Peršo Korinťanenge 10:1-33
-
Na kamas te doperel avka sar čirla o Izraelčana (1 – 13)
-
„Te na chal tumen ňič oleha, so hino spojimen le modlenca“ (14 – 22)
-
O skamind le Jehovaskero the o skamind le demonengero (21)
-
-
Pal e sloboda the pal oda, kaj te dikhas the pre avreskero svedomje (23 – 33)
-
„Savoro keren avka, kaj kaleha te ašaren le Devles“ (31)
-
10 Phralale, kamav, kaj te džanen, hoj savore amare dada, save dživenas čirla, sas tel e chmara* a savore pregele prekal o moros.
2 A sar tel adi chmara pregele prekal o moros, ta savore sas sar te bi bolde sar le Mojžišoskere nasledovňika, bo pregele jekhetane leha.
3 Savore chanas ča oda, so len delas o Del.
4 A savore pijenas oda isto paňi, savo len delas o Del. Ada paňi avelas avri andal e skala, savi sas pašes paš lende. Ada len sas le Devlestar a adi skala sikavelas pro Kristus.
5 Aľe but lendar kerenas o nalačho, vaš oda o Del pre lende dikhelas namištes a on mule pre pušťa.
6 Oda, so pes lenge ačhiľa, amenge sikavel, hoj te na kamas te doperel avka sar on, ta našťi amaro jilo kamel oda, so hino nalačho.
7 Aňi na presikavas paťiv le modlenge avka sar varesave lendar. Avka sar hin pisimen: „O manuša peske bešle, chanas, pijenas. Paľis ušťile a chudne pes te zabavinel.“
8 Aňi na keras o lubipen* avka sar oda kerenas varesave lendar. A vaš kada tel jekh ďives mule 23 000 džene.
9 Aňi na skušinas le Jehovas,* hoj keci amenge šaj domukhas. Avka sar oda kerenas varesave lendar a vaš kada len murdarde o sapa.
10 Aňi na dudrinas avka sar dudrinenas varesave lendar a vaš kada len murdarďa o aňjelos.
11 Kada, so pes lenge ačhiľa, amen majinel vareso te sikhľarel. Sas oda pisimen predal amende, kaj te na doperas avka sar on. Bo the amen dživas pro agor kale svetoske.*
12 Vaš oda koda, ko peske mišľinel, hoj terďol, mi del peske pozoris, te na perel.
13 Savore pharipena, save zadživen tumen, zadživen the aver manuša. Aľe o Del hino tumenca a na domukhela, kaj te zadživen ajso pharipen, savo bi tumen thoďahas tele. Pomožinela tumenge, kaj te džanen, so akor kampel te kerel, kaj oda te ľikeren avri.
14 Avka mire lačhe phralale, te na chal tumen ňič oleha, so hino spojimen le modlenca.
15 Tumen san goďaver manuša, ta korkore phenen či vakerav lačhes abo na.
16 Či na sikavel oda poharis, andre savo hiňi e mol* a vaš savo paľikeras le Devleske pro Kristoskero rat? A či na sikavel tiš o maro, savo phagas pro Kristoskero ťelos?
17 The te sam but, sam sar te bi jekh ťelos. Bo hin ča jekh maro. A savore chas sar te bi ole jekhe marestar.
18 Rozmišľinen pal o Izraelčana. Či ola, save džan te presikavel paťiv le Devleske paš o oltaris, či the na chan ole obeťendar, save odoj anen?
19 So kamav kaleha te phenel? Hoj oda, so pes obetinel le modlenge, hino vareso buter? Abo, hoj o modli, hine čačes o Del?
20 Isto, hoj na! Kamav kaleha te phenel, hoj o obeťi, save anen o manuša andal aver narodi, oda anen le demonenge a na le Devleske. A me na kamav, kaj tumen vareso te chal le demonenca.
21 Mušinen tumenge te kidel avri: Či pijena sar te bi andal o Jehovaskero* poharis abo andal o poharis le demonengero. A tiš tumenge mušinen te kidel avri: Či chana sar te bi paš o „Jehovaskero* skamind“ abo paš o skamind le demonengero.
22 Abo kaleha kamas, kaj o Jehovas* te chal choľi? Či amen sam lestar zoraleder?
23 Savoro šaj keras, aľe na savoro anel chasna. Savoro šaj keras, aľe na savoro avres podhazdel.
24 Keren oda, so hino lačho predal o aver a na ča oda, so hino lačho predal tumende.
25 Šaj chan savore masendar, save pes bikenen pro pľacos.* A te tumenge phenena, hoj ada mas chana, ta na mušinen te daral, hoj keren vareso nalačho.*
26 Bo amen džanas, hoj „le Jehovaskeri* hiňi e phuv the savoro, so hin pre late“.
27 Te tumen pro chaben vičinela vareko, ko na paťal andro Raj a tumen tumenge phenena, hoj džana, ta ma phučkeren lestar, khatar oda chaben hin. Aľe chan savorestar, so tumenge thovena a šaj tumen el žužo* svedomje.
28 Aľe te bi tumenge vareko phenďahas: „Ada chaben sas obetimen le modlenge.“ Paľis ada chaben na chan angle* kada dženo, kaj ňikas te na chal o svedomje.
29 Na mišľinav kaleha tiro svedomje, aľe avreskero svedomje. Bo choč* šaj vareso kerav, ta voľinav oda te na kerel, kaj man avreskero svedomje vaš kada te na odsudzinel.
30 Te chav oda chaben a paľikerav vaš leske le Devleske, ta ela mištes, hoj les chava, te paľis pal ma aver vakerena namištes?
31 Vaš oda či chan abo pijen, abo či keren vareso aver, savoro keren avka, kaj kaleha te ašaren le Devles.
32 Aleha, so keren, ma podmaren o pindre aňi le Židenge, aňi le Grekenge, aňi le phralenge pheňenge andro zboros, savo patrinel le Devleske.
33 The me kamav andre savoreste te mišľinel the pre aver manuša a te na dikhel ča pre mande. Kamav te dikhel pre oda, so hino lačho predal o aver, kaj the on te en zachraňimen.
Poznamki tele čijarkica
^ Abo tel o mrakos.
^ Dikh tuke buter adaj andro Slovňikos.
^ Dikh o dodatkos A5.
^ Dikh tuke buter adaj andro Slovňikos.
^ Abo o vinos.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Abo tarhos.
^ Abo šaj tumen el žužo svedomje.
^ Dikh o dodatkos A5.
^ Abo čisto.
^ Abo vaš, bijal, aščal, predal.
^ Abo hoc.
