Dan lartik avan, nou la koz an détay su le sign ke Jézu la anonsé. Le sign ke Jézu la doné sé la preuv ki mont anou bien ke le roiyom Bondieu, dirijé par Jézu Kris, lé déja an plas dann sièl.

La Bib i di ke, kan Jézu la komans dirijé antank Roi, li la chas Satan é son bann démon an deor le sièl. Depui sa, banna i gingn ajir rienk su la tèr. Sé pousa mèm ke depui 1914, tout bann zafèr lé antrèn ni plu pir su la tèr (Révélasion 12:7, 9)

Mèm si tout sak i éspas dan le monn i anpir, Jézu, le Roi le roiyom Bondieu, i aji pou fé sak lé bien dan la vi bann domoun. Jézu lavé prédi ke noré in laktivité pou ansègn la Bib dan le monn antié, par sa in bonpe domoun i dékouv bann vérité biblik pou gid azot é zot i mèt sa an pratik dan zot vi tou lé jour (Izai 2:2-4). Bann vérité biblik la, i èd domoun par milion voir le travay in fason rézonab, rann zot vi d’fami pluméyeur ankor é utiliz bann zafèr matèryèl mé san ke sa i pran tout zot tan dan zot vi. Zot i aprann viv in méyeur fason koméla mèm é zot i devien le kalité d’moun ke Bondieu i ve ke i viv su la tèr ki sra dirijé par le roiyom.

Mèm si Jézu i dirij déja le roiyom dann sièl, lé toujour bann zumin i gouvèrn su la tèr. Mé seulman, Bondieu la donn Jézu lord la : « Alé anparmi out bann zènmi é dominn su zot » (Psom 110:2). I tard pa, Jézu va détrui tout bann zènmi le roiyom in foi pou tout é sa va soulaj bann domoun ki obéi Bondieu avèk in keur antié.

Pou ke sa i ariv, i fodra ke le roiyom Bondieu i fé bann zaksion la :

• Li va détrui tout bann fo relijion. Bann relijion ke la ansègn bann zafèr manteur su Bondieu é ke la rann la vi domoun difisil va disparèt. La Bib i konpar tout bann fo relijion kom in madam prostitué. Kan va détrui ali, in paké d’moun i sra choké (Révélasion 17:15, 16).

• Li va fé disparèt tout bann gouvèrnman su la tèr. Le roiyom Bondieu va détrui tout bann gouvèrnman ke néna su la tèr (Révélasion 19:15, 17, 18).

• Li va détrui tout bann mové moun. Kosa va éspasé pou bann domoun ki ve kontinué fé sak lé mové é ki ve pa obéi Bondieu ? « Mé le bann mové moun, zot va disparèt su la tèr » (Provèrb 2:22).

• Li va détrui Satan é son bann démon. Satan é son bann démon i gingn arpu ‘tronp bann nasion’ (Révélasion 20:3, 10).

Kèl kalité d’vi bann domoun ki soumèt azot le roiyom Bondieu nora ?

Depui an o dann sièl Jézu va gouvèrné, li va réaliz plus zafèr ankor ke okin gouvèrnman su la tèr la jamé gingn fé juskalèr. Li nora 144 000 moun pou èd ali dirij la tèr, é banna lé choizi anparmi bann zumin (Révélasion 5:9, 10 ; 14:1, 3). Li va fé an sort ke la volonté Bondieu lé fé sianba su la tèr. Kèl bon zafèr le roiyom Bondieu va aporté pou tout bann domoun su la tèr ?

• Li va fé disparèt la maladi é la mor. « Okin moun i abit su la tèr va di : “Moin lé malad” », é « nora pu la mor » (Izai 33:24 ; Révélasion 21:4).

• Li promèt ke nou va viv vréman an pé é an sékurité. « La pé out bann garson va débordé an kantité », é « zot sra asiz chakèn sou son pié rézin é sou son pié fig, é na poin in moun va fé peur azot » (Izai 54:13 ; Miché 4:4).

• Li va donn bann domoun in travay ki kontant azot. « Sak moin la choizi va profit a fon zot travay. Zot i sar pa fatig azot pou rien » (Izai 65:22, 23).

• Li va règ bann problèm lanvironnman. « Le dézèr é le péi ousa lé sèk nora in gran kontantman. La plèn ke lé dézèr va konèt la joi é va fleri parèy kom safran » (Izai 35:1).

• Li va ansègn bann domoun sak zot i doi fé pou gingn viv pou toultan. « Ala kosa i ve dir la vi pou toultan : ke zot i aprann konèt aou, le seul vré Bondieu, é sèk ou la anvoiyé, Jézu Kris » (Jan 17:3).

Bondieu i ve ke ou viv bann bon zafèr la dan out vi (Izai 48:18). Lartik i vien apré i ésplik sak ou pe fé koméla mèm pou konèt se gayar lavnir la.