Bibliapica ashtaca huarmicunamandami parlan. Paicunapa causaimandami yachajuita ushanchi (Romanos 15:4; 2 Timoteo 3:16, 17). Cai temapica Bibliapi parlashca huarmicuna imatalla rurashcatami yachajupashun. Paicunapa ejemplomi ñucanchi causaipica ayudan (1 Corintios 10:11; Hebreos 6:12).

  Abigaíl

 Abigailca ¿pita carca? Abigailca Nabalpa huarmimi carca. Nabalca sinlli shungu, charij charij runami carca. Abigaíl huarmiguca Jehová Diospi crij, humilde, ali yachaita charij, juyailla huarmigumi carca (1 Samuel 25:3).

 Abigailca ¿imatata rurarca? Abigailca aliguta yuyashpa ruraimandami paipa cusapa causaita salvarca. Abigailca Nabalhuanga, David pacajushca llactapimi causarca. David, paipa sirvij jaricunahuan pacajushpa causajushpaca, Nabalpa llamacunata ama shuhuachunmi ricun carca. Shuj punllaca, Davidca paipa sirvij jaricunatami Nabalta micunata mañachun cacharca. Shinapash Nabalca shinlli shungu tucushpami Davidta sirvij jaricunamanga micunata na cararca. Chaimandami Davidca ninanda culirashpa Nabalta paipa sirvij jaricunatapash huañuchingapaj llujshirca (1 Samuel 25:10-12, 22).

 Abigailca Davidman, paipa sirvij jaricunaman paipa cusa Nabal micunata na carashcatami yachaj chayarca, chaimi Abigailca Davidman micunata carachun cacharca Abigailca paipa sirvijcunahuan rishpami ima juchata rurashca cashpapash, perdonahuai nishpami Davidtaca mañarca (1 Samuel 25:14-19, 24-31). Chaimi Davidca, Abigaíl humilde huarmigu cashcata cuenta japirca. Shinallata pitapash ama llaquichichun Abigaíl huarmiguta Taita Dios utilizashcatami cuenta japirca (1 Samuel 25:32, 33). Nabal huañujpimi Abigailca Davidpa huarmi tucurca (1 Samuel 25:37-41).

 Abigaíl huarmigumandaca ¿imatata yachajunchi? Abigailca juyalagu cashpa, charij charij cashpapash shujcunata yali cani nishpaca na yuyanllu carca. Shujcunahuan casilla ali causaiguta charingapaj munaimandami pai na rurashca juchacunamandapash perdonda mañarca. Abigailca jatun problemacunata charishpapash ali yuyashpa, na manllashpami chai problemacunataca mishai usharca.

•  ▸ Abigaíl huarmigumanda ashtahuan yachajungapaj munashpaca “Una mujer sensata” nishca tematami ricuita ushapangui.

  Ana

 Anaca ¿pita carca? Anaca Elqanapa huarmi, Samuelpa mamami carca. Samuelca israelitacunapa profetami tucurca (1 Samuel 1:1, 2, 4-7).

 Anaca ¿imatata rurarca? Anaca ashtaca huatacunata cazarashca cashpapash huahuacunata na chari ushaimandami Taita Diospa ayudata mascarca. Shinapash Anapa cusaca, Peniná huarmihuanmi huahuacunata charirca. Peninaca huahuacunata charimandami Anamandaca siempre burlarin carca. Chaimi Anaca shuj jari huahuaguta carahuai nishpa Taita Diostaca mañarca. Shuj jari huahuaguta cujpica tabernáculo huasipi quiquinda sirvichunmi cusha nirca. Tabernáculo huasitaca maimanbash apaita ushanallami carca. Israelitacunaca tabernáculo huasitaca Taita Diosta adorangapami utilizan carca (1 Samuel 1:11).

 Anapa mañashcacunata uyashpami Taita Diosca shuj jari huahuaguta cararca. Chai huahuagutaca Samueltami shutichirca. Jehovaman nishcashnami Anaca paipa churi Samueltaca tabernáculo huasipi sirvichun aparca (1 Samuel 1:27, 28). Ana huarmiguca cada huatami paipa churimanga túnica nishca churajunaguta apan carca. Tiempohuanga Ana huarmiguca quimsa jari huahuacunata, ishcai huarmi huahuacunatami charirca (1 Samuel 2:18-21).

 Anamandaca ¿imatata yachajunchi? Anaca tucui shunguhuan Taita Diosta mañaimandami pai charishca llaquicunataca aguantai usharca. Ana tucui shunguhuan Jehová Diosta mañashcataca 1 Samuel 2:1-10​pimi ricuita ushapanchi. Ana Jehová Diosta tucui shunguhuan mañashcata ricushpami sinlli feta charishcata cuenta japipanchi.

