Testigo de Jehovacunaca Bibliamanda yachajungapaca shuj shuj traducciongunatami utilizashca. Shinapash paicunaca Traducción del Nuevo Mundo Bibliatami ashtahuanbachaca utilizan. Chai Bibliaca ashtaca idiomacunapimi tian. Shinallata Diospa shuti tiajushcamanda, cabal, intindirinalla cashcamandami chai Bibliataca utilizan.

•   Diospa shutitami utilizan. Na tucui Bibliacunapichu Diospa shutica tiajun. Por ejemplo shuj Bibliapica setenta yali gentecunapa shuticunami tiajun. Chai gentecuna chai Biblia llujshichun ayudashcamandami paicunapa shutita chaipi escribishca. Shinapash Biblia Diospa Shimi cashcata ricuchingapaca, Jehová shutitaca ni shuj viajellapash na churashcachu.

   Cutin Traducción del Nuevo Mundo, Bibliapica Diospa shutica tiajunmi. Original rollocunapi Diospa shuti tiajushca pushtucunapillatami cai Bibliapipash tiajun. Shinallata cai Bibliata picunalla traducishcatapash na villanllu.

•   Cabaltami yachachin. Bibliamanda huaquin traducciongunapica original rollocunapishnaca na cabalta yachachinllu. Por ejemplo shuj Bibliapica Mateo 7:13​taca cashnami traducishca: “Quichiji pungutami, yaicuna canguichi. Infiernoman pushajuj punguca anchomi, ñambash anchomi”. Traductorcunaca nalicuna infiernopi para siempre llaquichi tucuna cashcata crimandami shina traducishcanga. Pero original textocunapica “infierno” shimica na tiajunllu. Chaipa randica “chingaita chingachun” nishca shimicunami tiajun. Chaimandami Traducción del Nuevo Mundo Bibliapica, original textocunapishna intindichingapa “huañuiman apaj ñan” nishpa traducishca.

•   Intindirinallami can. Bibliapi cabalta yachachishpapash yachachishcacunaca intindirinallami cana can. Ashtaca Bibliacunapica Mateo 5:3​taca cashnami traducishca: “Diosmanda yachajungapaj, paicunapa shungupi ninanda munajcunaca, ninandami cushijun” nishpa. Pero cai shimicunaca na fácil intindirinllu. Facillla intindirichunmi Traducción del Nuevo Mundo Bibliapica cai textotaca cashna nishpa traducishca: “Taita Diosmanda yachajungapaj munajcunaca ninandami cushijun” nishpa.

 Traducción del Nuevo Mundo Bibliapica Diospa shutitami utilizan. Cabalta, intindirinallatami yachachin. Ashtahuanbash cai Bibliataca gratismi shuj gentecunaman cupanchi. Chaimandami ashtaca millón gentecunaca paicunapa propio shimipi Bibliataca lii ushan.