Hechos 12:1-25
12 Chai tiempocunapillatami rey Herodesca* congregacionbi huaquin huauquicunata llaquichi callarirca.
2 Paimi paipa soldadocunataca, Juanba huauqui Santiagota espadahuan huañuchichun mandarca.
3 Judiocunaca Santiagota huañuchijpica cushijurcami. Chaimi Herodesca Pedrota prezo japingapaj rirca. Chaica Levadura Illa Tandata Rurana Fiesta* punllacunapimi shina pasarca.
4 Herodesca Pedrota carcelpi churashpami, paita vigilachunga chuscu turnocunata churarca. Chaimi soldadocunaca chuscupura turnarishpa Pedrotaca vigilanajurca. Herodesca Pascua* Fiesta jipami Pedrotaca gentecunapa ñaupaman apashpa juzgangapaj munajurca.
5 Chaimi Pedrotaca carcelpi vichashpa* saquirca. Chaicamanga congregacionbi huauquipanicunaca tuta y punllami Taita Diostaca Pedromanda tucui shunguhuan mañanajurca.
6 Pedrota gentecunapa ñaupaman apangapaca shuj punlla faltarcarami. Chai tutaca ishcai soldadocunaman cadenacunahuan huatai tucushcami Pedroca puñujurca. Guardiacunaca cárcel pungutapashmi vigilanajurca.
7 Shinapash, cungashcapimi Jehová* Diospa shuj angelca ñapash chaipi ricurirca. Y Pedro vichariajushca ucuca punchapambami brillarca. Chai angelca Pedrota huasha lomopi tacarishpami, cashna nishpa rijchachirca: “Ucha jatari”. Chai ángel shina nijpica, paipa maquimanda cadenacunaca urmarcallami.
8 Chai jipami angelca Pedrotaca nirca: “Uchalla segurarishpa, sandaliatapash churajui”. Shina nijpimi Pedroca ángel imata nishcata rurarca. Jipamanga chai angelca caitapashmi nirca: “Canba jahualla churajunata churajushpa ñucata catihuai” nishpa.
9 Chai ángel shina nijpimi, Pedroca angelta catishpa llujshirca. Shinapash ciertopacha shina pasajujtaca Pedroca na cuenta japircachu. Chai ángel imata rurajujtaca muscuitami muscujuni yarcami.
10 Paicunaca primer grupo guardiacunatapash, segundo grupo guardiacunatapash yalishpami, llactaman llujshina jirru punguman chayagrirca. Chai punguca pascarircallami. Chaimi Pedropash, angelpash llujshishpa ñanda catishpa rinajurca. Chaipimi angelca ñapash chingarca.
11 Chai ratomi Pedroca ima pasashcata cuenta japishpa cashna nirca: “Jehová* Diosmi paipa angelta cachamushpa, Herodespa maquimandapash, judiocuna ñucata ima pasachun munashcamandapash salvahuashca. Cunanmi chaitaca seguro cani” nirca.
12 Chaita cuenta japishca jipami Pedroca, Mariapa huasiman rirca. Mariaca Marcos nishpa rijsishca Juanba mamami carca. Mariapa huasipimi tauca discipulocuna tandanajushpa Taita Diosta mañanajurca.
13 Punguta huactachijpica, Rode shuti sirvienta joven huarmigumi pi cajta ricungapaj punguman rirca.
14 Pedro cajta uyashpami, paica ninanda cushijushpa punguta pascanapa randica, Pedromi pungupi shayajun nishpa villangapaj ucuman calparca.
15 Chaimi discipulocunaca ninajurca: “¿Ciertotapachachu nijungui?” nishpa. Ciertotamari nijuni nishpa cutin cutin nijujpimi paicunaca cashna nirca: “Shuj angelmi* canga” nishpa.
16 Chaicamanga punguta huactachishpami Pedroca shayajurca. Paicuna punguta pascangapaj rishpaca, Pedro cajta ricushpami ninanda manllarinajurca.
17 Pedroca paicuna upalla cachunmi maquihuan señasta rurarca. Paicunamanga, carcelmanda llujchingapaj Jehová* Dios imata rurashcatami tucuita parlarca. Chai jipami paicunataca nirca: “Ima pasashcataca Santiagoman y shuj huauquicunamanbash villapanguichi” nishpa. Shina nishca jipaca chaimanda llujshishpami shuj pushtuman rirca.
18 Ña punllayajpica, Pedrohuan ima pasashcata na yachashpami, carcelpi soldadocunaca ashta bullayanajurca.
19 Herodesca ali ali mascashpapash Pedrotaca na tarircachu. Chaimi guardiacunata tapushca jipaca, guardiacunataca castigachun mandarca. Chai jipami Herodesca Judea llactamanda Cesarea llactaman urai rirca. Chaipimi asha tiempota quidarca.*
20 Herodesca Tiro y Sidón llactamanda gentecunahuanga culirami carca.* Chai llactacunamanda gentecunaca, Herodes mandajuj llactacunapimi micunataca randin carca. Chaimi paicunaca shujlla yuyai tucushpa, rey Herodespa huasita cuidaj Blasto shuti runagutaca, rey Herodeshuan parlangapaj ayudahuai nishpa rogangapaj rirca. Shinami paicunaca, ali tucungapami munapanchi nishpa rey Herodeshuan parlarca.
21 Chai punlla chayajpica, reycuna churajuna ropata* churajushpami Herodesca juzgana asientopi tiarishpa parlai callarirca.
22 Chaimi chaipi tandanajushca gentecunaca cashna nishpa caparinajurca: “Genteca na parlajunga, diosmari parlajun”.
23 Gentecuna shina nijhuanmi, Jehová* Diospa shuj angelca Herodesman shuj unguita cachamurca. Taita Diosta na alabaimandami Herodesca shina pasarca. Ashtahuangarin jurucuna micujpimi paica huañurca.
24 Jehová* Diospa shimita ashtahuan villachinajujpimi, ashtaca mushuj discipulocuna mirashpa catinajurca.
25 Jerusalén llactapi huauquipanicunata ayudashca jipami, Bernabé y Sauloca Juanda pushashpa Antioquía llactaman tigramurca. Juandaca Marcos nishpapashmi rijsin carca.
Notacuna
^ Caipica “Herodes Agripa I” nijunmi.
^ Glosariopi “Levadura Illa Tandata Rurana Fiesta” shimita ricupangui.
^ Glosariopi “Pascua Fiesta” shimita ricupangui.
^ O “vichicashpa”.
^ Griego shimipica “paipa angelmi” nijunmi.
^ O “saquirirca”.
^ O “macanajungapami munajurca”.
^ O “llachapata”.
