1, 2. ¿Imamandata ñucanchicunaca animalcunahuanga na igual capanchi?

GENTECUNACA animalcunahuanga na igual canchichu. Ñucanchicunaca parlaita, escribita, liita, shujcuna ima nijtapash intindita ushanchimi. Shinallata Jehová Diosta mañaita, paiman candaitapash ushanchimi. Cientificocunaca na intindi ushanllu, imashina ñucanchicuna chai tucui cosascunata rurai ushashcata.

² Jehová Dios ñucanchicunata ayudajpimi imacunatapash rurai ushanchi (Sal. 139:14; Apoc. 4:11). Shinallata, Jehová Diosca ‘gentecunataca paishnalla rijchajtami rurashca’ (Gén. 1:27). Chaimandapashmi ñucanchicunaca animalcunahuanga na igual canchi. Chaimandami ima ali cajta, ima nali cajta agllai ushanchi. Shinaca Jehová Diosta adoranata o na adoranatapashmi ñucanchillata agllai ushanchi.

3. Ñucanchicuna ali decisiongunata agllachunga ¿imatata Jehová Diosca cushca?

³ Jehová Diosca paita imashina adoranata, sirvinata yachachunga Bibliatapashmi ñucanchiman cushca. Bibliaca entero cashpa, Bibliapa huaquin librocunalla cashpapash 2.800 yali shimicunapimi tian. Bibliata liishpami ñucanchi yuyaicunapi Jehová  Diospa yuyaicunata chari ushashun (Sal. 40:5; 92:5; 139:17). Shina rurashpallami ali decisiongunata agllashpa para siempre causaita ushashun (2 Timoteo 3:14-17, liingui).

4. a) Yuyanaca ¿imata can? b) ¿Ima tapuicunatata yachajupashun?

⁴ Yuyanaca ¿imata can? Imagupi cashpapash aligutapacha pensarinami can (Sal. 77:12; Prov. 24:1, 2). Jehová Diospi, Jesuspi aligutapacha pensarinaca minishtirishcami can (Juan 17:3). Cai temapica cai tapuicunatami yachajushun: Liishcapi aliguta pensaringapaca ¿imashinata liina canchi?, Aliguta pensaringapaca ¿ima horata tiempota llujchina canchi?, Cutin cutin aliguta pensarishpa catingapaca ¿imatata rurana canchi?

5, 6. Liijushcata intindingapaj, yaringapaca ¿imatata rurai ushapanchi?

⁵ Gentecunaca respirangapaj, puringapaj o huaquin cosascunata rurangapaca na pensarijunata minishtinchichu. Na cuidadota charishpaca, liijushpa letracunata ñucanchi ñavi ricujujpipash, ñucanchi yuyaica imapash shuj cosascunapirami pensarijuita ushan. Chaimandami, imata liijushcata ali intindingapaj esforzarina canchi. Chaipaca, imata liijushpapash shuj parrafota tucuchishpa o chaishuj subtemaman yaligrijushpaca, imata liishcata ali intindingapami asha ratoguta pensarina canchi. Aliguta pensarishpa liinaca na facilchu can. Shinaca ¿imatata rurana canchi?

⁶ Cientificocunaca ninmi, ñucanchicuna shimi ucupilla parlajuj cuenda liinaca, imata liijushcata ashtahuan yarichunmi ayudan nishpa. Ñucanchita Ruraj Diosca chaitaca alimi yachan. Chaimandami Josué runagutaca nirca: ‘Cai libropi mandashcataca liinami cangui’ nishpa. Hebreo shimipica, shimi ucupilla parlajushca cuenda liina cashcatami nijurca (Josué 1:8, liingui). Bibliata shina liinaca, liishcapi aliguta pensarichun, imata liishcata yarichunmi ayudan.

7. ¿Ima horasta aliguta pensaringapaca aprovechana capanchi? (Callari dibujota ricupangui.)

