1, 2. a) ¿Imamandata Jesusca Martahuanga ali llevarin carca? b) Martapash shujcuna shinallata juchayu cashcataca ¿imashinata yachanchi?

LAZAROPA pani Martamanda, Mariamandaca ¿imata yaripangui? Jesusca Martahuan, Mariahuanga ali alimi llevarin carca. Jesusca paipa mamatapash ninandami juyan carca (Juan 11:5; 19:25-27). ¿Imamandata Jesusca Martahuanga ali llevarin carca?

² Martaca imagutapash caraj, ninan trabajadorami carca. Shinapash, espiritualmente ali cajpimi Jesusca Martahuanga ali llevarin carca. Martaca Jesús yachachishcataca tucuitami crin carca. Jesús Mesías cajtapash tucui shunguhuanmi crirca (Juan 11:21-27). Shinapash, Martaca tucuicunashnallata juchayu caimandami pandarin carca. Shuj viajeca, Martapa huasimanmi Jesús micungapaj rirca. Chaipimi Martaca paipa ñañahuan ashata culirashpa Jesustaca nirca: ‘Apunchi Jesús, ñucalla tucuita rurajuchun saquishpa, ñuca ñaña tiajujtaca ¿nachu ricungui? Ayudagri nipayari’ nishpa (Lucas 10:38-42, liingui). Martamanda Bibliapi liishpaca ¿imatata yachajunchi?

3, 4. a) ¿Imamandata Jesusca nirca, ‘Mariaca ashtahuan aliguta ruranatami’ agllarca nishpa? b) ¿Imatata Martaca yachajurca? (Callari dibujota ricupangui.)

³ Martapash, Mariapash huasiman micungapaj pushashcamanda agradicingapami, Jesusca Diospa Shimimanda paicunaman yachachi callarirca. Chaimandami, Mariaca “Jesuspaj ñaupajpi tiarishpa, pai villajujtaca aligutapacha uyajurca”. Martapash uyangapaj tiarishca cajpica, Jesusca alitami rurajungui ninmanmi carca.

⁴ Shinapash, Martaca paipa huasiman Jesús shamushcamanda cushilla cachun munashpami, ali micunata yanushpa caita chaita rurashpa musparijurca. Chaimandami, Martaca paipa ñaña na ayudajpi ashata culirarca. Chaita ricushpami Jesús cashna nirca: “Marta, Marta. Canga, imatapash ruranatalla yariajllami musparishpa purijungui. Ashtahuangarin shujtallami, imaguta cashpapash rurana cangui” nishpa. Shina nishpaca, Jesusca ashallata yanuna minishtirishcatami Martamanga intindichingapaj munarca. Ashtahuanbash, María alita rurajushcata ricushpami Jesusca nirca: “María huarmiguca, ashtahuan aliguta ruranata yarishpami, caipi tiajun. Ama chashna tiajuchun nitaca, pipash na ushangachu” nishpa. Jipa punllacunamanga, chai punllapi imata micushcataca Mariaca na yaririangachu. Shinapash, Jesús imata nishcataca nunca na cungashcangachu. Ashtaca huatacuna yalishca jipaca, apóstol Juanga escribircami: ‘Martatapash paipa ñañatapash Jesusca ninandami juyarca’ nishpa (Juan 11:5). Cai textota liishpami intindinchi, Martaca Jesús mandashcata cazushpa, paipa causaipi Jehovata sirvingapaj esforzarishcata.

5. a) ¿Imamandata cunanbica ashtahuan cosascuna Jehová Diosta sirvinata jarcai ushan? b) ¿Imatata tapurina capanchi?

⁵ Imashinami ricunchi, Marta causashca tiempopipash Jehová Diosta sirvinataca imapash cosascuna jarcanllami carca. Cunanbicarin ashtaca cosascunami ñucanchicuna Jehová Diosta sirvinataca jarcai ushan. La Atalaya 1 de abril de 1959 revistapica nijurcami, Jesusta catijcunaca cunan punllacunapi llujshishca mushuj aparatocuna, mushuj cosascuna Jehová Diosta sirvinata jarcachunga na saquinachu can nishpa. Chai huatacunapica revistacuna, radiocuna, cinecuna, televisionguna, shuj cosascunapash cada punlla llujshijuj shinami ricurin carca. Chaimandami chai revistapillata nirca, tucuri punlla chayamujujpica, imacunapash ashtahuan llujshishpami Jehová Diosta sirvinata jarcanga nishpa. Chai shimicunaca ciertomi cashca. Cunanbica ashtaca ashtaca cosascunami ñucanchicuna Jehová Diosta sirvinataca jarcai ushan. Shinaca, María cuenda Jehová Diosta tucui shunguhuan sirvingapaca ¿imatata rurana canchi?

