Testigo de Jehovacunaca tucui gentecunahuan, na uyangapaj munaj gentecunahuanbashmi Bibliamanda parlangapaj munanchi. ¿Imamandata tucuicunahuan parlangapaj munanchi? Ñucanchicunaca Taita Diostapash, shuj gentecunatapashmi juyanchi (Mateo 22:37-39). Taita Diosta juyaimandami paipa Churi Jesús mandashcashna ‘tucui ladocunapi villachingapaj’ munanchi (Hechos 10:42; 1 Juan 5:3). Chaimandami, ñaupa punllacunapi profetacunashna gentecunaman Bibliamanda parlashpa catinchi (Jeremías 25:4). Shinallata shuj gentecunata juyaimandami tucuicunaman, na uyangapaj munaj gentecunamanbash Taita Diospa Gobiernomanda yachachingapaj, paicunapash salvarichun munanchi (Mateo 24:14).

 Ashtahuanbash, na uyangapaj munaj gentecunapa huasiman chayajpica huaquinbica pipash Bibliaman ashtahuan yachajungapami munan. Cai razongunami tian:

•   Gentecunaca siempre huasimanda cambiarin.

•   Chai huasimanda shuj personallapash uyangapami munan.

•   Gentecunaca cambianmi. Mundo enteropi ima pasajujta ricushpami huaquin gentecunaca cambian, Taita Diosmanda, Bibliamandapash ashtahuan yachajungapaj munan (Mateo 5:3). Ashtahuanbash apóstol Pabloshnami huaquingunaca pundapi na uyangapaj munashpapash jipamanga cambian (1 Timoteo 1:13).

 Imashina cashpapash, ñucanchicunaca gentecuna munai na munai uyachunga pitapash na obliganchichu (1 Pedro 3:15). Cada uno imata crinata o na crinata decidina derechota charishcatami intindinchi (Deuteronomio 30:19, 20).