•  ▸ Anamanda ashtahuan yachajungapaj munashpaca “Le abrió su corazón a Jehová” nishca temata ricuita ushapangui.

•  ▸ Punda tiempopi Taita Dios tauca huarmicunata charichun imamanda saquin cashcata ashtahuan yachangapaj munashpaca “¿Aprueba Dios la poligamia?” nishcatami ricuita ushapangui.

  Dalila

 Dalilaca ¿pita carca? Sansón munashca huarmimi carca. Sansonga Israel llactapa juezmi carca (Jueces 16:4, 5).

 Dalilaca ¿imatata rurarca? Dalilamanga filisteocunami Sansonda llullachun culquita pagarca. Jehová Diosmi Sansondaca israelitacunata filisteocunamanda salvachun utilizarca. Ninan ushaita Jehová Dios carashcamandami filisteocunaca Sansondaca na mishai usharca (Jueces 13:5). Chaimandami filisteocunata mandajcunaca Dalilapa ayudata mañarca.

 Sansón imamanda ninan ushaita charishcata yachangapaj munaimandami filisteocunaca Dalilamanga culquita pagarca. Chaimi Dalilaca Sansondaca “¿imamandata ninan ushaita charingui?” nishpa cutin cutin tapujurca. Chashna tapujujpillami Sansonga imamanda ninan ushaita charishcataca villarca (Jueces 16:15-17). Dalilaca Sansón imamanda ninan ushaita charishcatami filisteocunamanga villarca. Chashna villashcamandami Sansondaca japishpa carcelpi churaita usharca (Jueces 16:18-21).

 Dalilamandaca ¿imatata yachajunchi? Dalilaca culquita yapata munaimandami nali cosascunata rurarca. Shinallata paipilla pensarimanda, culquita charina munaita yapata pensarimandami Jehovata sirvij runataca llullarca. Dalila rurashcashnaca na ruranachu canchi.

  Débora

 Deboraca ¿pita carca? Deboraca Jehová Diospa profetami carca. Jehová Diosca Deboramanmi israelitacuna imata rurana cashcataca villan carca. Shinallata paicuna ima problemacunata charishpapash, chai problemacunata imashina alichinatami villan carca (Jueces 4:4, 5).

 Deboraca ¿imatata rurarca? Deboraca Diosta sirvijcunatami na manllashpa ayudarca. Jehová Diosca Deborataca Barac runata cayachunmi cacharca. Barac runataca israelita soldadocunata apashpa cananeo soldadocunahuan macanajugri nishpami Jehová Diosca mandarca (Jueces 4:6, 7). Chaimi Baracca Deborataca ñucahuan jacu nirca. Chaimi Deboraca na manllashpa paihuan rirca (Jueces 4:8, 9).

 Jehová Diosmi israelitacunataca cananeocunata mishachun ayudarca. Chaimi Jehová Dios imashina ayudashcata ricuchingapaj Barac, Deborapash shuj cancionda candarca. Chai cancionbica Jael huarmigupash cananeocunata mishangapaj imashina ayudashcatapashmi villan (Jueces, capítulo 5).

 Deboramandaca ¿imatata yachajunchi? Deboraca na manllashpami shujcunata ayudan carca. Shinallata shujcunapash Taita Diospa ñaupajpi ali ricurichunmi ayudan carca. Shujcuna Taita Diospa ñaupajpi alita rurashcata ricushpaca, alitami rurashcangui ninmi carca.

•  ▸ Deboramanda ashtahuan yachajungapaj munashpaca “Me levanté como madre en Israel” nishca tematami ricuita ushapangui.

  Ester

 Esterca ¿pita carca? Esterca Judá llactamandami carca. Rey Asueromi paipa huarmi cachun agllarca.

 Esterca ¿imatata rurarca? Esterca rey Asuerohuan cazarashca caimandami, Judá llactamanda gentecunata ama huañuchichun ayudarca. Persia llactapi caj judiocunata huañuchichun shuj ley llujshishcatami Esterca yachaj chayarca. Chai leytaca Hamán runami llujchishca carca. Paica jatun mandajpa mandajmi carca (Ester 3:13-15; 4:1, 5). Chaimi Esterca na manllashpa paipa primo Mardoqueopa ayudahuan, Hamán runa imata ruragrijushcataca paipa cusaman villarca (Ester 4:10-16; 7:1-10). Rey Asueroca judiocuna, Persia llactamanda gentecunahuan macanajui ushachunmi Ester y Mardoqueo shuj leyta llujchichun saquirca. Chai leyta llujchishcamandami judiocunaca salvarita usharca (Ester 8:5-11; 9:16, 17).

