Peršo Korinťanenge 13:1-13
-
Kamiben–ada hin savorestar nekbuter (1 – 13)
13 The te vakerďomas ajse čhibenca, savenca vakeren o manuša the o aňjela, aľe na uľahas man o kamiben, ta bi oda elas avka sar te bi vareko marelas le trastenca a avrenge bi oda čhingerďahas o kana.
2 The te džanľomas te vakerel le Devleskere lava,* the te achaľiľomas savoreske, so o Del beršenca delas te džanel,* the te džanľomas savoro a uľahas man ajso paťaviben, hoj bi iľomas o vrchi a thoďomas bi len pre aver than, aľe na uľahas man o kamiben, ta ňič mandar.
3 The te diňomas miro barvaľipen, kaj te dav te chal le čoren, the te diňomas miro dživipen, kaj man aleha te ašarav, aľe na uľahas man o kamiben, ta so mange olestar.
4 Te le manušes hin kamiben, ta džanel le smiroha te užarel a hino jileskero. Na zavidzinel, na ašarel pes a na kerel pes avrendar feder.
5 Džanel pes te chovinel,* na mišľinel ča pre peste, sig pes na choľarel, na rachinel, kecivar les vareko dukhaďa.
6 Na radisaľol le nalačhipnastar, aľe radisaľol le čačipnastar.
7 Savoro ľikerel avri, ňigda nanašavel o paťaviben, furt paťal, hoj ela feder a ňigda pes na vzdel.
8 O kamiben ňigda na preačhela. Oda, hoj vareko džanel te vakerel le Devleskere lava, hoj džanel te vakerel čhibenca a hoj džanel igen but, ada sa jekhvar preačhela.
9 Bo džanas ča vareso a našťi achaľuvas savoreske, te vakeras le Devleskere lava.
10 Aľe te imar čačes achaľuvaha savoreske, ta the mište achaľuvaha le Devleskere lavenge, so vakeras.
11 Sar somas čhavoro, vakeravas sar čhavoro. Mišľinavas sar čhavoro a pre savoreste dikhavas sar čhavoro. Aľe akana, te som imar baro murš, ta man imar na ľikerav sar čhavoro.
12 Bo akana andro trastuno gendalos* na dikhas savoro, ča vareso. Aľe paľis dikhaha savoro a igen mištes. Akana džanav ča vareso, aľe paľis imar džanava savoro. Avka sar pal mande o Del džanel savoro.
13 Oda, so ačhel, hin o paťaviben, e naďej the o kamiben, ala trin. Aľe nekbareder lendar hin o kamiben.
Poznamki tele čijarkica
^ Doslovňe: te prorokinel.
^ Doslovňe: savore Devleskere svata tajomstvi.
^ Abo nane bijakhengero.
^ Abo džveritkos.
