Apocalipsis 12:1-17
12 Chai jipaca, shuj jatun señalshnami jahua cielopica ricurirca. Shuj huarmigumi indishna punchapamba ropata* churajushca carca. Paica luna jahuapimi shayajurca. Umapica, shuj coronata churajushcami carca. Chai coronaca 12 estrellacunatami charirca.
2 Chai huarmiguca vijsayumi* carca. Huahuata ña ungugrijuimanda ninanda nanachishpami nanaimandaca caparita caparijurca.
3 Jahua cielopica shuj señalpashmi ricurirca. Chaipica ninashna puca puca color, shuj jatun dragondami* ricurcani. Chai dragonga 7 umacunata y 10 cachocunatami charirca. Chai umacunapica 7 coronata churajushcami carca.
4 Jahua cielopi ashtaca* estrellacunataca paipa chupahuan alatrashpami cai alpaman shitamurca. Chai dragonga, huahuata ña ungugrijuj huarmigupa ñaupapimi shayanman quidarca.* Huahua nacirishcandi ñapash micungapami, chai huarmigupa ñaupapi quidarca.
5 Chai huarmiguca shuj jari huahuagutami ungurca. Chai huahuagumi tucui llactacunataca, jirru varahuan mandanga.* Chai jari huahuagu nacirishcandimi, Taita Diosca chai huahuaguta ñapash japishpa pai mandangapaj tiarina pushtuman* aparca.
6 Huarmiguca desierto alpamanmi pacajushpa rirca. Chaipimi Taita Diosca chai huarmigumanga shuj pushtuta alistashcalla charijurca. Chaipimi chai huarmiguca mil 260 punllacunacaman micunaguta chasquina carca.
7 Shinallata jahua cielopica shuj macanajuimi tiarca. Miguelca* paipa angelcunandimi chai dragonhuan macanajurca. Chai dragonbash paipa angelcunandi shayarishpami, Miguelhuan y paipa angelcunandi macanajurca.
8 Pero paicunaca na mishaita usharcachu.* Chaimi dragonbash y paipa angelcunapash jahua cielopi cashpa catitaca ñana usharca.
9 Chaimandami chai dragonga cai alpaman shitai tucurca. Paimi pundamandapacha tiashca culebra can. Paitami Diablo y Satanás* nin. Paimi cai alpapi tucui gentecunata umachijun. Paica paipa angelcunandimi cai alpaman shitai tucurca.
10 Chaipimi jahua cielomanda shinllita cashna parlamujta uyarcani:
“Ñucanchi Taita Diosmi gentecunata salvashca. Paica poderta charishcatapashmi ricuchishca. Taita Diospa Gobiernoca ñami mandai callarishca. Taita Diospa agllashca Cristopash ñami paipa autoridadta utilizai callarishca. Ñucanchi huauquicunata tuta y punlla Taita Diospa ñaupapi juchachijujca, ñami cai alpaman shitai tucushca.
11 Paicunaca Maltun Llamapa yahuarmanda, paicuna predicashca shimicunamanda y paicunapa causaitapash* na juyashpa huañunatapash na manllaimandami mishaita usharca.
12 Chaimandami jahua cielopash y chaipi cajcunapash ninanda cushijuna capanguichi. Pero cai alpapash y mar yacucunapash, aij imachari tucunguichi. Porque Diabloca ninandapacha culirashpami quiquingunapamanga uriajumushca. Paica asha tiempotalla charishcataca alimi yachan” nircami.
13 Chai dragonga, cai alpaman shitai tucushcata cuenta japishpami, jari huahuaguta ungushca huarmigutaca llaquichingapaj catiriajurca.
14 Pero Taita Diosmi chai huarmigumanga desiertopi paipa pushtuman volashpa richun, shuj jatun aguilapa alascunata curca. Chaimi chai huarmiguca dragonmandaca carupi canga. Chai desiertopimi chai huarmiguca shuj tiempota, ishcai tiempota y medio tiempotapash* micunaguta chasquishpa causanga.
15 Chai culebraca, chai huarmigu ahogarichunmi, paipa shimimandaca ashtaca yacuta shitamurca.
16 Pero alpaca chai huarmiguta ayudangapami shamurca. Chaimi alpaca shimita pascashpa, dragonba shimimanda shitamushca yacutaca langarca.*
17 Chaimandami dragonga, chai huarmiguhuanga ninanda culirarca. Y chai huarmigupa quidashca* huahuacunahuan macanajungapami rirca. Chai quidashca huahuacunaca Taita Diospa mandamientocunata cazujcunami can. Jesusmanda villachingapaj cachashcacunapashmi can.
Notacuna
^ O “llachapata”.
^ O “vijsandimi”.
^ O “manllanai jatun jatun culebratami”.
^ Tucuilla estrellacunata quimsa grupopi dividishpa y chai quimsa grupocunamanda shuj grupo alatrai tucushcatami nijun.
^ O “saquirirca”.
^ Griego shimipica “michinga” nijunmi.
^ Griego shimipica “tronoman” nijunmi.
^ Miguel shutica ‘¿pita Taita Dioshna can?’ significadotami charin.
^ O talvez “manllanai jatun culebraca mishai tucurcami”.
^ Caipica “Taita Diospa principal enemigomanda parlashpami” shina nijun.
^ Caipica “quimsa tiempo y chaupi” nijunmi.
^ O “tragarca”.
^ Griego shimipica “puchushca” nijunmi.