 Estermandaca ¿imatata yachajunchi? Paica humilde, na manllaj, tucuita yachaj huarmimi cani nishpaca na pensarinllu carca (Salmo 31:24; Filipenses 2:3). Rey Asueropa huarmi cashpapash, juyailla huarmigu cashpapash shujcunapa ayudatami mascan carca. Paipa cusahuan parlashpapash na manllashpa, respetohuan, aligumanmi parlan carca. Shinallata paipa llactata llaquichigrijujpipash pai Judá llactamanda cashcataca na pacarcachu.

•  ▸ Estermanda ashtahuan yachajungapaj munashpaca “Defendió al pueblo de Dios” “Actuó con sabiduría, valor y altruismo” nishca temacunatami ricuita ushapangui.

  Eva

 Evaca ¿pita carca? Evaca Jehová Dios rurashca punda huarmimi carca. Shinallata bibliapi parlashca punda huarmimi can.

 Evaca ¿imatata rurarca? Evaca Taita Dios mandashcatami na cazurca. Evaca paipa cusa Adán cuendami jucha illaj carca. Jehová Diosca paicunataca ima ali cajta, ima nali cajta agllachunmi rurarca. Shinallata juyanata, ali yachaita charinatapash yachajuchunmi rurarca (Génesis 1:27). Jehová Diosca, Adanmanga chaupi jardinbi tiaj yuramandaca na micunachu canguichi nishpami mandarca. Chaitaca Evaca alimi yacharca. Shinapash Satanasca na huañunguichu nishpami Evataca crichirca. Ashtahuangarin Jehová Diosta na cazushpaca ali causaitami charingui nircami. Chashna nijpimi Evaca chai yuramanda japishpa micurca, paipa cusamanbash cararca (Génesis 3:1-6; 1 Timoteo 2:14).

 Evamandaca ¿imatata yachajunchi? Nali munaicunata ñucanchi shungupi charishpaca Eva cuendami llaquipi urmashun. Evaca paipa shungupi nali munaicunata charishcamandami Jehová Dios mandashcataca na cazurca (Génesis 3:6; 1 Juan 2:16).

  Jael

 Jaelca ¿pita carca? Jaelca Heberpa huarmimi carca. Paica na israelita carcachu. Jaelca imatapash na manllaj huarmimi carca. Chaimi Diospa llactapa lado tucurca.

 Jaelca ¿imatata rurarca? Jaelca cananeo soldadocunata mandaj Sísara runa, paipa carpa huasiman yaicuchun saquirca. Sísara runaca israelitacunata na mishai ushashcamandami maipi pacajunata mascajurca. Chaimi Jaelca paipa causajuj carpa huasi ucuman yaicuchun saquirca. Sísara runa puñujujpimi Jaelca huañuchirca (Jueces 4:17-21).

 Jaelca Sísara runata huañuchishpaca, profeta Débora nishca shimicunatami pactachirca. “Mandaj Diosca, Sísara shuti runataca huarmipaj maquipimi churanga” (Jueces 4:9). Jaeltaca na manllaj huarmi cashcamandami Bibliapica ‘huarmi purapica alicachi tucushca cachun’ nishpami rijsin (Jueces 5:24).

 Jaelmandaca ¿imatata yachajunchi? Jaelca imatapash rurajlla, na manllaj huarmimi carca. Jaelpa causaimanda yachajushpaca Taita Dios paipa nishcacunata pactachingapaj imatapash ruraj cashcatami yachajupanchi.

  Jezabel

 Jezabelca ¿pita carca? Jezabelca Acabpa huarmimi carca. Acabca Israel llactapa mandajmi carca. Jezabel huarmica na israelita carcachu. Cananeocunapa Baal diostami adoran carca.

 Jezabelca ¿imatata rurarca? Reina Jezabelca millai, pitapash mandajlla huarmimi carca. Jezabelpa chaquita catishpami ashtaca gentecunaca Baal diosta adorashpa, huainayashpa causanajurca. Shinallata Jezabelca Jehová Diosta sirvijcunatapashmi huañuchirca (1 Reyes 18:4, 13; 19:1-3).

 Jezabelca paipa munaita rurangapaj munaimandami pitapash llullan carca, huañuchinlla carca (1 Reyes 21:8-16). Taita Dios nishcashnami Jezabel huarmi huañujpica alcucuna micurca (1 Reyes 21:23; 2 Reyes 9:10, 32-37).

 Jezabelmandaca ¿imatata yachajunchi? Jezabel huarmica pitapash na cazuj, millai millai huarmimi carca. Jezabeltaca na pingaj huarmi, millanai cosascunatapash ruraj huarmi cashcatami rijsin. Jezabelpa causaica nali ejemplomi can.

  Lotpa huarmi

 Lotpa huarmica ¿pita carca? Bibliapica Lotpa huarmipa shutitaca na ninllu. Shinapash ishcai hijata charishcata, Sodoma llactapi causashcatami yachanchi (Génesis 19:1, 15).