⁷ Juchayu caimandaca liijushpa aliguta pensarinaca na facilchu can. Chaimandami, aliguta pensaringapaca samana horasta aprovechana canchi o tranquilo pushtuta mascana canchi. Rey Davidca tutami aliguta pensaringapaca aprovechan carca (Sal. 63:6). Jesuspash Taita Diosta mañangapaj, aliguta pensaringapami tranquilo pushtucunata mascan carca (Luc. 6:12).

8. a) Bibliapi aliguta pensarishpapash ¿imacunapita ashtahuan pensari ushapanchi? b) Jehová Diosca ñucanchicuna paimanda parlajpica ¿imashinata sintirin?

⁸ Bibliapi aliguta pensarinaca minishtirishcapachami can. Shinapash, shuj cosascunapipashmi aliguta pensarinalla canchi. ¿Imacunapita pensari ushanchi? Jehová Diospa rurashcacunata ricujushpaca, ratoguta aliguta pensaringapami tiempota llujchina canchi. ¿Nachu Jehová Diospa rurashcacunata ricushpaca paita jatunyachingapaj, agradicingapaj munanchi? Shujcunahuan cashpaca, Jehovapa rurashcacunata ricushpa imata yachajushcata parlashunchi (Sal. 104:24; Hech. 14:17). Bibliapica ninmi, Jehová Diosca paipi aliguta pensarichun, paihuan parlachun, paimanda shujcunaman yachachichunmi munan nishpa. Malaquías libropica ninmi: ‘Mandaj Diosta manllajcunaca caishuj chaishujmi paicunapa cumbacunaman tucuicunallata parlanajurca. Chai parlanajushcataca, Mandaj Diosca tucuita uyashpami paipa yarina libropi escribichirca. Mandaj Diosta manllashpa causajcunapa, paipa shutita yarishpa  causajcunapami chashna escribichirca’ nishpa (Mal. 3:16).

9. a) ¿Imacunapita Timoteoca pensarina carca? b) Villachingapaj prepararijushpaca ¿imatata rurana capanchi?

⁹ Apóstol Pabloca Timoteotaca nircami, can imashina cajta, imashina parlajta, imashina yachachijta ricushpa shujcuna imata canmanda yuyajtaca aliguta pensaringui nishpa (1 Timoteo 4:12-16, liingui). Ñucanchicunapash Timoteo cuendami ashtaca cosascunapi aliguta pensarina canchi. Bibliamanda yachajujcunaman yachachingapaj prepararijushpaca, aliguta pensaringapami tiempota llujchina canchi. Paicuna Jehová Diosman ashtahuan quimirichun ayudangapaj ima tapuita o ima chimbapuraita utilizanatami aliguta pensarina canchi. Shina rurashpaca ashtahuan ali, cushillami yachachishun. Ñucanchi fepash shinlliyangami. Aliguta pensarinaca nara villachingapaj llujshishpallata ali yuyaicunata charichunbashmi ayudanga (Esdras 7:10, liingui). Shinallata, Hechos libropa shuj capitulota liishpaca ashtahuan cushijushpami villachi ushashun. Ashtahuanbash gentecunaman ima textota, ima publicacionhuan villachinata, ima temamanda parlanata aliguta pensarinapash cushilla villachichunmi ayudanga (2 Tim. 1:6). Villachingapaj aliguta prepararishpaca, Bibliata aliguta utilizashpami villachi ushashun (1 Cor. 2:4).

10. ¿Imacunapillata aliguta pensari ushapanchi?

¹⁰ ¿Bibliamanda discursocunata, Jatun Tandanajuicunapi discursocunata anotanata gushtanguichu? Chai anotashcacunata repasangapaj tiempota llujchinaca alimi can. Shinami Bibliamanda imata yachajushcata, Jehová Diospa organización imata yachachishcatapash aliguta pensari ushanchi. Shinallata Villajun, ¡Despertad! revistacunapi, Quimsa Punlla Jatun Tandanajuipi llujshishca publicaciongunata liishpa  imata yachajushcapipash aligutami pensarina canchi. Anuario librota liijushpaca, cada experiencia jipami ashaguta pensarina canchi. Shinami ima liishcapash shunguman chayanga. Chaimandami, liijushpaca ashtahuan ali yuyaicunata señalashpa, chai ladopillata imagutapash escribinalla canchi. Chaita ruranaca revisitacunata rurangapaj, huauquipanicunata visitashpa animangapaj, discursota cungapami ayudanga. Ashtahuanbachaca, liijushpa aliguta pensaringapaj tiempota llujchinaca yachajushcata ali intindichun, Jehová Diosta mañajushpa paita tucui shunguhuan agradicichunmi ayudanga.

