachaitami japingui (Proverbios 4:5). Shinami Biblia ali desiciongunata agllachun ayudanga. Shinallata Bibliaca cai tapuicunatami contestan:

•   ¿Imapashi causanchi?

•   ¿Taita Diospa culpamandachu llaquicunaca tian?

•   Huañushca jipaca ¿imapash causashpa catinllu?

 Shinallata sábado o domingo punllapi tiashca discursocunapica cai yuyaicunamandami parlan:

•   ¿Imamandata Biblia ñucanchi causaipi ayudachun saquina capanchi?

•   Llaquicunahuan cashpaca ¿pipa ayudatata mascana capanchi?

•   Taita Diospa Gobiernoca ¿imacunatallata ñucanchimandaca rurajun?

 “Escuelamanda shuj compañeromi reunionman shamurca. Paica ñucanchihuanmi tiarirca. Chaimi paimanga Bibliata, shuj publicaciongunatapash mañachircani. Tandanajui jipaca turiñañacunapa comentariocunataca ninandami gushtarcani nihuarcami. Shinallata ñuca iglesiapica quiquingunashna yachajungapaj publicaciongunataca na charinchichu nihuarcami” (Brenda).

 ¿Yachaparcanguichu? Salón del Reinoman yaicungapaca nimata na paganachu capangui.

 Chai tandanajuipi gentecunata rijsishpaca cushillami sintiringui. Bibliapica Jesusta catijcunaca randimanda animaringapami tandanajun ninmi (Hebreos 10:24, 25). Cai nali mundopica pipash shujcunamandaca na preocuparinllu. Shinapash Diosta sirvishpa, shujcunamanda preocuparij gentecunahuan tandanajushpa tiempo yalinaca ninandami cushichin.

 “Tucui punlla ashtaca cosascunata rurashca jipaca huaquinbica llaquilla, shaijushcami sintirini. Shinapash reuniongunapi turiñañacuna animajpimi cutin cushilla sintirini. Chaimi caya punllapapash fuerzata charini” (Elisa).

 ¿Yachaparcanguichu? Mundo enteropica testigo de Jehovacunamandaca 120 mil yali congregaciongunami tian. Shinallata 60 mil yali Salón del Reino huasicunapashmi tian. Cada huatami ashtahuan ashtahuan gentecunaca ñucanchi tandanajuicunamanga rin. Chaimi cada huata casi 1.500 Salón del Reino huasicunata shayachin. a