 Lotpa huarmica ¿imatata rurarca? Lotpa huarmica Taita Diospa mandashcatami na cazurca. Jehová Diosca Sodoma llactatami tucuchigrijurca. Sodoma llactapa ladolla llactacunatapashmi paicunapa nali ruraicunamandami tucuchigrijurca. Lotta, paipa familiata juyashcamandami Taita Diosca Sodoma llactamanda llujchichun ishcai angelcunata cacharca (Génesis 18:20; 19:1, 12, 13).

 Angelcunaca paicunata llujchishpaca, ama huashamanga tigrarishpa ricunguichichu nircami. Na cazushpaca huañunami carca (Génesis 19:17). Lotpa huarmica na cazuimandami ‘cachi rumiman tigrarca’ (Génesis 19:26).

 Lotpa huarmimandaca ¿imatata yachajunchi? Ñucanchi causaipi, ñucanchi cosascunatara pundapi churashpaca, Lotpa huarmishnami Jehová Diosta cazunataca ladoman saquishun. Chaimi Jesusca cashna nirca: “Lot runapa huarmi ima tucushcata yaringuichi” nishpa (Lucas 17:32).

  Sulamita huarmi

 Sulamita huarmica ¿pita carca? Sulamita huarmiguca llamacunata michij juyailla huarmigumi carca. Shinallata El Cantar de los Cantares libropimi paimandaca parlan. Bibliapica paipa shutitaca na villanllu.

 Sulamita huarmiguca ¿imatata rurarca? Sulamita huarmiguca llamatacunata michij jarigutami juyarca (El Cantar de los Cantares 2:16). Rey Salomonga Sulamita huarmigu juyaillagu cajta ricushpami paihuan cazarangapaj munarca (El Cantar de los Cantares 7:6). Sulamita huarmigutaca rey Salomonhuan cazarai nishpa atichinajujpipash, paica rey Salomonhuan cazarangapaca na munarcachu. Paica llamacunata michij jarigutami juyarca (El Cantar de los Cantares 3:5; 7:10; 8:6).

 Sulamita huarmigumandaca ¿imatata yachajupanchi? Sulamita huarmigu juyalagu cashpapash humildemi carca. Rey Salomón charij charij cajpipash, shujcuna paihuan cazaranami cangui nijpipash paica na cazurcachu. Shina rurashpami paipa yuyaipipash limpio carca.

  Lea

 Leaca ¿pita carca? Leaca Jacobpa punda huarmimi carca. Paipa ñaña Raquelca Jacobpa cati huarmimi carca (Génesis 29:20-29).

 Leaca ¿imatata rurarca? Leaca Jacobpa seis churicunapa mamami carca (Rut 4:11). Jacobca Raquelhuanmi cazarangapaj munarca. Shinapash Raquelpa taita Labanmi llullashpa Leahuan cazarachirca. Labán llullashcata cuenta japishpami Jacobca paihuan parlangapaj rirca. Chashna nijpimi Labanga cai llactapica punda hija nara cazarajpillataca jipa hijaca na cazaraita ushanllu nirca. Semana jipaca Jacobca Raquelhuanmi cazararca (Génesis 29:26-28).

 Jacobca Raquel huarmigutami Leatapash yali juyan carca (Génesis 29:30). Chaimi Leaca Raquelhuan culirarca. Taita Diosca Lea imashina sintirijujta yachashpami seis jari huahuacunahuan y shuj huarmi huahuahuan bendiciarca (Génesis 29:31).

 Leamandaca ¿imatata yachajunchi? Leaca pai imashina sintirishcataca Taita Diosmanmi villarca. Shina rurashpami Taita Dios ayudanapi confiarca (Génesis 29:32-35; 30:20). Jaricuna tauca huarmicunahuan cazarashcamanda familiapi llaquicuna tiajtami Leaca cuenta japirca. Taita Diosca jaritaca shujlla huarmihuanmi cazarana nishpami mandarca. Shinapash Taita Diosca shuj tiempotaca jaricuna tauca huarmihuan cazarachunmi saquirca (Mateo 19:4-6).

•  ▸ Leamanda ashtahuan yachangapaj munashpaca “Dos hermanas rivales ‘edificaron la casa de Israel’” nishca tematami ricuita ushapangui.

•  ▸ Punda tiempopi Taita Dios tauca huarmicunata charichun imamanda saquin cashcata ashtahuan yachangapaj munashpaca “¿Aprueba Dios la poligamia?” nishcatami ricuita ushapangui.

  María (Martapa ñaña, Lazaropa pani)

 Mariaca ¿pita carca? María, paipa turi Lázaro, paipa ñaña Martapash Jesuspa amigocunami carca.