11. ¿Imapi pensarinata minishtirishcapacha can, imamanda? (Notatapash ricupangui.)

¹¹ Biblia imata yachachishcapi aliguta pensarinaca minishtirishcapachami can. Shinapash, Bibliata na charichun saquijpica ¿imatashi ruranchiman? * Ña yachajushca textocunata, canticocunatami yari ushanchi. Ñucanchi yachajushcata yarichunga pipash na jarcai ushangachu (Hech. 16:25). Jehová Diospa espíritu santomi yachajushcata yarichun ayudanga (Juan 14:26).

12. Cada punlla Bibliata liingapaca ¿imatata rurana capanchi?

¹² Cada punlla Bibliata liingapaca ¿imatata rurana canchi? Shuj yuyaita ricupashun. Bibliamanda Yachajungapaj Escuela tandanajuipi liina capitulocunatami, semanapa huaquin punllacunapi liishpa aliguta pensari ushanchi. Cutin shuj punllacunaca Jesuspa causaimanda, pai imashina villachishcatami liita ushanchi. Chaitaca Mateo, Marcos, Lucas, Juan librocunapimi liita ushanchi (Rom. 10:17; Heb. 12:1; 1 Ped. 2:21). Liishcata ashtahuan ali intindingapaca, El hombre más grande se todos los tiempos librotami lii ushanchi. Chai libropica, Jesús cai Alpapi cashpa imatalla rurashcatami ricuchin. Chaicunata liishpa aliguta pensarinaca ninandami ñucanchitaca ayudanga (Juan 14:6).

13, 14. ¿Imamandata Jehová Diospi, Jesuspi, Bibliapi aliguta pensarinaca minishtirishcapacha can?

¹³ Jehová Diospi, Jesuspi aliguta pensarinaca espiritualmente fucurishca cachunmi ayudanga (Heb. 5:14; 6:1). Shinapash, aliguta pensaringapaj na tiempota llujchishpaca, ñucanchi fe na shinlli cajpimi espiritualmente chiriyashpa Jehová Diosmanda caruyashun (Heb. 2:1; 3:12). Jesusca nircami: ‘Diospa Shimita uyashcata tucui shunguhuan aliguta catishpami, juyailla fucuj granoshna causajun’. Shinapash, ‘cai causaipilla charijyangapaj munashpami, imatapash rurashpa musparinajun. Shina causanajushpallatami, cai causaipajlla imatapash rurashpa ninanda cushijushpa, paicunaca na fucuj granoshna tucunajun’ nishpa (Luc. 8:14, 15).

¹⁴ Chaimandami, Bibliata cada punlla liishpa aliguta pensarinaca minishtirishcapacha can. Shinami, Jehová Dios munashcashna ñucanchicunapash caita ushashun, paipa cualidadcunatapash chari ushashun (2 Cor. 3:18, NM). Shina rurangapaj esforzarishpaca, Jehová Dios imashina cashcataca unai unaicaman yachajushpami cati ushashun. Chaica shuj jatun bendicionmi can (Ecl. 3:11).

15, 16. a) ¿Imamandata Jehovapi, Jesuspi aliguta pensaringapaj tiempota llujchinaca minishtirishcapacha can? b) ¿Imamandata aliguta pensaringapaj tiempota llujchinaca na fácil can? c) ¿Imamandata aliguta pensaringapaj esforzarina capanchi?

