Rimanenge 14:1-23
14 Prilen oles, kas mek nane ajso zoralo paťaviben. Aľe ma sudzinen les vaš kada, te pre varesoste dikhel inakšeder.
2 Vareko paťal, hoj šaj chal savoro. Aľe koda, kas mek nane ajso zoralo paťaviben, chal ča zeleňina.
3 Koda, ko chal savoro, te na asal kolestar, ko na chal savoro. A koda, ko na chal savoro, te na sudzinel oles, ko chal savoro, bo o Del les priiľa.
4 Ko sal tu, hoj sudzines avreskere sluhas? Tu na sal leskero raj, aľe o Del. A ov phenela, či kerel lačhes abo nalačhes. Vaš oda, hoj leske o Jehovas* pomožinel, šaj peske el isto, hoj kerel oda, so hino lačho andre leskere jakha.
5 Predal varekaste hin varesavo ďives dvoležiteder sar ola aver ďivesa. A predal varekaste hin jekh, save hine ďivesa. Sako pes mi ľikerel olestar, hoj oda andre soste paťal, hino lačho.
6 Te predal varekaste hino varesavo ďives dvoležiteder, kerel oda predal o Jehovas.* Avka the koda, ko chal savoro, kerel oda predal o Jehovas,* bo leske vaš kada paľikerel. Aľe the koda, ko chal ča zeleňina, oda kerel predal o Jehovas* a tiš leske vaš kada paľikerel.
7 Sem ňiko amendar na dživel ča predal peste. A ňiko na meras ča avka predal peste.
8 Bo te dživas, dživas predal o Jehovas.* A te meras, meras predal o Jehovas.* Avka či dživas abo meras, patrinas le Jehovaske.*
9 Vaš oda o Kristus muľa a sas uštado andal o meriben, kaj te el Raj upral ola, so mule the upral ola, save dživen.
10 Akor soske sudzines tire phrales? Abo soske asas tire phralestar? Sem savoren amen sudzinela o Del.
11 Bo hin pisimen: „‚Phenav tumenge,‘ vakerel o Jehovas,* ‚dojekh manuš angle ma banďola a dojekh phenela a udžanela,* hoj som Del.‘“
12 Vaš oda dojekhes o Del sudzinela vaš koda, so kerel.
13 Avka imar na sudzinas jekhe avres. A na keraha ňič, so bi podmarelas o pindre amare phraleske, abo so bi les ľidžalas ke oda, kaj te kerel o binos.
14 Sar nasledovňikos le Rajeskero Ježišoskero džanav a som mange isto, hoj na o chaben meľarel le manušes. Meľarel oda ča ajse manušes, savo pre oda avka dikhel.
15 Te tire phraleske podmares o pindre kaleha, so chas, na sikaves hoj les rado dikhes. O Kristus vaš leske muľa. Ta ma thov leske tele o paťaviben oleha, so chaha.
16 Aľe den tumenge pozoris, kaj pal koda, so keren lačho, paľis pal tumende te na vakeren, hoj hino oda nalačho.
17 Andre Devleskero kraľišagos pes na džal angle* kada, so o manuš chal abo pijel. Aľe džal pal oda, či kerel oda, so hino lačho andre Devleskere jakha, či hino lačho avrenca* a či les hin ajso radišagos, savo o Del del prekal peskero svato duchos.
18 Ko hino ajso a avka služinel le Kristoske, kerel radišagos le Devleske the le manušenge.
19 Vaš oda keras predal ada savoro, kaj te el maškar amende o smirom a tiš kaj jekh avres te podhazdas.
20 Ma rozmar oda, so kerďa o Del ča anglo chaben. Hin čačipen, hoj dojekh chaben pes šaj chal. Aľe so olestar, te manuš chal kada chaben a avka thovel tele o paťaviben varekaske avreske.
21 Nekfeder hin te na chal mas, te na pijel e mol* a te na kerel ňič, so bi thovelas tele o paťaviben tire phraleske.
22 Oleha, soha tuke sal isto, mi ačhel maškar tute the maškar o Del. Te džanes, hoj oda, so keres, hino lačho, av rado. A ma kide tuke andro šero, hoj oda hino vareso nalačho.
23 Aľe te varekaske oda na del a the avka chal, akor peske hino imar vinovato, bo na kerel pal oda, soha peske hino isto. Te na keras pal oda, soha amenge sam ista, ta akor keras binos.
Poznamki tele čijarkica
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Abo uznajinela.
^ Abo vaš, bijal, aščal, predal.
^ Abo tiš le Devleha.
^ Abo o vinos.
