Efesios 1:1-23
1 Ñucaca Pablomi capani. Taita Diospa voluntadmandami Cristo Jesuspa apóstol* capani. Cristo Jesusta ali catinajuj Éfeso llactapi Taita Diospa separashcacunamanmi* cai cartataca cashna escribijupani,
2 ñucanchi Taita Diospash y Señor Jesucristopash quiquingunata ninanda juyachun* y quiquingunaman tranquilo ali causaigutapash carachunmi munapani.
3 Taita Diosca alabashca cachun. Paica ñucanchi Señor Jesucristopa Taitami can. Cristopa* discipulocuna cajpimi, Taita Diosca paipa espíritu santomanda* jahua cielopica, tucui clase o tucui laya bendiciongunata ñucanchimanga carashca. Chaimandami Taita Diosca alabashca cana can.
4 Cristohuan shujllashna cachunmi, Taita Diosca ñucanchitaca cai mundo* nara tiai callarishcamandapacha agllarca. Chaimi ñucanchica juyashcata ricuchina capanchi. Shinallata paipalla separadomi cana capanchi y paipa ñaupapipash pecado illami cana capanchi.
5 Jesucristomandami Taita Diosca paipa propio huahuacuna tucuchun ñucanchitaca adoptangapaj pundatallata agllarca. Chaitaca pai gushtashcashna, pai munashcashnami shina rurarca.
6 Taita Diosca gentecuna paita alabachun munashpami, paipa juyashca Churita utilizashpa ñucanchita ninanda juyashcataca* ricuchirca.
7 Paipa Churimi paipa yahuarhuan pagashpa ñucanchitaca randirca. Chaimi ñucanchica libre capanchi. Ari, Taita Dios ninanda juyashcamandami* ñucanchica pecadocunamanda perdonai tucunchi.
8 Taita Diosca ñucanchitaca ninandami juyashca.* Ali yachajushca canatapash, ali pensamientocunatapashmi ñucanchimanga ashtacata cushca.
9 Shinami Taita Diosca pacalla secretopi* charishca paipa voluntadtaca ñucanchicunaman rijsichirca. Chai secretoca paipa shungupica alimi ricurin. Paillatami chashnata decidishca.
10 Pai agllashca tiempo pactamujpimi, paica cosascunataca arreglanga.* Shinami paica jahua cielopi y cai alpapi tiashca tucuilla cosascunata Cristopa ñaupapi tandachinga. Ari, Cristopa ñaupapimi tandachinga.
11 Paihuanga shujllashnami capanchi. Taita Diosca ñucanchiman imata prometishcata ñucanchi chasquichunmi ñucanchitaca agllarca. Pai munashcashnami ñucanchitaca ña pundamandallata agllarca. Porque Taita Diosca, paipa voluntadta catishpami tucuita ruran.
12 Ñucanchimanda Taita Dios alabai tucuchunmi ñucanchica primero Cristopi cri callarircanchi.
13 Cabal yachachishca, ali villaicunata uyashca jipami, quiquingunapash Cristopi crircanguichi. Chai ali villaicunaca quiquingunata Taita Dios salvanatami villajun. Shinallata Cristomandami, crishca jipaca Taita Dios prometishca espíritu santohuan sellai tucurcanguichi.
14 Taita Diospa espíritu santoca, Taita Dios ñucanchiman imata prometishcata ñucanchicuna chasquinapacha* cashcatami ricuchijun. Taita Diosca, ninanda alabai tucungapami paipa llacta libre quidachunga* shuj preciota pagarca.
15 Señor Jesuspi quiquinguna crishcata y Taita Diospa separashcacunata quiquinguna juyashcatami ñucapash uyarcani. Chaimi chaita uyashca punllamandapacha
16 quiquingunamanda Taita Diosta agradicinataca na saquishcani. Quiquingunamandaca Taita Diosta mañashpami catipani.
17 Ñucanchi Señor Jesucristopa Taita Diosca quiquinguna ali yachajushca cachun y pai imata villashcatapash intindi ushachunmi, quiquingunaman poderta carachun munapani. Shinami quiquingunaca paimanda cabalta yachajunguichi. Taita Diosca ninan podertami charin.
18 Paimi quiquingunaman ima esperanzata cushcata yachachun y paipa separashcacunaman ima bendiciongunata herenciatashna caranata yachachun quiquingunapa ñavita* punchayachishca.
19 Shinallata, ñucanchicuna paipi crijpimi, ñucanchicunaman ninan poderta ricuchishcata yachachun shina rurarca. Paipa ninan podertaca, paipa ninan poderhuan rurashcacunapimi ricunalla can.
20 Chai ninan poderhuanmi paica Cristota huañushcacunapuramanda causachirca.* Shina causachishpami, jahua cielopica paipa ali ladopi churarca.
21 Ashtahuangarin cai punllacunapi* y shamuj punllacunapi tucui gobiernocunata, autoridadcunata, mandajcunata, reycunata y shuj importante gentecunatapash yali cachunmi paitaca churarca.
22 Shinallata Taita Diosca tucui cosascunata mandana autoridadtami Cristomanga curca.* Congregacionbipash* tucuipi umashna ñaupaman pushachunmi paitaca churarca.
23 Congregacionga Cristopa cuerposhnami can y paimi tucui ima minishtirishcataca cun. Y paimi tucui cosascunata tucuipi completan.
Notacuna
^ Glosariopi “Taita Diospa separashcacuna” shimita ricupangui.
^ Glosariopi “bondad inmerecida” shimita ricupangui.
^ O “Mesiaspa”, “Taita Dios agllashcapa”.
^ O “Taita Diosca paipa podermanda”. Glosariopi “espíritu santo” shimita ricupangui.
^ Caipica “Adán y Evapa huahuacunamandami” parlajun.
^ Glosariopi “bondad inmerecida” shimita ricupangui.
^ Glosariopi “bondad inmerecida” shimita ricupangui.
^ Glosariopi “bondad inmerecida” shimita ricupangui.
^ O “secreto sagradopi”. Glosariopi “secreto sagrado” shimita ricupangui.
^ O “cosascunataca administranga”.
^ O “callari pagota, adelantota chasquinapacha”, “prendashpa saquishcata chasquinapacha”.
^ O “saquirichunga”.
^ Griego shimipica “shungupa ñavicunata” nijunmi.
^ Griego shimipica “jatarichirca” nijunmi.
^ Glosariopi “cai tiempo” shimita ricupangui.
^ Griego shimipica “paipa chaqui ucupi churarca” nijunmi.
^ Glosariopi “congregación” shimita ricupangui.
