ASHTACA ashtaca huatacunatami Bibliata na cringapaj munajcunaca Daniel libropi parlashca rey Belsasarca nimahora na tiashcachu ninajushca (Dan. 5:1). Paicunaca, arqueologocuna chai reymandaca imatapash na tarishcachu nishpami shina nishca. Shinapash 1854​pi ima pasashcata ricupashun.

1854​pica Gran Bretaña llactamanda cónsul John Taylormi Bibliapi parlashca Ur llactapi allashpa arcilla alpahuan rurashca uchilla cilindrocunata tarirca. Cunan punllacunapica chai pushtucunaca Irak llactapimi quedan. John Taylor tarishca arcilla alpahuan rurashca uchilla cilindrocunaca cada unomi 10 centimetrocunata midirca. Chaicunapica escritura cuneiforme nishca letracunapimi huaquin yuyaicunata escribishca carca. Shinallata Babiloniamanda rey Nabonidomanda, paipa rucu churi Belsasarmandapash mañanajushcacunatami escribishca carca. Caicunata ricushpami Bibliata na cringapaj munajcunapash rey Belsasar tiashcataca crirca.

Bibliapica Belsasar tiashcatallaca na nijunllu, ashtahuanbash rey cashcatami ricuchin. Shinapash chaitaca Bibliata na cringapaj munajcunaca llullami canga nishca. Por ejemplo, 1875​pica William Talbot cientificoca: “Bel-sar-ussur [Belsasar] runaca paipa taita Nabonido mandajuj tiempopillata paipash mandajushcatami huaquin gentecunaca nishca. Shinapash ciertopacha Belsasarpash mandajushcataca ni maipi na nijunllu” nishpami escribirca.

Shinapash arcilla alpahuan rurashca shuj shuj uchilla cilindrocunapi imata escribishcata ricushpami ciertopacha Belsasarpash mandajushcataca yachaj chayashca. Chai cilindrocunapica rey Nabonido huaquin huatacunata shuj llactapi causajujpi Belsasar mandajushcatami ricuchin. Encyclopaedia Britannica nishca libropica ninmi: “Rey Nabonido shuj llactapi cashpaca Belsasarmanmi llactata mandachun, ashtaca soldadocunata mandachunbash mingarca” nishpa. Chaimi shuj tiempopica Babilonia llactapica Belsasarmi paipa taitapa randi mandajurca nipanchi. Chaita yachashpami idiomacunata estudiaj Alan Millard arqueologoca, Daniel libropi Belsasarta rey nishpaca na llullajunllu nirca.

Jehovata sirvijcunaca ¿imamandata Daniel libropi escribishcacunapica confiapanchi? Bibliata Dios escribichishcamanda (2 Tim. 3:16).