 Mariaca ¿imatata rurarca? Mariaca tauca viajecunatami Jesusta respetashcataca ricuchirca. Mariaca paipa turi Lázaro huañujujpica Jesusca huañuchunga na saquinmanllu carca nircami. Mariaca paipa turi Lazarota Jesús causachijpica chaipimi carca. Paipa ñaña Martaca Jesusta uyajujpimi Mariataca tacurirca. Shinapash Jesusca Mariataca Taita Diosmandara yachajungapaj munashcata ricushpami, Mariataca alitami rurajungui nirca (Lucas 10:38-42).

 Mariaca shuj viajeca Jesusta mingachishpami ashtaca valishca mishquillagu ashnajuj jambiguta Jesuspa umapi, chaquipi javirca (Mateo 26:6, 7). Chashna rurajujta ricushpami huaquingunaca Mariataca tacurirca. Shinapash Jesusca Mariamandaca cashcami nirca:“Cai pachapica, maipi cashpapash cai ali villaita villajushpaca, cai huarmita yarichunbashmi, pai imata rurashcatapacha villanga” nircami (Mateo 24:14; 26:8-13).

 Mariamandaca ¿imatata yachajunchi? Mariaca sinlli fetami charirca. Taita Diospa Reinotami pundapi churarca. Mariaca humilde, imatapash na mitsashpa caraj, Jesustapash respetanmi carca.

  María (Jesuspa mama)

 María Jesuspa mamaca ¿pita carca? María huarmiguca Judá llactamandami carca. Taita Dios bendiciajpimi, Mariaca nara jarihuan tacarishca huarmigu cashpapash Jesusta ungurca.

 Mariaca ¿imatata rurarca? Mariaca Taita Diosta cazuj, humilde huarmigumi carca. María huarmiguca Josehuan cazarangapaj ari nishcami carca. Shuj punllaca shuj ángel ricurishpa, vijsayu tucushpami Taita Diospa churiguta ungungui nirca (Lucas 1:26-33). Chaimi Jesuspa mama canataca pactachirca. Jesusta charishca jipaca Mariaca, Josehuanga chuscu churicunata, ishcai huarmi huahuacunatami charirca. Chaimandami, Mariaca jarihuan na tacarishca huarmiguca ñana carca (Mateo 13:55, 56). Mariaca Jesuspa mama cashpapash shujcuna alicachishpa ricuchunga na munarcachu. Jesús causajujpipash, Jesús huañushca jipapash Mariaca humilde cashpami catirca.

 Jesuspa mama Mariamandaca ¿imatata yachajunchi? Mariaca Jesuspa mama cana shuj jatun responsabilidad cajpipash Taita Diostaca tucuipimi cazurca. Shinallata Taita Diospa shimitaca alimi rijsirca. Lucas 1:46-55​pi shimicunata ricushpami María Taita Diospa shimita ali rijsishcataca yachanchi.

•  ▸ Mariamanda ashtahuan yachajungapaj munashpaca “Lecciones que aprendemos de María” nishca temata ricuita ushapangui.

  María Magdalena

 María Magdalenaca ¿pita carca? María Magdalenaca Jesuspa ali catijmi carca.

 María Magdalenaca ¿imatata rurarca? María Magdalenaca Jesushuan, Jesuspa catijcunahuanbash pacta purij huarmigumi carca. Shinallata paipa charishcacunata carashpami Jesusta, Jesuspa catijcunatapash ayudan carca (Lucas 8:1-3). Jesusta huañuchingacamanmi María Magdalenaca Jesuspa ladopi carca. María Magdalenaca Jesús causarishcata ricuna bendiciondami charirca (Juan 20:11-18).

 María Magdalenamandaca ¿imatata yachajunchi? María Magdalenaca Jesús villachishpa catichunmi paipa charishcacunahuan ayudarca. Shinallata Jesustaca tucui shunguhuanmi sirvin carca.

  Marta

 Martaca ¿pita carca? Martaca Mariapa ñaña, Lazaropa panimi carca. Paicunaca Betania llactapimi causarca.

 Martaca ¿imatata rurarca? Martaca Jesuspa amigami carca. Chaimandami Bibliapica “Martatapash, paipaj ñañatapash, Lázaro runatapash, Jesusca ninandami juyarca” nin (Juan 11:5). Martaca shujcunata mingachij huarmigumi carca. Shuj punllaca Martapa huasimanmi Jesusca visitangapaj rirca. Chaimi Martaca Jesusman imagutapash carangapaj nishpa micunata rurajurca. Cutin Mariaca Jesús yachachijujta uyashpami tiajurca. Chaimi Martaca paipa ñaña María na ayudan nishpa Jesusman quejarijurca. Chaita uyashpami Martataca Jesusca aliguman consejarca (Lucas 10:38-42).

 Paipa turi Lázaro nanashca cajpimi Martaca Jesusta cayachun cacharca. Paica, Jesús paipa turi Lazarota jambi ushashcataca seguromi carca (Juan 11:3, 21). Shinapash Jesús nara chayajpillatami Lazaroca huañurca. Martaca huañushcacuna causarinataca crircami. Chaimi Jesusca paipa turita causachi ushanatapash crirca (Juan 11:20-27).

