15 LEKCIJA
Soske dureder te sikhľol?
1) Soske te sikhľol dureder andal e Biblija?
So sikhľiľan andal kadi brožura, pomožindžas tumenge buter te kamel le Jehovas. (1. Petra 2:2) Ma preačhen te sikhľol pal o Del. Avena paš leste pašeder a chudena o dživipen pro furt. Pregenen Ján 17:3; Júda 21.
Ko buter sprindžarel le Devles, buter leske pačal a kerel leske radišagos. (Hebrejom 11:1, 6) Ada pomožinel te preačhel te kerel ada, so le Devleske nane pre dzeka a imar buter ada pale te na kerel. Pregenen Skutky 3:19.
2) Savi chasna ela avren olestar, hoj tumen sprindžaren o čačipen pal o Del?
O Jehovahas šaj avel tumaro ňebesko dad.
Lačho hiros hin ajso šukar, hoj les kamena te vakerel avrenge. Te sikhľona dureder andal e Biblija, džanena, sar te phenel avrenge, soske tumen pačan andro Del a so hin lačho hiros. Pregenen Rimanom 10:13–15.
Kaske šaj vakeren pal o Del? Tumare kamaratenge vaj varekaske andal tumari fameľija. Vakeren avrenca avka, hoj te na rušen. Ma phenen, hoj lengri khangeri hiňi nalačhi, ale phenen pal ada, so o Del kamel te kerel ade pre phuv. Ma sikaven ča ada, so tumen džanen. O manuša feder prilena o čačipen andal e Biblija akor, te ke lende avena jileskre. Pregenen 2. Timotejovi 2:24, 25.
3) Soske šaj radisaľuvas, hoj sam sphandle le Devleha?
Te sikhľona furt andal e Biblija, tumaro pačaňiben čiže vijera the o kamiben kijo Del barola. Ada tumenge pomožinela te avel sphandle le Jehovaha. Sar? O Del ačhela tumaro dad a tumen avena andre leskri fameľija. Pregenen 2. Korinťanom 6:18.
4) Sar šaj sprindžaren le Jehovas mek buter?
Dureder sikhľon andal e Biblija. (Hebrejom 5:13, 14) Mangen varekas le Jehovaskre svedkendar, hoj tumen te sikaven dureder čačipena andal e Biblija la kňižkaha So šaj sikhľuvas andal e Biblija Te pes mek buter dodžanena andal e Biblija, tumaro dživipen ela mek bachtaleder. Pregenen Žalmy 1:1–3; 73:27, 28.
O lačho hiros hin le Jehovastar. Ov hino bachtalo Del. Ela pašeder kijo tumaro jilo avka, te sprindžarena leskre svedken. (Hebrejom 10:24, 25) Te furt kerena le Jehovaske radišagos, šaj dochuden nekšukareder dživipen, savo o Del pripravinel prekal o manuša — dživipen pro furt. Nekfeder, so šaj furt keren hin, te džal pal o drom kijo Del. Pregenen 1. Timotejovi 1:11; 6:19.
Dikh the pre ada
ZHROMAŽĎEŇA
So pes kerel andro kher, kaj pes zdžan le Jehovaskere svedki?
Av te dikhel, so odoj keras.
PAL AMENDE
Soske te študinel e Biblija?
Milijoni manuša pal calo svetos sikhľon andal e Biblija a dodžanen pes latar but lačhe veci pal o dživipen. Kamľanas len te džanel the tumen?
