¿Yachaparcanguichu?
Israelitacuna Jehová Diosmanga tortolaguta cashpa o palomaguta cashpapash cunallami carca. ¿Cai leyca israelitacunataca imapita beneficiarca?
MOISESMAN cushca leypica Jehová Diosman shuj ofrendapi palomaguta, tortolaguta cujpica chasquingallami nijurcami. Y Jehová Diosman carana ofrendagupi, palomamanda parlashpaca tortolagumandapashmi siempre parlan. Cai animalgucunataca siempremi igual churashpa parlan. Shinaca israelitacunaca Jehová Diosmanga palomaguta o tortolaguta cashpapash cunallami carca (Lev. 1:14; 12:8; 14:30). Shinaca cai ishcai animalcunamanda maijanda cashpapash cunalla ley tiashcamandami israelitacunapaca ali carca. Porque tortolacunaca na siemprechu facil ricurin carca. Tortolacunata tarina imamanda na siempre fácil cashcata ricupashunchi.
Tórtola
Tortolacunaca na shuj pushtupilla causaj urpigucunachu can. Tortolacunaca Israel llactapica cunujlla quillacuna cajpillami chaipi can. Shinapash quillacuna chiri chiri tucujpica tortolagucunaca cunujlla pushtuta o cunujlla llactacunata mascashpami chaicunapi causangapaj rin. Por ejemplo octubre quillata rishpami primaverapi o cunujlla quillacunapi tigramun (Cant. 2:11, 12; Jer. 8:7). Chaimandami chiri chiri quillacunapica Jehová Diosman ofrendaguta rurashpa carangapaca tortolagucunataca na facil tari ushan carian.
Paloma brava
Cutin palomagucunata tarinaca facilmi carian. ¿Imamandata shina nipanchi? Porque palomagucunaca shuj pushtupilla causaj urpigucunami can. Paicunaca na shuj pushtucunapi causangapaj rij urpigucunachu can. Chaimandami israelitacunaca ima quillapipash palomagucunataca taririnlla carian (Juan 2:14, 16huan chimbapurashpa ricupangui). Shuj rijsishca libropi nishca shinaca: “Palomagucunataca casi tucui gentecunami chai llactapica huasipillatapash viñachin cashca” nin. Shinallata: “Palomacunata viñachingapaca tucui huasicunapillatami shuj utujuguta charin cashca” nin. Y chaipimi palomagucunata viñachin cashca (Isaías 60:8huan chimbapurashpa ricupangui).
Palomami paipa causana pushtupi tiajun
Caipica Jehová Diosmandaca ¿imatata yachajupanchi? Caipica Jehová Dios shuj juyaj Dios cashcata, gentecunata ali ali intindijtapashmi yachajupashcanchi. Chaimandami israelitacuna huatapi cai ishcai animalgucunamanda maijanda tarishpa Jehová Diosman carajpica paica chasquinlla carca.