 Martamandaca ¿imatata yachajunchi? Martaca paipa huasipi shujcunata mingachingapami esforzarirca. Paita consejajpipash chai consejocunataca aligumanmi chasquirca. Pai imata crishcata, pai imashina sintirishcataca na upalla quidarcachu.

•  ▸ Martamanda ashtahuan yachajungapaj munashpaca “He creído” nishca tematami ricuita ushapangui.

  Míriam

 Miriamga ¿pita carca? Miriamga Moisespa, Aaronba panimi carca. Bibliapica huarmi profetacunamanda parlashpaca Miriammandami pundapica parlan.

 Miriamga ¿imatata rurarca? Miriamga israelitacunapa profetami carca. Paica Taita Diospa villashcacunatami villan carca. Taita Dios egipcio soldadocunata mar Rojopi tucuchijpica Miriamga shuj canciondami candarca (Éxodo 15:1, 20, 21).

 Miriambash, Aaronbash jariyashcacuna, envidiosocuna tucuimandami Moisestaca huashalla rimai callarirca. Chashna rimajujtami ‘Mandaj Diosca uyarca’. Chaimandami paicunataca llaquichirca (Números 12:1-9). Miriammi Moisestaca huashalla parlai callarirca. Chaimandami Taita Diosca Miriamdaca lepra ungüihuan llaquichirca. Moisesmi Miriamda jambichunga Jehová Diosta mañarca. Chashna mañajpimi Jehová Diosca uyarca. Shinapash Miriamga israelitacunapa shayachishca carpa huasicunamanga siete punllacuna jipami tigraita usharca (Números 12:10-15).

 Bibliapica, Míriam nalicunata rurashcacunamanda arripintirishpa Jehová Diosta tucui shunguhuan sirvishcatami ricuchin. Huaquin huatacuna jipaca Miriammandaca Taita Diosca cashnami nirca: “Cangunata pushamuchunga Moisesta, Aaronda, Miriamdami cacharcani” nirca (Miqueas 6:4).

 Miriammandaca ¿imatata yachajunchi? Miriamba causaita ricushpami, ñucanchi huauquipanicunamanda imatalla parlajujtaca Taita Dios uyanlla cashcatami yachajunchi. Taita Diospa ñaupajpi ali ricuringapaca na jariyashcacuna, na envidiosocuna cana cashcatapashmi yachajunchi. Shujcunamanda huashalla parlashpaca paicunatami llaquichinchiman.

  Rahab

 Rahabca ¿pita carca? Culquimanda huainayashpa causaj Rahab shuti huarmiguca, Jericó llactapimi causarca. Paica Jehová Diostami sirvi callarirca.

 Rahab huarmiguca ¿imatata rurarca? Jericó llactata ricungapaj rishca ishcai israelitacunatami Rahabca pacarca. Paica Jehová Dios israelitacunata egipciocunamanda, amorreocunamanda salvashcata yachaj chayashpami chai ishcai israelitacunataca pacarca.

 Israelitacuna Jericó llactata tucuchigrijujpica ñucatapash, ñucapa familiatapash salvapangui nishpami chai ishcai israelitacunataca mañarca. Chaimi salvaringapaca caitami rurana cangui nirca: “Ñucanchicuna pi cashcataca pimanbash na villanachu cangui.Canbash, canba familiapash huasi ucupimi quedana canguichi. Shinallata canba ventana huasipimi puca cabuyata huarcuna cangui” nirca. Chai ishcai israelitacuna imata nishcata pactachimandami Rahabpash, paipa familiapash salvarita usharca.

 Huaquin huatacuna jipaca Rahabca shuj israelita jarihuanmi cazararca. Chaimandami Jesuspash, rey Davidpash Rahabpa mirai tucurca (Josué 2:1-24; 6:25; Mateo 1:5, 6, 16).

 Rahabmandaca ¿imatata yachajunchi? Bibliapica Rahabmanda parlashpaca shinlli feta charishcatami ricuchin (Hebreos 11:30, 31; Santiago 2:25). Rahabpa causaita ricushpami, Taita Diosca punda imata rurashcatapash na ricushpa perdonaj cashcata, tucuicunata igual tratan cashcatapashmi yachajunchi. Shinallata paipi tucui shunguhuan confiajpica Taita Dios bendician cashcatami yachajupashcanchi.

•  ▸ Rahabmanda ashtahuan yachajungapaj munashpaca “Fue declarada justa por obras” nishca tematami ricuita ushapangui.

  Raquel

 Raquelca ¿pita carca? Raquelca Labanba hijami carca. Shinallata Jacobpa huarmimi carca.

