Jesusca “Ninan Manllanai Llaqui Punllacuna” shamunatami villarca. Chai punllacunaca ñallapachami shamunga. Chai punllacunapica shuj terremoto cuendami ninanda llaquichinga (Mateo 24:21). Chai llaqui punllacunamanda salvaringapaca ¿imatata ruraita ushapanchi?

Mateo 5-7 capitulocunapimi Jesusca imata ruranata yachachirca. Chaipica: “Taita Diospa [Gobiernotara, NM ], imagutapash [alita] rurashpa causanatarami, pundaca mascana canguichi” nishpami yachachirca (Mateo 6:33). Shina nishpaca Jesusca ¿imatata yachachingapaj munarca?

“Taita Diospa [Gobiernotara, NM ]” pundapi mascapashunchi. Caica tucui cosascunamanda yali Taita Diospa Gobiernotara pundapi churana cashcatami ningapaj munan (Mateo 6:25, 32, 33). Cai mundopi tiashca problemacunata gentecuna tucuchingapaj munajpipash na ushashcachu. Chai problemacunataca Taita Diosllami tucuchita ushan. Chaimandami Taita Diospa Gobiernotara pundapi churana capanchi.

‘Imagutapash [alita] rurashpa causanatara mascapashunchi’. Shina nishpaca Taita Diospa mandashcacunata, consejocunatapash cazunatami ningapaj munan. Shinaca ima ali cashcata o ima nali cashcata ñucanchillata decidishpaca, ñucanchillatami llaqui apashun (Proverbios 16:25). Cutin Taita Diospa nishcacunata cazushpaca, Taita Diostaca ninandami cushichishun. Shinallata alimi causashun (Isaías 48:17, 18).

Jesusca ¿imamandata ‘Taita Diospa [Gobiernotara, NM], imagutapash [alita] rurashpa causanatara’ pundapica mascana canguichi nirca? Huaquin gentecunaca ashtaca culquita charishpami ashtahuan seguro causaita  ushanchi yashcamandami Jesusca shina advirtirca. Cutin huaquingunaca familiata mantiningapaj nishpami trabajashpalla yalin. Chaimandami Taita Diospa Gobiernota mascashpa, pundapi churangapapash tiempotaca na charin (Mateo 6:19-21, 25-32).

Shinapash Taita Diospa Gobiernota apoyajcunaca ashtaca bendiciongunatami cunanbi y shamuj punllacunapipash chasquinga nishpami Jesusca nirca (Mateo 6:33).

Jesuspa punda catijcuna Taita Diospa Gobiernota, imagutapash alita rurashpa causanatara mascashca cashpapash, cai mundopi tiashca llaquicuna tucurijtaca na ricurcachu. Shinapash ashtaca llaquicunamandami jarcarirca. ¿Imamandata shina nipanchi?

Paicunaca Jehová Diospa nishcacunata cazushcamandami, chaishuj gentecunashnaca na llaquita charirca. Shinallata paicunaca Taita Diospa Gobiernopi crishcamandami, shuj shuj llaquicunata mishai usharca. Chaimandami paicunaca chai llaquicunataca ‘Taita Dios ninan ushaita’ carajpi aguantai usharca (2 Corintios 4:7-9).

Jesuspa punda catijcunaca, Jesuspa nishcacunata cazushpami Taita Diospa Gobiernota pundapica churarca. Chaimandami Taita Diospa Gobiernomanda gentecunaman villachirca (Colosenses 1:23). Shinaca pipash cunanbica ¿paicunashna villachinajushcachu?

Ari, villachinajushcami. Testigo de Jehovacunaca Taita Diospa Gobierno cai mundopi tiashca tucui llaquicunata ñallapacha tucuchinataca alimi yachan. Chaimandami paicunaca Jesuspa mandashcata pactachingapaj esforzarin. Jesusca nircami: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nishpa (Mateo 24:14).

Chai ali villaigucunata uyashpaca quiquinga ¿imata ruragripangui? Chaipaca punda tiempopi Macedonia llactamanda Berea nishca llactapi gentecuna imata rurashcatallata rurachunmi animapanchi. Paicunaca apóstol Pablo Taita Diosmanda villachijpi ‘ninanda cushijushpami uyanajurca’. Shinallata ““¿Dios escribichishca Shimipipash, shinallatachu nijun?” nishpa, punllandi aliguta mascashpa leyinajurca”. Shina rurashpami paicunaca chai yachajushcataca pactachinajurca (Hechos 17:11, 12).

Quiquinbash Taita Diospa Gobiernotara, imagutapash alita rurashpa causanatara pundapi churashpaca, cunan punllacunapillata, shamuj punllacunapipashmi ali causaiguta charita ushapangui.