Hechos 23:1-35
23 Sanedrín nishcacunata ali ali ricushpami Pabloca cashna nirca: “Huauquicuna, Taita Diospa ñaupapica imapash nalitaca na rurashcanichu. Cunangamanga ñuca concienciaca limpiomi can”.
2 Pablo shina nijta uyashpami, sacerdote principal* Ananiasca, Pablopa ladopi shayanajujcunataca Pablota shimipi huactashpa saquichi nirca.
3 Chaimi Pabloca nirca: “Llulla runa* candami Taita Diosca shimipi huactanga. ¿Leyta* catishpami juzgani nishpapash, chai Leytallata na cazushpami ñucataca shimipi huactachun mandajungui?”.
4 Shina nijpimi, Pablopa ladopi shayanajujcunaca paitaca nirca: “¿Taita Diospa sacerdote principaltachu shina rimajungui?”.
5 Chaimi Pabloca nirca: “Huauquicuna, pai sacerdote principal cashcataca na yachapashcanichu. Taita Diospa shimipica nijunmi: ‘Canba llactapi mandajcunataca maijandapash na ricunayachishpaca na rimajunachu cangui’ nishpa”.
6 Pabloca huaquinguna saduceocuna y fariseocuna cajtaca alimi yacharca. Chaimi Sanedrinbica cashna nishpa caparirca: “Huauquicuna, ñucaca fariseomi capani. Fariseocunapa churimi capani. Huañushcacuna causarinata crishcamandami ñucataca juzgahuanajun”.
7 Chaimi fariseo partecunaca, saduceo partecunahuan pliturishpa ishcai grupopi separarirca.
8 Saduceocunaca huañushcacuna causarijtaca na crinllu carca. Ni angelcunapi, ni espiritupipash* na crinllu carca. Pero fariseocunaca chaicunapica crinmi carca.
9 Shinamandami paicunapura ninanda caparirinajurca. Chaimi fariseocunata catij Leyta yachachij huaquin runacunaca, culirata cashna ni callarirca: “Cai runa ima nalita rurashcatapash na tarinchichu. ¿Nacha shuj espíritu o shuj ángel paitaca ciertopacha parlashca?”
10 Ashtahuan ushashcata* pliturinajujta ricushpami, soldadocunapa comandanteca Pablotaca huañuchingallami yashpa manllarirca. Chaimi soldadocunataca, Pablota chaimanda llujchishpa, soldadocunapa cuartelman apachun mandarca.
11 Pero chai tutallatami Jesusca Pablopa ladopi ricurishpa paitaca cashna nirca: “Ama manllaichu. Porque imashinami Jerusalén llactapi ñucamanda aliguta* intindichircangui, shinallatami Roma llactapipash aliguta intindichina cangui” nirca.
12 Ña punllayajpimi judiocunaca Pablota huañuchishun nishpa paicunapura parlarirca. Paicunaca juramentushpami, Pablota huañuchingacamanga nimata na micushunllu, nimata na ufiashunllu ninajurca.
13 Más de 40 jaricunami, shina nishpa juramentunajurca.
14 Chai jipallami importante sacerdotecunapaman y llactapi autoridadta charijcunapamanbash rishpa judiocunaca cashna ninajurca: “Ñucanchica, Pablota huañuchingacamanga nimata na micushunllu, nimata na ufiashunllu nishpami juramentushcanchi.
15 Shinaca cangunapash y Sanedrín nishcacunapash Pablota aliguta tapungapami munanchi nij tucunshnallami comandantehuanga parlagrina canguichi. Chaimi Pablota cangunapaman apamunajujpica, Pablo nara chayamujpillata, paita huañuchingapaca listo chapanajushun” nirca.
16 Shinapash, Pablopa panipa churica, Pablota huañuchingapaj munanajujta yachaj chayashpami, soldadocunapa cuartelman rishpa Pabloman villarca.
17 Chaimi Pabloca, soldadocunapa shuj capitanda* cayashpa cashna nirca: “Cai joven huambragutaca, soldadocunapa comandantepaman apapai. Paica shuj villanagutami charin”.
