Taita Diosmanda villajcunamandaca ¿imatata yachajupanchi?
Ashtaca huatacuna huashamanga Taita Diosca paipa shimicunata gentecunaman villangapami paipa villaj gentecunata utilizarca. Taita Diospa villashca shimicunapica Taita Dios ñucanchita Bendiciachun imata rurana cashcatami ricuchijun. Cunanga Taita Diosmanda quimsa villajcuna imata nishcata ricupashunchi.
ABRAHÁN RUNAGU
Taita Diosca pitapash ñavita ricushpaca na chasquinllu. Taita Diosca tucuicunatami bendiciangapaj munan.
Taita Diosca Abrahán runagumanga “canmandami, cai pachapi causanajuj tucuilla familiacunaca bendiciai tucunga” nircami (Génesis 12:3).
¿Imatata yachajupanchi? Taita Diosca ñucanchicunataca ninandami juyan. Taita Diosca paita cazuj tucui familiacunata bendiciangapami munan.
MOISÉS RUNAGU
Llaquij Taita Diosca paita rijsingapaj munaj gentecunatami bendician.
Milagrocunata rurai ushachunmi Taita Diosca Moisesman poderta curca. Milagrocunata rurai ushashpapash Moisesca Taita Diostaca “canda rijsishpa cambaj ñavipi ali ricuringapaj, cunanda cambaj ñanda ricuchihuai” nishpa mañarca (Éxodo 33:13). Moisés mañashcashnami Taita Diosca Moisesmanga ali yachaita charichun ayudarca. Shinallata Taita Diosca paimanda ashtahuan yachajuchunmi Moisestaca ayudarca. Shinaca Taita Dios ‘llaquij, juyaj’ cashcatami Moisesca yachajurca (Éxodo 34:6, 7).
¿Imatata yachajupanchi? Taita Dios tucui ñucanchicunata bendiciachunga paimandami ashtahuan yachajungapaj esforzarina capanchi. Bibliapica Taita Diosta imashina alabana cashcata, pai ñucanchita imashina bendiciangapaj munashcatami yachachin.
JESÚS
Ungüicunata charij gentecunata llaquimandami Jesusca paicunataca jambirca.
Jesusmanda yachajujpica Taita Diosca ñucanchitaca ninandami bendicianga.
Bibliapica Jesuspa causaimanda, Jesuspa yachachishcacunamandami yachachin. Milagrocunata rurai ushachunmi Taita Diosca Jesusman poderta curca. Chaimandami Jesusca ciegocunata, sordogucunata, suchucunata jambita usharca. Ashtahuanbash huaquin huañushca gentecunatami causachirca. Jesús shina rurashpami Taita Dios jipa punllacunapi imata ruragrinata ricuchijurca. Chai bendiciongunata chasquingapaj imata rurana cashcatami Jesusca yachachirca. Paica “na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nircami (Juan 17:3).
Jesusca llaquij, juyajmi carca. Jesusca “ñuca yachachishcataca, yugota aparinshna yachajuichi. Ñucallami, na ñapash fiñarij, jariyanata na yarij shunguta charini. Ñucamandami cangunapaj almaca, samanata taringa” nircami. Chaimandami jari cashpa o huarmi cashpapash tucuicuna Jesusta catirca (Mateo 11:29). Jesuspa punllacunapi huaquin jaricunaca huarmigucunataca nalimi tratan carca. Pero Jesusca tucui huarmigucunatami juyaihuan, respetohuan tratarca.
¿Imatata yachajupanchi? Jesusca tucui gentecunata ninandami juyan carca. Shina rurashpami Jesusca shujcunata juyaihuan tratana cashcata yachachirca.
JESUSCA ¿TAITA DIOSCHU CAN?
Bibliapica “shujlla Taita Diosmi tian” nishpami yachachin. Shinallata Jesús Taita Diospa villaj cashcatami yachachin (1 Corintios 8:6). Jesusca Taita Diosca ñucamanda yalimi can nishpami yachachirca. Shinallata Taita Dios Jesusta cai alpaman cachamushcatami nirca (Juan 11:41, 42; 14:28). a
Cai temacunata ashtahuan liipai
BIBLIAPA TAPUICUNA
¿Jesusca tucui ushaita charij Taita Dioschu can?
Taita Diospa ñaupapi pai imasha cashcata parlashpaca Jesusca ¿imatata nirca?