6. ¿Imashinata ñucanchi organizacionga cai mundopa tecnologiataca utilizashca?

⁶ Ñucanchi organizacionga Diospa Reinomanda ashtahuan villachingapami cai mundopa cosascunata, tecnología nishcatapash ali utilizashca. Primera Guerra Mundial tiai punllacunapica, “Foto-Drama de la Creación” nishca peliculatami llujchirca. Colorhuan fotocunata, sonidota churashcami carca. Chai peliculaca Jesús mil huatacunata mandajujpi imashina causaigu tianata ricuchishpami tucurin carca. Chaita ricushpaca, mundo enteropi ashtaca millón gentecunami cushilla sintirirca. Asha huatacuna jipaca, radio emisorata utilizashpami mundo enteropi Diospa Reinomanda villachirca. Cutin cunanbica shuj shuj aparatocunata, Internetta utilizashpami ali villaicunataca  mundo enteropi causaj gentecunaman villachinchi.

7. a) ¿Imamandata cai mundopa cosascunapi yapata ocuparinaca peligroso can? b) ¿Imamandata cuidarina capanchi? (Notata ricupangui.)

⁷ Apóstol Pabloca nircami, cai mundopa cosascunataca na yapata ocupanachu canguichi nishpa (1 Corintios 7:29-31, liingui). Cunanbica ratomi yanga librocunata liishpa, televisionda ricushpa, puringapaj shuj llactacunaman rishpa o imapash chairalla llujshishca cosascunata randingapaj rishpa yanga yanga tiempota yalinchi. Shinallata mensajecunata escribishpa, cachashpa, imapash pugllaicunamanda noticiacunata ricushpami huaquinbica ashtaca horascunata chaipilla yalinchi. Chaicunaca shuj vicio cuendami caita ushan (Ecl. 3:1, 6). * Chai ruraicunapi yapa tiempota yalijushpaca, Jehovata sirvinatami ladoman saquinajushun (Efesios 5:15-17, liingui).

8. ¿Imamandata cai mundopa cosascunata na juyana capanchi?

⁸ Diabloca ñucanchicuna cai mundopa cosascunapi yapata ocuparishpa Jehovata sirvinata saquichunmi munan. Jesusta punda catijcunaca Diablo shina pandachijushcataca yacharcami. Ñucanchipashmi chaitaca cuenta japinchi (2 Tim. 4:10). Chaimandami Bibliapica nin: “Cai pachapi ima tiajtapash, na juyanachu canguichi” nishpa. Cai consejota cazushpaca, cai mundopa cosascunapi na yapata preocuparishpami Jehovaman ashtahuan quimiri ushashun. Jehovata cazunapash na shinllichu canga (1 Juan 2:15-17).

9. a) ¿Imatata Jesusca paipa catijcunamanga nirca? b) ¿Imamandata Jesusca shuj ali ejemplo can?

⁹ Jesusca Martataca imacunapipash ama yapata ocuparijuchunmi consejarca. Paipa catijcunatapashmi, Diospa Reinotami pundapi churana canguichi nishpa consejarca (Mateo 6:22, 33, liingui). Jesusllatami shuj ali ejemplota curca. Paica huasita, alpacunataca na charircachu. Minishtirishcaguhuanllami causan carca (Luc. 9:58; 19:33-35).

10. Villachi callarijushpaca ¿imatata Jesusca rurarca?

¹⁰ Villachishpa purijujpica, Jesustaca shuj shuj ruraicunami pandachi ushanman carca. Shinapash, ima ashtahuan importante cashcataca Jesusca alimi yacharca. Villachi callarishpaca, Capernaum llactapimi huaquin milagrocunata rurarca. Chaimandami, gentecunaca Jesustaca chaipi ashtahuan quedachun ninajurca.  ¿Imatata Jesusca rurarca? Paica nircami: “Taita Dios mandajujmanda ali villaitaca, shuj pueblocunapipash villanapachami cani. Shina villachunmi, ñucataca cachamuhuarca” nishpa (Luc. 4:42-44). Jesusca pai nishcata pactachingapami, Palestina llactapa tucuilla pushtucunapi villachingapaj ashtacata chaquilla rirca. Jesusca jucha illaj cashpapash, shuj gentecunashnallatami shaijun carca. Chaimandami huaquinbica samanata minishtirca (Luc. 8:23; Juan 4:6).

