Cambio climaticomanda y jipa causaimandapash ¿imatata Bibliapica nin?

Cai idiomapi uyangapaj o ricungapaj

“Cambio climaticocuna tiashcamandami shuj shuj llaquicuna ricurishca. Chaimi ñucanchi planeta Tierraca ashtahuan huaglishca y pipash na causai ushanalla tucujun” (The Guardian).

Gentecunallatami cai planetataca shinapacha huaglichishca. Y cientificocunapash gentecunapa culpami calentamiento globalpash ashtahuan aumentashca ninmi. Chaimandami climapash cambiashca y shuj shuj llaquicunapash ricurishca. Shinaca imacunalla pasashcata ricupashunchi:

Cunanbica ashtahuan rupai rupaimi tucushca. Shinallata sequiacuna o chaquishca chaquishca tiempocuna, ushashca tamiacuna y shuj shuj cambio climaticocunami tiashca. Chaimi ashtahuan inundacionguna y ashtahuan incendios forestalescuna tiashca.
Polo Nortepi hielopash y shuj pushtucunapi tiashca hielopash yacuyashpami tucurinajun.
Mar yacucunapash ashtahuan jundashpami miranajun..

Cai planeta enteropimi climaca yapata cambiashca. The New York Times shuti periodicoca, 193 llactacunapi ima pasajushcata parlashpami cashna nirca: “Cai planetaca auxilio o ayudahuaichi nishpa caparijuj cuendami can”. Shinallata clima yapata cambiashcamandami ashtahuan huañuicuna y llaquicunapash tiashca. Chaimi Organización Mundial de la Saludca, “clima shinapacha cambiajushcamandami mundo enteropi gentecunapa saludca en peligro can” nishca.

Shina llaquicuna tiajpipash jipa punllacunamanga mejoranga yashpami cushijuita ushapanchi. Cunanbi pasanajuj cosascunamandaca Bibliapica ñami parlashcarca. Shinallata ñucanchita cuidangapaj cai llaquicunata Taita Dios tucuchinata imamanda seguros caita ushashcatapashmi nijun.

¿Cai cambio climaticocunahuanga Bibliapa imapash profeciachu pactarijun?

Ari, Bibliapa shuj profeciami pactarijun. Calentamiento globalmandami climaca tucui ladocunapi cambiajushca. Y cunanbi shina pasanataca Bibliapica ñami nishcarca.

Profecía: Taita Diosca ‘cai alpata huaglichinajujcunataca tucuchingami’ (Apocalipsis 11:18).

Gentecuna cai planetata ña tucuchingapaj cashcataca ñami Bibliapica nishcarca. Y chaica ciertomi can. Porque calentamiento globalmandami cai planetaca cunanbica ashtahuan huaglishpa tucurijun.

Cai profeciaca gentecuna cai planetata salvangapaj na imatapash rurana cashcatami ricuchijun. Shinallata cai planetata gentecuna ña tucuchingapaj munanajujpimi Taita Diosca ama tucuchichun jarcanga nijunmi. Pero huaquin gentecunaca cai cambio climaticocuna ama ashtahuan tiachun ayudangapaj munashpami imacunatapash ruran. Pero imata rurashpapash cai planetata gentecuna huaglichishpa catinataca na jarcai ushangachu.

Profecía: “Gentecunapash manllanai cosascunata ricushpami ninanda manllarinajunga” (Lucas 21:11).

Bibliapica ‘manllanai cosascuna’ o manllanai llaquicunami cai tiempocunapica pasanga nijunmi. Cai alpapi clima cambiashcamandami acapanacuna, terremotocuna, tsunamicuna y shuj shuj manllanai llaquicuna mundo enteropi tiashca. Chaimandami ashtaca gentecunaca ecoansiedad nishca unguihuan sufrinajun. Chai gentecunaca shina cosascuna pasanga yashpami ña manllarishca quidashca. Y tranquilo causaitaca ñana ushanllu.

Profecía: ‘Último punllacunapica shinlli, na aguantai ushanalla tiempocunami chayamunga. Porque gentecunaca paicunapilla pensarijcuna, culquitapash ninanda juyajcuna, shujcunata na juyajcuna, de acuerdo cangapapash na munajcuna, amigocunatallata nalita rurajcuna, nimamanda na uyangapaj munajcunami canga’ (2 Timoteo 3:1-4).