 Raquelca ¿imatata rurarca? Raquelca Jacobhuan cazarashpami ishcai churicunata charirca. Paicunaca Israel llactapa 12 jatun familiacunata mandaj puracunami tucurca. Bibliapica Raquelca paipa taitapa llamata michijushpami paipa cusa tucunataca rijsirca ninmi (Génesis 29:9, 10). Paipa ñaña Leahuan ricushpaca “Raquelca, juyailla ricujuj ali huarmigumi carca” (Génesis 29:17).

 Jacobca Raquelhuan cazarangapaj munaimandami Raquelpa taitapa siete huatacunata trabajarca (Génesis 29:18). Shinapash Raquelpa taita Labanga, Raquelhuan cazarachinapa randica Jacobtaca Leahuanrami primeroca cazarachirca (Génesis 29:25-27).

 Jacobca Raquelta, Raquelpa churicunatami ashtahuan juyan carca (Génesis 37:3; 44:20, 27-29). Chaimandami paipa ñaña Leaca Raquelhuanga nali apan carca (Génesis 29:30; 30:1, 15).

 Raquelmandaca ¿imatata yachajunchi? Raquelca Taita Dios paipa mañashcacunata uyanata yachashpami, familia ucupi llaquicunata charishpapash aguantashpa catita usharca (Génesis 30:22-24). Raquelpa causaita ricushpami jaricuna tauca huarmicunahuan cazarashpaca familia ucupi llaquicunata charishcata yachajunchi. Chaimandami Jehová Diosca jaritaca shujlla huarmihuan cazarana can nishpami mandarca (Mateo 19:4-6).

•  ▸ Raquelmanda ashtahuan yachajungapaj munashpaca “Dos hermanas rivales ‘edificaron la casa de Israel’” nishca tematami ricuita ushapangui.

•  ▸ Punda tiempopi Taita Dios tauca huarmicunata charichun imamanda saquin cashcata ashtahuan yachangapaj munashpaca “¿Aprueba Dios la poligamia?” nishcatami ricuita ushapangui.

  Rebeca

 Rebecaca ¿pita carca? Rebecaca Isaacpa huarmimi carca. Rebecaca ishcai churicunatami charirca. Chai churicunapa shutica Jacob, Esaumi carca.

 Rebecaca ¿imatata rurarca? Rebecaca Taita Dios mandashcataca tucuipimi cazurca. Shuj punllaca Rebeca yacuta llujchingapaj rijpimi, shuj jari tuparishpaca yacuta carahuai nirca. Chaimi Rebecaca chai jariman, chai jaripa camellocunamanbash yacuta cararca (Génesis 24:15-20). Chai jarica Abrahanba sirvijmi carca. Paica Isaacpa huarmita mascangapami caru caruta rirca (Génesis 24:2-4). Abrahanba sirvijca Isaacpa ali huarmita taringapami Taita Diosta mañashcarca. Rebeca huarmiguca trabajadora, paipa huasipi shujcunatapash mingachijlla cashcata ricushpami Abrahanba sirvijca, Taita Dios paipa mañaita uyashcata cuenta japirca (Génesis 24:10-14, 21, 27).

 Abrahanba sirvij imapa chaipi cashcata yachashpami, Rebecaca Isaachuanga cazarashallami nirca (Génesis 24:57-59). Rebecaca Isaachuanga ishcai churicunatami charirca. Taita Diosca Rebecamanga nircami: ‘Esaumi Jacobta sirvishpa causanga’ (Génesis 25:23). Isaac paipa punda churi Esauta bendiciangapaj munajpica, Rebecaca Jacob chai bendicionda chasquichunmi ayudarca. Taita Dios chai bendiciongunata Jacob chasquichun munashcatami Rebecaca ali yacharca (Génesis 27:1-17).

 Rebecamandaca ¿imatata yachajunchi? Rebecaca humilde, trabajadora, shujcunata paipa huasipi mingachijlla huarmigumi carca. Shinallata ali huarmi, ali mama, Jehovatapash ali sirvij huarmigumi carca.

•  ▸ Rebecamanda ashtahuan yachangapaj munashpaca “Estoy dispuesta a ir” nishca tematami ricuita ushapangui.

  Rut

 Rutca ¿pita carca? Rutca moabita huarmigumi carca. Paipa llactata saquishpami Jehová Diosta sirvingapaj Israel llactaman rirca.

 Rutca ¿imatata rurarca? Rutca paipa suedra Noemitami ninanda juyarca. Israel llactapi na micuna tiajpimi Noemí, paipa cusandi, paipa ishcai churicunandi Moab llactapi causangapaj rirca. Noemipa churicunaca Rut, Orpá huarmicunahuanmi cazararca. Paicunaca moabitacunami carca. Huaquin huatacuna jipami Noemipa cusa, paipa churicunapash huañurca. Chaimi Noemipash, Rutpash, Orpapash viudacuna quedarca.