11. a) Shuj runa chayashpa ayudahuai nijpica ¿imatata Jesusca nirca? b) ¿Imatata Jesusca advirtirca?

¹¹ Shuj viajeca, Jesusca paipa catijcunataca llaquicunata imashina chimbapuranatami yachachijurca. Chaipimi shuj runa chayashpa Jesustaca cashna nirca: “Yachachij, ñucanchi taitamanda imaguta japinataca ñucahuan chaupirichun, ñuca huauquita mandapai” nishpa. Jesusca chai familiapa causaipi satirinapa randica cashnami nirca: “Cangunapaj juez cachun, na cashpaca canguna chaupirichun mandachunga, ¿pita ñucataca churahuarcayari?” nishpa (Luc. 12:13-15). Shina nishca jipaca, gentecunaman yachachishpami Jesusca catirca. Ashtahuanbash, yapata imacunatapash charina munai mishajpi, Jehovata sirvinata pactara saquinguichiman nishpami advirtirca.

12, 13. a) ¿Imamandata griego gentecunaca Jesusta rijsingapaj munarca? b) ¿Imatata Jesusca nirca?

¹² Último punllacunata cai Alpapi cashpaca, Jesusca ninan llaquicunatami charirca (Mat. 26:38; Juan 12:27). Paica ninanda sufrishpa huañuna cashcataca alimi yacharca. Shinapash, nara huañushpallata ashtaca cosascunata ruranatapash yacharcami. Huañungapaj picha punllacuna faltajpica, Jesusca shuj burropi tiarishpami Jerusalenman yaicurca. Chaipimi gentecunaca, “¡Jatun Diospaj shutipi shamujuj jatun mandajca, aligumari cangui ni tucushca cachun!” nishpa chasquirca (Luc. 19:38). Cayandi punllaca, Jesusca Diospa huasiman yaicushpami chaipi jatujcunata llujchishpa cacharca. Chai jatujcunaca yapata valichishpami animalcunataca jatunajurca (Luc. 19:45, 46).

¹³ Huaquin griego gentecunaca, Pascua punllata judiocunahuan yaringapami Jerusalenman rishcarca. Paicunaca ashtaca milagrocunata rurashcata ricushpami, Jesusta rijsingapaj Felipehuan parlarca. Shinapash, Jesusca imata rurana ashtahuan importante cashcata ali yachashpami paicunahuanga na parlarca. Jesusca gentecuna paipa lado tucushpa paita difindichunga na minishtircachu. Chaimandami, Jesusca Andresman Felipeman ñami ñuca huañuna horas pactamujun nishca jipaca, cashna nirca: ‘Maijambash paipa causaitalla juyashpa causajushpaca, chingaitami chingagringa. Ashtahuangarin maijambash cai pachapi causanata millanayachishpaca, causaitami causagringa’ nishpa. Chaimandami, griego gentecuna paita rijsichun paicunahuan parlanapa randica, Jesusca nirca: ‘Ñucata sirvijtaca ñuca Taitami ninanda alicachinga’ nishpa. Jesús imata nishcataca, Felipeca chai griego gentecunaman villashcangami (Juan 12:20-26).

14. ¿Imashinata yachanchi Jesusca tucuipa tiempota llujchishcata?

¹⁴ Jesusca ali villaicunata villachinata imapash jarcachunga na saquircachu. Shinapash, imagucunatapash rurangapami tiempota llujchirca. Bibliapi nishca shinaca, Jesusca shuj cazamientomanmi rirca. Chai fiestapi vino tucurijpica yacutami ali vinoman tigrachirca (Juan 2:2, 6-10). Shinallata paita uyajcuna, paipa amigocuna micungapaj invitajpica, Jesusca paicunahuan cangapami tiempota llujchirca (Luc. 5:29; Juan 12:2). Ashtahuanbachaca Taita Diosta mañangapaj, aliguta pensaringapaj, samangapami tiempota llujchin carca (Mat. 14:23; Mar. 1:35; 6:31, 32).

