Ada hin čačipen, hoj andro manželstvo avena problemi. Duj manuša na premišľinen calkom rovnakones, na mušinel len te el jednaka pociti a nazori pro dživipen. O problemi šaj aven the avral, abo pes šaj ačhel vareso nalačho, so ňiko na užarelas.

Šaj el lokeder te garuvel pes anglo problemi, ale e Biblija phenel: Ma denašen le problemendar! (Matúš 5:23, 24) Te tumen ľikerena le biblicke zasadendar, arakhena goďi, so te kerel le problemenca.

SO PHENEL E BIBLIJA: Hin... časos te del duma. (Kazateľ 3:1, 7) Arakh tuke časos te vakerel pal tumaro problemos. Ma dara te phenel tira romňake, le romeske, so tut hin pro jilo a so tuke pal ada mišľines. Furt phen čačipen, ma klamin! (Efezanom 4:25) The te hin phares te ovladňinel pes, the avka av pokojno. Ada pomožinela, kaj jekh pre aver te na vriskinen. (Príslovia 15:4; 26:20)

The te tuke nane pre dzeka, so phenel tiri romňi, o rom, the avka ačh jileskero a furt presikav e laska the e paťiv. (Kolosanom 4:6) Ma odthov te vakerel pal ada, ma av choľamen a ma preačh te del duma tira romňaha, le romeha. (Efezanom 4:26)

SO ŠAJ KERES:

• Kide avri ajso časos, sar tiri romňi, o rom kamela tut te šunel avri

• Te e romňi, o rom vareso phenel, ma prerušin ada. Užar! Paľis phen, so tut hin pro jilo

SO PHENEL E BIBLIJA: Jilestar pes kamen... a jekh avreske presikaven bareder [paťiv]. (Rimanenge 12:10 NZ) Mište šun, so tuke phenel tiri romňi, o rom. Snažin tut te porozuminel, sar dikhel pro problemos. Sikav o jilo a av pokorno. (Jakub 1:19; 1. Petra 3:8) Ma ker tut, hoj šunes, te pritom mišľines pre aver veci. Te pes del, ukončin oda, so keres, kaj tut feder te sustreďines pre ada. Te pes ada na del, phuč či pal ada šaj vakeren paľis. Te dikheha pre tiri romňi, o rom sar pro prjaťeľis na sar pro ňeprjaťeľis, pomožinela tuke ada, kaj te na aves rušlo. (Kazateľ 7:9)

SO ŠAJ KERES:

• The te ada, so šunes, tuke nane pre dzeka, ma av zacato a dureder šun

• Ma šun ča o lava, so phenel. Premišľin, so aleha kamel te phenel. So tuke phenen lakere abo leskere jakha či gesta? Save hlasoha ada phenel

SO PHENEL E BIBLIJA: Dojekh phari buťi anel užitkos, ale ko ča mujeha del duma, džal andro čoripen. (Príslovia 14:23 King James version) Te tumen pre varesoste dohodňinďan, mušinen ada sodujdžene te doľikerel. Ada nane lokes, ale furt tumen snažinen a keren ada. Oplacinel pes ada te kerel. (Príslovia 10:4) Te savoro kerena jekhetane, chudena lačhi odmena vaš tumari phari buťi. (Kazateľ 4:9)

SO ŠAJ KERES:

• Dohodňin tut la romňaha, le romeha, so dojekh tumendar kerela, kaj te džan avri andal tumaro problemos

• Sar džal o časos, ma bisteren tumenge te phenel, so pes imar podarinďa