HUATA 1870pica mundo enteromanda ashtaca curacuna tandanajushpami huaquin decisiongunata rurarca. Chai tandanajuitami Concilio Vaticano nin. Chaipi japishca decisiongunataca mundo enteropi ashtaca millón católico gentecunami alicachishpa chasquin. Shinapash chaipi japishca decisiongunaca ¿Bibliamandachu can? Ashtahuangarin ¿ciertochu papa Franciscoca apóstol Pedropa cati mandaj can? ¿Ciertochu apóstol Pedroca primer papa carca?

Huata 1870pica Concilio Vaticano nishcaca Mateo 16:16-19; Juan 21:15-17 versocunamanda parlangapami ashtahuanbachaca tandanajurca. Chai versocunapica ricunchimi, Jesushuan Pedrohuan parlashcata. Jesusta catij congregacionguna tiai callarichunga apóstol Pedroca ushashcatami ayudarca. Ashtahuangarin Pedrota Jesús rijsishpaca Pedro imashina cajta ricushpami Pedrotaca shuj rumihuan Jesusca chimbapurarca (Juan 1:42). Shinapash ¿Pedromanllu Jesusca ashtahuan autoridadta curca? Ricupashun.

Mateo 16:17, 18pica Jesusca nircami: ‘Ñucapash candaca, Pedromi cangui ninimi. Ñucata crishpa tandanajujcunataca, cai rumipimi huasichinshna mirachisha. Paicunataca Hades nishcapa pungucunapash na mishai ushangachu’ nishpa. Chai shimicunata nishpaca ¿Jesusca nijurcachu, Pedromi paipa catijcunapa huasichina rumishna can? ¿Pedromi chaishuj apostolcunata yali ashtahuan autoridadta charinga nishpa? Mateo 16:17, 18pi Jesuspa shimicunata uyashpaca ¿imatata paipa catijcunaca intindirca? Bibliapa Mateo, Marcos, Lucas librocunapi nishca shinaca, cutin cutinmi Jesuspa catijcunaca maijanda ashtahuan ali canchi nishpa fiñanajun carca (Mateo 20:20-27; Marcos 9:33-35; Lucas 22:24-26). Pensaripai, Pedromi tucui apostolcunamanda ashtahuan yali autoridadta charina can nishpa Jesús agllashca cajpica ¿paipa catijcunaca ñucami ashtahuan autoridadta charina cani nishpa fiñanajunmanllu carca?

 ¿Imatata apóstol Pedropash intindirca? Pedro judío caimandaca alimi yacharianga profeciacunapica huasichina rumimanda parlajujta (Isaías 8:13, 14; 28:16; Zacarías 3:9). Huasichina rumimanda parlashpaca Pedroca escribircami, chai rumica Jesusmi can nishpa. Pedroca, Jesusmanda parlangapallami griego shimipi petra nishcata utilizan. Jesuspash griego shimipi petra nishca shimimandallatami Mateo 16:18pica parlarca (1 Pedro 2:4-8).

Apóstol Pablopash alimi Jesustaca catin carca. Pablopash alimi yacharca Pedroca congregacionguna tiachun ayudashcata. Shinapash Pedromanda parlashpaca nircami, Pedropashmi Jesusta catijcunapa ‘pilarcunashna’ can nishpa. Pablo yuyashca shinaca, shujcunapashmi Pedroshnallata autoridadta charin carca (Gálatas 2:9). Ashtahuangarin, paipa catijcunata mandachun Pedrota Jesús churashca cajpica ¿Pabloca nijunmanllu carca shujcunapashmi pilarcunashna can nishpa?

Shuj punllacarin, tucui gentecunata na igual tratajujpimi Pabloca shinllita Pedrotaca tacurirca. Chaimanda parlashpami Pabloca nirca: ‘Nalita rurajpimi paitaca shinllitapacha ñavi ñavi rimarcani’ nishpa (Gálatas 2:11-14). Imashinami ricupanchi, Pabloca alimi yacharca, ni Pedro, ni shuj gentecunapash shujcunamanda yali autoridadta charishcata. Chaita ali yachashpami Pabloca, huasichij rumica Jesusmi can nirca (1 Corintios 3:9-11; 10:4).

Shinaca ¿imamandata Jesusca nirca: ‘Pedromi cangui ninimi. Ñucata crishpa tandanajujcunataca, cai rumipimi huasichinshna mirachisha’ nishpa. Chai shimicunata ali intindingapaca punda versocunata ricushun. Jesusca paipa catijcunataca tapurcami: ‘¿Cangunaca maijan nihuanguichita?’ nishpa. Shina nijpimi Pedroca nirca: ‘Canga, causajujlla Taita Diospa Churi, Quishpichij Cristomi cangui’ nishpa. Shina nijpimi Jesusca alitami nijungui nishpa paillata shuj rumihuan chimbapurarishpa nirca: ‘Ñucata crishpa tandanajujcunataca, cai rumipimi huasichinshna mirachisha’ nishpa (Mateo 16:15-18).

 Chaimandami punda tiempo Iglesiacunapi jatun mandajcunaca nirca, Mateo 16:18pi rumica Jesusmi can nishpa. Shuj ejemplota ricupashun. Huata 354-430camanga Agustín de Hipona nishcami tiarca. Paica escribircami, Pedroca Jesustaca nircami “canga, causajujlla Taita Diospa Churi, Quishpichij Cristomi cangui’ nishpa. Shina nijpimi Jesusca Pedrotaca nirca: “Ñucata crishpa tandanajujcunataca, cai rumipimi huasichinshna mirachisha” nishpa. Agustín de Hiponaca cutin cutinmi nirca Jesusmi rumi can nishpa.

Cunan punllacunapi Iglesiacunapa crishcacunahuan ricushpa Agustín de Hiponatapash shujcunatapash juzgajpica Iglesiacunapa yachachishcacunata millanayachijcuna cuendami canman. Suiza llactamanda Ulrich Luz teólogo nishca shinaca, cunan punllacunapi Bibliamanda investigadorcunapashmi nishca, rumica Jesusmi can nishpa. Shinaca, Concilio Vaticano de 1870 nishca shinaca, chai runacunapashmi Iglesiapa yachachishcacunata millanayachijcuna cuenda canman.

Apóstol Pedroca papa nishpa shutichirinataca yachaitallapash na yacharcachu. Huata 800cunapimi, Roma llactamanda canllaman causanajuj obispocunaca paicunallata papami cani nin carca. Ashtahuangarin, chai huatacunamanda 200 yali huatacuna jipami papa nishpa shutichirinacunaca tiai callarirca. Jesuspa apostolcunaca Pedroman ashtahuan autoridadta cushcata o shujcuna Pedropa cati mandajcuna cashcataca yaitallapash na yanllu carca. Martin Hengel ali estudiashca alemanga nircami, callaripi papacuna ashtahuan autoridadta charishcata o chaita yachachishcataca ni shuj pruebatallapash na charinchichu nishpa.

Shinaca ¿ciertochu Pedroca primer papa carca? ¿Ciertochu Pedropa catica shuj papacuna tiarca? ¿Papami ashtahuan autoridadta charin nishpa catolicocunapa yachachishcacunaca Bibliamandachu can? Na. Jesusca paillata shuj rumihuan chimbapurarishpami nirca, ‘ñucata crishpa tandanajujcunataca cai rumipimi huasichinshna mirachisha’ nishpa (Efesios 2:20). Shinaca cada unomi ricuna, pensarina capanchi: “¿Ñucaca Jesusta ciertopacha catij iglesiata tarishcanichu?” nishpa.