Romanos 2:1-29
2 Shinaca, quiquinbash chaicunatallata rurajushca jahua shujcunata criticajuna derechotaca na charinguichu. Porque shujcunata shina criticajushpaca, quiquinllatami condenarijungui.
2 Taita Dios tucuita aliguta ricushpa juzgajta y chai cosascunata rurajcunata Taita Dios juzgajtapash alimi yachapanchi.
3 Quiquinbash chaicunatallata rurajushca jahuapash shujcunata criticajushpaca ¿Taita Dios quiquinda juzgajpica libre quidasha* yajunguichu?
4 Taita Dios ali shungu cajta, pacienciata charijtaca ¿nachu yachangui? Quiquinda llaquimanda quiquin arripintirichun ayudangapaj munashcataca ¿nachu cuenta japingui?
5 Pero quiquinga nimamanda na intindingapaj munajmi cangui. Arripintiringapaj munaj shungutapash na charinguichu. Chaimi aliguta ricushpa Taita Dios juzgana punllapica, castigai tucungui.
6 Paica cada uno imata rurashcata ricushpami, cada unoman imata cuna cashcata cunga.
7 Alipi churai tucungapaj, respetai tucungapaj, na ismuna cuerpota charingapaj munaimanda alita rurashpa catijcunamanga para siempre causanatami Taita Diosca cunga.
8 Pero ninanda culirashpa, ima cierto cashcata na cazushpa nalita rurajcunamanga, Taita Diosca pai ninanda culirashcatami ricuchinga.
9 Nalita rurajcunaca judiocuna cashpa o griegocuna* cashpapash, cada unomi ashtaca llaquicunata charinga.
10 Pero alita rurajcunataca Taita Diosmi alipi churanga. Taita Dioshuan ali canatapashmi paicunaca charinga. Chaitaca, primeroca judiocunaman, jipamanga griegocunamanmi Taita Diosca cunga.
11 Porque Taita Diospaca, tucuicunami igual capanchi.
12 Shinaca, Taita Diospa leyta na rijsishpa pecadota rurajcunaca, leyta na rijsishpallatami huañunga. Pero Taita Diospa leyta rijsishpata pecadota rurashcacunaca, chai leypi nishcashnami juzgai tucunga.
13 Porque Taita Diospa leyta uyajcunaca na Taita Diospa ñaupapica sin culpa justocuna ricurinllu. Sino Taita Diospa leyta pactachijcunami Taita Diospa ñaupapica sin culpa justocuna ricurin.
14 Na judío gentecunaca Taita Diospa leycunata na rijsishpapashmi chai leycunapi imata nishcataca ruran. Shinallata, chai leycunata na rijsishpapashmi, chai leycunataca paicunapa shungupi charin.
15 Paicunapa ruraicunahuanmi Taita Diospa ley paicunapa shungupi escribishcashna tiajujtaca ricuchin. Shinallata, paicunapa concienciapashmi, alita o nalita ruranajushcataca cuenta japichin. Shinami paicunapa pensamientocunallata paicuna culpata charishcata o na culpata charishcataca cuenta japichun ayudan.
16 Ñuca nijushca shimicunaca, gentecuna pacalla imata pensajta, pacalla imata rurajta Taita Dios juzgana punllapimi shina pasanga. Chai punllapi juzgachunga, Jesucristotami Taita Diosca churashca. Caicunaca, ñuca villajushca ali villaicunapi nishcashnami pasanga.
17 Quiquingunapuramanda huaquingunaca, judiomi canchi ninajunguichimi. Shinallata, leyta charishpallata suficientemi can nishpami pensanajunguichi. Taita Dioshuanbash alimi canchi nishpami jariyanajunguichi.
18 Quiquingunaca Moisesman Cushca Leyta yachajushcamandami, quiquinguna imata rurachun Taita Dios munashcatapash, ima ali cajtapash ali yachanguichi.
19 Quiquingunaca, ñausacunaman maita rina ñanda ricuchijcunami canchi ninguichimi. Amsapishna cajcunapapash, michagushnami canchi ninajunguichimi.
20 Juizu illa gentecunatapash intindichishunlla yanguichimi. Huahuacunatapash yachachishunlla yanguichimi. Quiquingunaca, Leypi tianajun minishtirishca y cabal yachachishcacunatapash ashagutalla intindimandami shina ninguichi.
21 Shinaca, shujcunaman yachachijushpaca ¿imashpata imata yachachijushcataca na pactachinguichi? “Na shuanachu canguichi” nishpami predicanguichi. Shinaca ¿imashpata shuanguichi?
22 Shinallata, “cazarashca jahuaca na shujhuan pecadopi urmanachu canguichi” nishpami villachinguichi. Shinaca ¿imamandata cazarashca jahua shujhuan pecadopi urmanajunguichi? Shinallata, santocunataca millanayachinimi ninguichimi. Shinaca ¿imashpata templocunamandaca shuanajunguichi?
23 Quiquingunaca, Taita Diospa leyta yachanchimi nishpami jariyanajunguichi. Shinaca ¿imashpata Leypi nishcata na pactachishpa Taita Diosta pingaichinajunguichi?
24 Taita Dios escribichishca shimipi nishcashnami, “cangunapa culpamanda na judío gentecunaca, Taita Diospa shutimanda nalicunata rimanajun”.
25 Circuncisión* nishcata rurana sirvichunga, leypi nishcatami cazuna canguichi. Pero leypi nishcata na cazushpaca, circuncisionda rurashca cashpapash, circuncisiondaca nunca na rurashca cuendami canguichi.
26 Shinaca, pipash circuncisión nishcata na rurashca cashpata, Leypi ima nishcata cazujpica ¿nacha Taita Diosca circuncisionda rurashcata cuenda paitaca ricunga?
27 Quiquingunaca circuncisionmanda y Leymandapash ñami yachajushcanguichi. Pero imata yachajushcataca na pactachinajunguichichu. Chaimi, circuncisionda na rurashca cashpapash, leypi ima nishcata pactachijuj runaca, quiquingunataca nalipi quidachinga.*
28 Pipash, “ñucaca judiomi cani” nijuimandallaca na ciertopacha judío canllu. Ciertopacha circuncisionda rurashca canaca, na aichapillachu rurashca cana can.
29 Ciertopacha judioca, paipa shungu ucupimi judío can. Shinallata, shungu ucupi circuncisionda rurashca canaca, espíritu santomandami can. Y na Leypi nishcata catimandallachu can. Chaita ruraj gentecunataca, gentecunallataca na alabanllu. Sino Taita Diosmi alaban.
Notacuna
^ O “saquirisha”.
^ Caipica “griego shimita parlaj na judiocunamandami” parlajun.
^ Glosariopi “circuncisión” shimita ricupangui.
^ O “nalipi saquichinga”.