15. a) ¿Ima consejotata apóstol Pablo curca? b) ¿Imamandata apóstol Pabloca ali ejemplo can?

¹⁵ Apóstol Pabloca nircami, Jesusta catijcunaca caruta calpana carrerapi calpajujcuna cuendami can nishpa. Chaimandami cai consejota curca: “Quipishna urmachingapaj munajuj juchata ruranataca, tucuitami saquina canchi” nishpa (Hebreos 12:1, liingui). Apóstol Pabloca imata yachachishpapash paipa causaipimi pactachin carca. Paica judiocunapa religionda catishpaca tucuicunapa rijsishca caita, charij charij caitami ushanman carca. Shinapash, Jehová Diosta sirvinamandami tucuita huashaman saquirca. Chaimandami apóstol Pabloca Siria, Asia menor, Macedonia, Judea llactacunaman rishpa villachirca. “Imatapash aliguta ruranata yariaj causanguichi” nishcatapash pactachishpami causarca. Paica jahua cielopi mandanata chasquinata shuyajuimandami, Filipenses congregacionmanga cashna nirca: ‘Punda causashcata cungaita cungashpami, japigrishapacha yashpa ninanda ñaupaman rijuni. Chaimanbacha chayangapami calpashpa rijunilla’ nishpa (Filip. 1:10; 3:8, 13, 14). Ashtahuanbash, apóstol Pabloca soltero caimandami “imapash na jarcajpi Apunchi Jesuspajta aliguta rurashpa causai” usharca (1 Cor. 7:32-35).

16, 17. a) Cazado cashpa o soltero cashpapash ¿imashinata apóstol Pablopa ejemplota cati ushapanchi? b) ¿Imatata shuj cusahuarmica rurarca?

¹⁶ Huaquingunapash Jehovata ashtahuan sirvingapaj munashpami, apóstol Pablopa ejemplota catishpa solterocuna quedashca. Solterocunaca cazadocunashna familiata mantininata na yapata charimandami ashtahuan Jehovata sirvi ushan (Mat. 19:11, 12). Shinapash, soltero cashpa o cazado cashpapash, Jehovata tucui shunguhuan sirvinata imapash jarcachunga na saquinachu canchi. Chaimandami, imacunapipash yapa tiempota yalijushcata cuenta japishpaca uchalla cambiana canchi.

¹⁷ Gales nishca llactamanda Mark, Claire cusahuarmipa ejemplota ricupashun. Paicunaca colegiota tucuchishca jipaca, precursor regularcuna shinami sirvi callarirca. Cazarashca jipapash precursorcuna shinami sirvishpa catirca. Mark huauquica ninmi: “Ñuca huarmihuanga quimsa cuartocunata charij huasipimi causanajurcanchi. Trabajaitapash huaquin punllacunatallami trabajan carcanchi. Shinapash, tucuita saquishpami programa de construcción internacional nishcapi sirvi callarircanchi” nishpa. Huaquinbi paicuna ashalla culquita charijpipash, Jehová Diosca siempremi paicunataca cuidashca. Cai último 20 huatacunataca, África llactapica tucui ladocunamanmi Tandanajui Huasicunata rurangapaj rishca. Claire paniguca ninmi: “Jehová Diosta tucui punlla sirvishpa yalinaca imahuanbash na igualanllu. Ashtaca amigocunatami rijsishcanchi, imagupash nunca na faltashcachu. Charishca cosascunata saquishpa, Jehovata cushilla sirvijuimandaca ninandami cushijunchi” nishpa. Tiempo completopi sirvij ashtaca huauquipanicunapash cai cusahuarmi shinami sintirin. *

18. ¿Imatata tapurina capanchi?

¹⁸ Tucuicunami cashna tapurina canchi: ¿Jehová Diosta ashtahuan cushijushpachu sirvina cani? ¿Cai mundopa cosascuna Jehová Diosta sirvinata jarcachun saquijunichu? nishpa. Shina cajpica Bibliata liingapaj, ali yachajungapami ashtahuan esforzarina canchi. Imashina chaita pactachinataca shamuj temapimi yachajushun.