18 Shina nijpimi capitanga chai joven huambragutaca comandantepaman apashpa cashna nirca: “Prezo tiajuj Pablomi ñucata cayashpa, cai joven huambragutaca quiquinbaman pushapai nihuarca. Quiquinman imatachari villanatami charin” nircami.
19 Chaimi comandanteca, chai joven huambragutaca maquimanda japishpa, shuj ladoman aparte apashpa tapurca: “¿Imatata villahuana cangui?”.
20 Shina nijpimi chai joven huambraguca nirca: “Judiocunaca, Pablota aliguta tapungapami munanchi nij tucunshnallami cayapaca, Pablota Sanedrinman apamuchun ningapaj de acuerdo quidashca.*
21 Shina ningapaj shamujpica, paicuna imata nishcataca ama cripanguichu. Porque paicunaca Pablota japishpa huañuchingapaca, ñami más de 40 yali jaricunata listo charinajun. Paicunaca, Pablota huañuchingacamanga nimata na micushunllu, nimata na ufiashunllu nishpami juramentushca. Ashtahuangarin paicunaca quiquin ordenachunllami shuyanajun”.
22 Shina nishca jipami soldadocunapa comandanteca, chai joven huambragutaca cashna nishpa cacharca: “Ñucahuan imata parlashcataca pimanbash na villanachu cangui”.
23 Chai jipami comandanteca ishcai capitangunata cayachun cachashpa cashna nirca: “Cazi las 9 de la nocheta Cesarea llactaman ringapaca, 200 soldadocunata alistanguichi. Shinallata, caballopi tiarishpa richun 70 soldadocunata, lanzacunahuan 200 soldadocunatapash apashpa ringuichi.
24 Pablota apashpa ringapapash caballocunata alistanguichi. Shinami paitaca Félix shuti gobernadormanga alita entregai ushashun” nishpa.
25 Chaimi cashna nishpa shuj cartata escribirca:
26 “Claudio Lisias ñucami, quiquin Felixman escribijupani. Quiquinga Judea llactapi respetashca gobernadormi capangui. Quiquindami saludapani.
27 Judiocunami cai runata japishpa ña huañuchigrinajushcarca. Pero pai romano cajta yachaj chayashpami ñucaca, chai rato ñucapa soldadocunahuan rishpa paitaca salvarcani.
28 Cai runata imamanda culpanajushcata yachangapaj munashpami, paicunapa Sanedrinman aparcani.
29 Judiocunaca paicunapa Leypa contrami cai runaca yachachijun nishpami culpanajurca. Pero cai runa carcelpi churai tucunata o huañuchi tucuna sentenciata charinataca ñucaca na ricushcanichu.
30 Pero huaquin judiocuna paita huañuchingapaj ña parlarishcalla cajtami yachaj chayarcani. Chaimi ñucaca cai runataca uchalla quiquinbaman cachamujupani. Shinallata, paita culpanajuj judiocuna imacunamandalla culpanajushcata quiquinman ricuchichunmi paicunataca mandashcani” nircami.
31 Chaimi soldadocunaca comandante mandashcata cazushpa Pablotaca Antípatris llactaman tuta apashpa rirca.
32 Cayandi punllaca, caballopi purij soldadocuna Pablota apashpa richun saquishpami, chaishuj soldadocunaca paicunapa cuartelman tigrarca.
33 Caballopi purij soldadocuna Cesarea llactaman chayashpaca, gobernadormanmi cartataca entregarca. Pablotapashmi paipa ñaupaman pusharca.
34 Chaimi gobernadorca chai cartata liirca. Liishca jipaca maijan provinciamandata cangui nishpami Pablotaca tapurca. Chaimi Pabloca Cilicia llactamandami capani nirca.
35 Shina nijpimi gobernadorca cashna nirca: “Canda culpanajujcuna chayamujpimi, quiquin imatalla nijtaca uyasha”. Chai jipami gobernadorca Herodespa palacio huasipi Pablota prezo charishpa catichun mandarca.
Notacuna
^ Glosariopi “sacerdote principal” shimita ricupangui.
^ O “yurajta pintashca pirca”.
^ Caipica “Moisesman Cushca Leymandami” parlajun.
^ O “pudishcata”.
^ O “cabalta”.
^ Soldadocunapa capitanga 100 soldadocunata mandaj romano soldadomi carca.
^ O “saquirishca”.
