La Bib i anons in gayar nouvèl : bann domoun va viv pou toultan su la tèr (Psom 37:29). Dan la Bib néna 66 liv antou. Bondieu la ansèrv 40 zom ke lavé foi an li, pou ékri bann liv la. Néna apepré 3 500 zan, Moiz la ékri lé 5 premié liv. Lapot Jan la ékri le dèrnié liv, néna plus 1 900 zan. Mé èske bann zom ke Bondieu la utilizé pou ékri la Bib, la mèt zot bann zidé dedan ? Non, zot la ékri rienk bann pansé Bondieu. Li la utiliz son léspri sin pou koz avèk zot (2 Samuèl 23:2). Donk, sé bien Jéova ke la fé ékri la Bib (Lir 2 Timoté 3:16 ; 2 Pièr 1:20, 21).

 Regard le vidéo Kisa la ékri la Bib ?

 Nou koné ke Bondieu la donn a nou la Bib, parske sak li anons su lavnir lé bien détayé é égzakt. La poin in moun ke lé kapab fé sa (Jozué 23:14). Rienk Bondieu Toupuisan, lé kapab konèt a lavans sak va ariv bann domoun dan lavnir (Lir Izai 42:9 ; 46:10).

 In liv ke Bondieu la donn a nou, i pe pa èt in liv kom lé zot. É la Bib i resanm pa lé zot liv : Néna déja la Bib an plus 100 lang, é la finn inprim a li par miliar. La Bib la été ékri na lontan, mé sak li di su la sians lé vré. Bann zom ke la ékri la Bib, la pa kontredi a zot ant zot a. Le mésaj ke Bondieu la fé ékri dan la Bib, lé ranpli èk lamour, é sé rienk le vré Bondieu ki pe donn a nou sa, parske li lé amour. É ojourdui ankor, la Bib na le pouvoir rann la vi domoun méyeur. Sé pousa ke domoun par milion lé sur, ke la Bib, sé la Parol Bondieu (Lir 1 Tésalonisien 2:13).

  Le tan la pasé, mé èske sak lé ékri dan la Bib la été chanjé ? Kan nou regard bann zékri la Bib ke na plus 2 000 an, nou na la preuv ke tout sak Bondieu la fé ékri dan la Bib, la ariv juska nou san ke rien la été chanjé (Izai 40:8). Bondieu la pa lès pèrsonn déform son Parol (Lir Psom 12:6, 7 ; 1 Pièr 1:24, 25).

 Regard le vidéo Koman èt sur ke sé Bondieu ke la fé ékri la Bib ?

 Néna in gayar nouvèl ke nou retrouv partou dan la Bib : Bondieu néna in projé pou tout domoun. Sak li sar fé, i mont ke li ièm a nou. La Bib i ésplik ke bann zumin la pèrd vitman la posibilité viv dann paradi. Mé li amont osi ke, tou kont fé, in jour, zot va viv dann paradi su la tèr (Lir Révélasion 21:4, 5).

 Dan la Bib néna bann loi, bann vérité biblik é bann konsèy. Ladan i rakont osi koman Bondieu i aji avèk bann domoun. Kan nou lir la Bib, nou pe dékouv kèl tanpéraman Bondieu néna. Donk, la Bib i pe èd a ou konèt Bondieu. Li ésplik koman ou pe devnir kamarad Bondieu (Lir Psom 19:7, 11 ; Jak 2:23 ; 4:8).

 Ti liv la, va èd a ou konprann la Bib, parske la fason li lé ékri, lé parèy kom Jézu té i ansègn. Jézu té i sit bann vèrsé biblik, é li té ésplik osi « kosa té i ve dir » (Lir Luk 24:27, 45).

 Bann gayar nouvèl ke Bondieu la donn a nou, lé atiran é i touch vréman le keur ! Malgrésa, désèrtin i fé pa in kont avèk sa. Dot, i ve pa dutou antann parlé d’sa. Mé, pa bezoin dékouraj a ou. Sé rienk si ou aprann konèt Bondieu, ke ou pe gingn léspoir viv pou toultan (Lir Jan 17:3).