Bibliapica shina clase gentecuna tianataca ñami nishcarca. Shina gentecuna tiaimandami cai planetatapash huaglichishca y climapash yapata cambiashca. Gobiernocunapapash y empresacunapapash gentecunata yalica culquimi paicunapa ashtahuan importante can. Paicunaca jipa punllacunaman gentecuna imashina causanataca nisiquiera na preocuparinllu. Paicunaca igual trabajangapaj munashpapash, calentamiento global ama ashtahuan aumentarichun imata ruranata parlashpapash, diferente yuyaicunata charimandami na de acuerdo quidaita ushan.

Cai profeciapi nishcashnaca, gentecuna cambiashpa cai planetata cuidanataca na pensanachu canchi. Porque Bibliapica shina nali gentecunaca “ashtahuan ashtahuan peormi tucunga” nijunmi (2 Timoteo 3:13).

Taita Dios cai situacionda arreglanataca ¿imamandata seguro caita ushapanchi?

Bibliapica, ñucanchita ruraj Jehová a Diosca ñucanchi planetamandapash y caipi causajcunamandapash ninandami preocuparin ninmi. Jehová Dios cai situacionda arreglanata ricuchij 3 textocunata ricupashunchi:

1. Taita Diosca cai alpataca “na yanga tiachunga rurarcachu, ashtahuangarin chaipi causanajuchunmi rurarca” (Isaías 45:18).

Taita Diosca, paipa promesataca cumplingami (Isaías 55:11). Cai alpata pipash tucuchichun o na causanalla pushtu tucuchunbash Taita Diosca na saquingachu.
2. ‘Na jariyajcunami, llactata [o alpataca] japinga. Casilla ali causaihuanmi, ninanda cushijunajunga. Imatapash cashcatapacha rurajcuna [o alita rurajcunami], llactataca japinga. Chai llactapi [o alpapica], causaitami causanajunga’ (Salmo 37:11, 29).

Taita Diosca gentecunaca cai alpapimi para siempre tranquilo aliguta causanga nishpami prometin.
3. Nali gentecunaca “llactamanda [o alpamanda] anchuchi tucungami” (Proverbios 2:22).

Taita Diosca nalicunata rurashpalla causangapaj munaj gentecunata y cai planetata huaglichinajuj gentecunatapash tucuchishami nishpami prometin.

Taita Diosca ñucanchicuna jipa punllacunapi ali causachunga ¿imatata ruranga?

Taita Diosca paipa promesata cumplingapaca ¿imatata ruranga? Paipa gobiernota utilizashpami paipa nishcataca cumplinga. Chai gobiernoca Taita Diospa Gobiernomi can (Mateo 6:10). Chai Gobiernoca jahua cielomandami cai alpataca mandanga. Chaimandami cai alpapi tiashca llaquicunata arreglangapaca cai alpapi gobiernocunahuan parlajunataca na minishtingachu. Y Taita Diospa Gobiernoca cai alpapi gobiernocunata tucuchishpami paicunapa randi mandanga (Daniel 2:44).

Taita Diospa Gobiernoca gentecunamandapash y cai planetamandapashmi ali cosascunata ruranga (Salmo 96:10-13). Pero Jehová Diospa Gobiernoca ¿imacunatallata ruranga?

Cai planeta enterotami cutin arreglanga

Bibliapica ninmi: “Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga” (Isaías 35:1).

Jipa punllacunapica cashnami pasanga: Jehová Diosca pitapash jambinshnami cai alpataca cutin alichinga. Y gentecunapa culpamanda yapata huaglishca pushtucunatapashmi alichinga.
Cai alpapi climatapashmi controlanga

Bibliapica ninmi: Jehová Diosmi “ninanda huairajujtaca saquichishpa, caiman chaiman cuyurijuj yacutapash, casilla cachun ruran” (Salmo 107:29).

Jipa punllacunapica cashnami pasanga: Jehová Diosca huairata, yacuta, indita y cai alpapi tucui tiashcacunataca paipa poderhuanmi controlaita ushan. Chaimandami gentecunaca acapanamanda, terremotocunamanda, tsunamicunamanda y climapa culpamanda tiashca shuj shuj llaquicunamandapash ñana sufringachu.
Cai planetata aliguta cuidachunmi yachachinga

Bibliapica ninmi: “Ñucami canda yachachishpa, can purina ñandapash ricuchisha” (Salmo 32:8).

Jipa punllacunapica cashnami pasanga: Jehová Diosca gentecunamanga cai alpata cuidana responsabilidadtami cushca (Génesis 1:28; 2:15). Chaimandami cai alpata imashina aliguta cuidanata yachachinga. Taita Diospa rurashcacunata aliguta cuidashpa causanatami yachachinga.