¹⁵ Jehová Diospi, Jesuspi pensarinaca cushijushpa  Jehovata sirvishpa catichunmi ayudan. Ñucanchicuna cushijushpa sirvijujta ricushpaca, congregacionmanda shuj huauquipanicuna, villachijujpi uyajcunapash cushillami sintiringa. Ashtahuanbash, Jehová Dios ñucanchicunata salvangapaj paipa Churita cachamushcapi pensarishpaca, Jehová Diospa amigo canataca ashtahuanmi alicachishun (Rom. 3:24; Sant. 4:8). Sudáfrica llactamanda Mark shuti huauquica, politicapi na chapurimandami quimsa huatacunata carcelpi yalirca. Paica ninmi, aliguta pensarinaca maimanbash viaje rijui cuendami can. Ashtahuan shuj pushtucunaman viaje rishpaca, imapash shuj cosascunata ashtahuan rijsishpami cushijurin. Jehová Diospi aliguta pensarishpapash, maimanbash viaje rijuj cuendami Jehová Diosmanda ashtahuan cosascunata yachajui ushanchi nishpa. Chai huauquica ninbashmi, huaquinbica desanimarishca o jipa punllacunapi ima pasanata pensarishpami preocupado sintirini. Shina sintirishpaca Bibliatami liini. Jipaca liishcapimi aliguta pensarini. Shina rurashpaca ñapashmi alillata sintirini nishpa.

¹⁶ Cunanbica imacunapash ashtaca ashtaca cosascuna tiashcamandaca, aliguta pensaringapaj tiempota llujchinaca na facilchu can. África llactamanda Patrick huauquica ninmi, cada punllami imacunatapash rurana cani. Chaimandami huaquinbica yapata preocuparini. Shina sintirishpaca ¿imatata ruran? Paica ninmi, pundapica Jehová Diosta mañashpami imacunamanda preocuparijushcata tucuita villani. Shinami aliguta, tranquilo pensarita ushani nishpa. Chaita rurangapaj ashtahuan tiempota minishtishpapash, Jehovaman ashtahuan quimirishpami chai huauquica cushijun. Aliguta pensarinami Jehová Dios imata Bibliapi yachachijushcata ashtahuan ali intindichunbash ayudan (Sal. 94:19). Imashinami yachajushcanchi, cada punlla Bibliata liishpa, liishcapi aliguta pensarinaca ninandami ñucanchicunataca ayudan. Shinaca esforzarishpa catishunchi (Hech. 17:11).

17. ¿Ima horata quiquinga Bibliata liishpa aliguta pensaringapaj tiempo llujchipangui?

¹⁷ Huaquingunaca tutamanda jatarishpami Bibliata liin, liishcapi aliguta pensarin, Jehová Diostapash mañan. Shujcunaca chaupi punlla ratoguta samajushpami Bibliata liingapaj aprovechan. Cutin shujcunaca tutayajujpi o puñungapaj nara rishpallatami liin. Cutin huaquingunaca tutamandapash, tutapashmi Bibliataca liin (Jos. 1:8). Bibliataca ima horaspash liinallami canchi. Shinapash, Bibliata cada punlla liingapaj, liishcapi aliguta pensaringapami tiempota llujchishpa ali aprovechana canchi (Efes. 5:15, 16).

18. Aliguta pensaringapaj esforzarishpa, yachajushcata pactachishpa causajcunataca ¿imashinata Jehová Diosca bendicianga?

¹⁸ Bibliapica ninmi, Bibliata liishpa aliguta pensaringapaj esforzarishpa, yachajushcata pactachijcunataca Jehová Diosca bendiciangami nishpa (Salmo 1:1-3, liingui). Jesusca nircami: “Taita Diospaj Shimita yachachijpi uyashpa pactachijcunaca, ashtahuan ninandami cushijun” nishpa (Luc. 11:28). Bibliata cada punlla liishpa aliguta pensarinaca, Jehová Diosta alicachichunmi ayudanga. Shinami Jehová Diosca cunanbipash cushilla causachun ayudanga. Shamuj punllacunapicarin, Paraisopimi para siempre causaita ushashun (Sant. 1:25; Apoc. 1:3).