Apocalipsis 9:1-21
9 Quinto ángel paipa trompetata tocajpica, jahua cielomanda cai alpaman urmashca shuj estrellatami ricurcani. Chai estrellamanmi ucu ucu utujupa llaveta curca.
2 Chai ucu ucu utujuta estrella pascajpica, chai utujumandaca cushnimi llujshimurca. Chai cushnica jatun jornomanda llujshijuj cushnishnami carca. Chai cushnimandami indipash, airepash yana yana tucurca.
3 Chai cushnimandaca saltamonteshnalla* jurucuna llujshishpami cai alpaman shamurca. Paicunamanmi Taita Diosca cai alpapi alacranguna charishca podertallata curca.
4 Paicunataca cai alpapi jihuacunata, verdella plantacunata, yuracunata o quirucunatapash ama huaglichinguichichu nishpami Taita Diosca mandarca. Sino paicunapa frentepi ñucapa sellota na charij gentecunatallami llaquichina canguichi nishpami Taita Diosca mandarca.
5 Saltamontecunaca gentecunata huañuchingapaj autorizaciondaca na chasquircachu. Sino 5 quillacunata sufrichingapaj autorizaciondami chasquirca. Imashinami shuj alacrán picajpica gentecunaca ninanda sufrin, shinallatami chai saltamontecunaca gentecunata sufrichinajurca.
6 Chai punllacunapimi chai gentecunaca huañuita mascanga. Shinapash nimamanda na taringachu. Huañungapami munanajunga. Pero huañuica paicunamanda pacajungami.
7 Saltamontecunaca guerrapi macanajungapaj ña listo caj caballocunashnami carca. Umapica shuj oro coronatashnalla churajushcacunami carca. Paicunapa ñavicunaca gentepa ñavishnami carca.
8 Chai saltamontecunapa ajchapash huarmicunapa ajchashnami carca. Paicunapa quirupash leonba quirucunashnami carca.
9 Saltamontecunapa pechota tapana* chalecopash* jirru chalecocunashnami carca. Paicunapa alascunapash, caballocuna aisajpi guerraman calpanajun carretacunashnami ninanda bullayanajurca.
10 Saltamontecunapa chupacunapash alacranba chupacunashnami carca. Paicunapa chupacunahuan gentecunata 5 quillata llaquichingapami poderta charirca.
11 Saltamontecunaca shuj reytami charirca. Chai reyca ucu ucu utujupa angelmi can. Hebreo shimipi chai reypa shutica Abadón* nishcami can. Cutin griego shimipica Apolión* shutimi can.
12 Aij, ninan llaquicunatami charinga nishca primer shimicunaca ñami yalishca. Pero chai jipaca, aij ninan llaquicunatami charinga nishca shimicunaca ishcai viajetapash shamungarami.
13 Sexto ángel trompetata tocajpica, Taita Diospa ñaupapi tiajuj oro altarpi cachocunamandami shuj parlota uyarcani.
14 Chai parlo uyarishpaca trompetata charijuj sexto angeltaca cashnami nirca: “Éufrates jatun yacu ladopi huatarianajuj chuscu angelcunata safai” nircami.
15 Chai chuscu angelcunaca, ashtaca* gentecunata huañuchingapami safai tucurca. Paicunaca chai horaspa, chai punllapa, chai quillapa, chai huatapa alistashcacunami carca.
16 Paicunapa caballopi tiarishpa macanajungapaj rinajujcunaca 200 millongunami carca. Paicuna mashnacuna cajtaca ñucapachami uyarcani.
17 Muscuipishna ricushca chai caballocuna y chai caballocunapi tianajujcunaca cashnami carca, caballopi tianajujcunapa pechota tapangapaj jirru chalecocunaca azul color, ninashna puca y azufreshna quillumi carca. Caballopa umacunaca leonba umacunashnami carca. Paicunapa shimimandaca nina, cushni y azufremi llujshijurca.
18 Ashtaca* gentecunaca ninamanda, cushnimanda y azufremandami huañurca. Cai quimsa plagacunaca caballocunapa shimimandami llujshirca.
19 Chai caballocunaca chupapi y shimipipashmi poderta charin. Porque chupaca culebrashnami can y culebra umatapashmi charin. Chupahuanmi llaquichita ushan.
20 Pero na cai plagacunahuan huañushca resto gentecunaca, paicunapa imata rurashcacunamandaca* na arripintirircachu. Paicunaca demoniocunata adoranatapash na saquircachu. Ni orohuan, culquihuan, broncehuan, rumihuan, caspihuan rurashca santocunata adoranatapash na saquircachu. Chai santocunaca ni ricuita, ni uyaita, ni puritapash na ushanllu.
21 Chai gentecunaca huañuchishcata, brujeriata* rurashcata huainayana juchata* rurashcata, shuashcatapash na arripintirircachu.
Notacuna
^ O “langostashnalla”.
^ O “quilpana”.
^ O “corazapash”. Caitaca pechopi ama imapash chayachunmi soldadocunaca churajun carca.
^ Caipica “tucuchitapacha tucuchina” nijunmi.
^ Caipica “tucuchitapacha tucuchidor” nijunmi.
^ Tucuilla gentecunata quimsa grupopi dividishpa y chai quimsa grupocunamanda shuj grupota paicuna huañuchishcatami nijun.
^ Tucuilla gentecunata quimsa grupopi dividishpa y chai quimsa grupocunamanda shuj grupo huañushcatami nijun.
^ Griego shimipica “paicunapa maquihuan rurashcacunamandaca” nijunmi.
^ O “espiritismota”. Glosariopi “espiritismo” shimita ricupangui.
^ Griego shimipica “pornéia” nijunmi. Glosariopi “huainayana jucha” shimita ricupangui.