 Israel llactapi yarjai tucurishca cajpimi Noemica Israelman tigrangapaj decidirca. Rutpash, Orpapash Noemihuanmi Israel llactaman ringapaj munarca. Shinapash Noemica cangunapa familiapaman tigraichilla nircami. Shina nijpimi Orpaca paipa familiapaman tigrarca (Rut 1:1-6, 15). Shinapash Rutca Noemita juyaimanda, Taita Diosta sirvingapaj munaimandami Noemihuan rirca (Rut 1:16, 17; 2:11).

 Rutca paipa suedra Noemitaca ninandami juyarca. Shinallata trabajadora huarmigumi carca. Chaimi paitaca Belén llactapica alicachishpa ricun carca. Boaz jaripashmi Rutta alicachishpa ricurca. Chaimi Rutman, Noemimanbash ashtaca micunata cararca (Rut 2:5-7, 20). Asha tiempo jipaca Rutca, Boaz jarihuanmi cazararca. Rey Davidpash, Jesuspash Rutpa miraimandami llujshirca (Mateo 1:5, 6, 16).

 Rutmandaca ¿imatata yachajunchi? Rutca Noemita, Jehová Diostapash ninanda juyaimandami paipa llactata, paipa familiatapash saquishpa Israel llactaman rirca. Llaquicunapi cashpapash Rutca trabajadora, Jehová Diosta sirvij huarmigu cashcatami ricuchirca.

•  ▸ Rutmanda ashtahuan yachangapaj munashpaca “A donde tú vayas yo iré” “Una mujer excelente” nishca temacunatami ricuita ushapangui.

  Sara

 Saraca ¿pita carca? Saraca Abrahanba huarmi, Isaacpa mamami carca.

 Saraca ¿imatata rurarca? Saraca paipa cusa Abrahanman Taita Dios ima nishcata tucui shunguhuan crishpami Ur llactata saquishpa rirca. Abrahandaca Taita Diosca Ur llactamanda llujshishpa Canaán llactaman causangapaj richunmi mandarca. Taita Diosca Abrahandaca ashtaca bendiciongunatami carasha nirca. Shinallata canba familiamandami shuj jatun llactata rurasha nirca (Génesis 12:1-5). Chai punllacunapica Saraca 60 huatacunatami charishcanga. Ur llactamanda llujshishca punllamandapachami Abrahán, paipa huarmi Sarapash carpa huasicunapi causanajurca.

 Carpa huasicunapi causana peligroso cajpipash, Saraca paipa cusapa decisiondami apoyarca (Génesis 12:10, 15). Saraca huahuacunata na chari ushaimandami llaquilla causajurca. Shinapash Taita Diosca Abrahanba miraicunatami bendiciasha nishcarcami (Génesis 12:7; 13:15; 15:18; 16:1, 2, 15). Chaimi Taita Diosca Sarataca shuj huahuatami charingui nirca. Sara 90 huatacunata charimanda, paipa cusa Abrahán 100 huatacunata charimandami huahuacunata ñana chari usharca. Shinapash Taita Dios nishcashnami paicunaca shuj huahuaguta charirca (Génesis 17:17; 21:2-5). Chai huahuagupa shutica Isaacmi carca.

 Saramandaca ¿imatata yachajunchi? Sarapa causaita ricushpami Taita Diosca paipa nishcacunata pactachinlla cashcata yachajunchi (Hebreos 11:11). Shinallata Sarapa ejemplomi cunanbi huarmicunataca paicunapa cusata respetachun ayudan (1 Pedro 3:5, 6).

•  ▸ Saramanda ashtahuan yachangapaj munashpaca “Shuj juyailla huarmigumi carca” “Taita Diosmi Sarataca ‘jatun mandajcunapa mama’” nishca temacunatami yachajuita ushapangui.

 Bibliapi parlashca huarmigucunaca ima punllacunapita causarca

1.  Eva

2. Jatun manllanayai tamia punllacunapi (2370 a. e. c.)

3.  Sara

4.  Lotpa huarmi

5.  Rebeca

6.  Lea

7.  Raquel

8. Israelitacuna Egipto llactapi esclavo shina causashca punllacunapi (1513 a. e. c.)

9.  Míriam

10.  Rahab

11.  Rut

12.  Débora

13.  Jael

14.  Dalila

15.  Ana

16. Israel llactapa punda mandaj causajuj punllacunapi (1117 a. e. c.)

17.  Abigaíl

18.  Sulamita huarmigu

19.  Jezabel

20.  Ester

21.  María (Jesuspa mama)

22. Jesús causashca punllacunapi (29 e. c.)

23.  Marta

24.  María (Martapa ñaña, Lazaropa pani)

25.  María Magdalena

26. Jesús huañushca punllacunamanda (33 e. c.)