Лука 3:1-38
3 Ко 15-то берш таро владибе е цезарескоро Тибериј, кеда о Понтиј Пилат сине управители ки Јудеја, хем о Ирод* владетели* ки Галилеја, а лескоро пхрал о Филип владетели ки Итуреја хем Трахонитида, хем о Лисаниј владетели ки Авилинија,
2 ко време кеда о Кајафа хем о Ана сине главна свештеникија, о Јован о чхаво е Захаријаскоро, добинѓа хабери таро Девел џикоте сине ки пустина.
3 Адалеске о Јован накхља таро са о тхана со сине околу о Јордан, те проповединел кај о мануша ваљани те крстинен пе хем аѓаар те сикавен кај каинена пе башо пумаре гревија, те шај те овен ленге простиме,
4 хем адава случинѓа пе баш сар со пишинела ко лил таро пророко о Исаија: „Некој викинела ки пустина: ’Спреминен е Јеховаске* о друмо! Керен леске рамна о друмија.
5 Секоја долина ваљани те пхерел пе, хем секоја планина хем учо тхан ваљани те керен пе рамна. О друмија со иси лен кривине мора те овен права хем о друмија со нане рамна мора те керен пе рамна.
6 Хем са о мануша ка дикхен околе преку касте со о Девел ка анел спасение‘“.
7 Тегани кеда о мануша авена сине ко Јован те крстинел лен, ов вакерела ленге сине: „Тумен сиен чхаве е сапенгере! Кој вакерѓа туменге кај шај те нашен тари е Девлескири холи со авела?
8 Адалеске сикавен тумаре постапкенцар кај каинена тумен. Хем ма вакерен коркори туменге: ’О Авраам тано амаро дад‘. Соске, вакерава туменге кај о Девел шај таро акала бара те керел чхаве е Авраамеске.
9 О товер више тано спремно те чхинел о кашта таро корено. Секова каш кова со на дела шукар плоди ка чхинел пе хем ка фрдел пе ки јаг“.
10 А о мануша пучена ле сине: „Тегани со ваљани те кера?“
11 Ов одговоринѓа ленге: „Кас иси дуј наметке, нека дел јекх околеске со нане ле ни јекх, хем кас иси хајбаске, нека дел околеске со нане ле“.
12 Чак о даночникија авена сине ки лесте те крстинел лен хем пучена ле сине: „Учителе, со ваљани те кера?“
13 Ов вакерѓа ленге: „Ма роден таро мануша те платинен повише таро адава со родела о закони“.
14 Исто аѓаар, о војникија да пучена ле сине: „Со ваљани амен те кера?“ А ов одговоринѓа ленге: „Никастар ма лен паре силаја хем никас ма обвининен неправедно, него овен задоволна тумаре платаја“.
15 Адалеске со о мануша аџикерена сине те авел о Христос,* ки песте пучена пе сине башо Јован: „Те нане ов о Христос?“
16 Адалеске о Јован сариненге вакерѓа: „Ме крстинава тумен пањеа, ама окова со авела пали манде тано посилно мандар, хем ме на заслужинава ни лескере сандале те пхравав. Ов ка крстинел тумен е Девлескере силаја* хем јагаја.
17 Ко вас иси ле лопата колаја со ка чистинел о гив тари лескири лушпа. О гив ка чхивел ко амбарија,* а о лушпе ка тхарел лен јагаја со нашти те ачхавел пе“.
18 Ов исто аѓаар охрабринела сине е манушен ко бут јавера да начинија хем понадари да вакерела сине ленге о шукар хабери.
19 Ама, е владетеле е Ироде о Јован укоринела ле сине башо адава со леља пле пхралескере ромња е Иродијада хем башо са о лошна буќа со керѓа.
20 Адалеске о Ирод керѓа панда јекх лошно бути: чхивѓа е Јоване ко затвор.
21 О Јован крстинѓа буте џенен, хем исто аѓаар ов крстинѓа е Исусе да. Џикоте о Исус молинела пе сине, пхравдило о небо,
22 хем е Девлескири сила* појавинѓа пе сар гулуби, хулили упри лесте хем шундило гласо таро небо: „Ту сиан мло мангло Чхаво, ту кереа ман радосно!“
23 Кеда о Исус почминѓа пле службаја, сине ле околу 30 берш. Сар со џанена сине о мануша, ов сине очхаво е Јосифескоро,чхаво е Илискоро,
24 чхаво е Мататескоро,чхаво е Левискоро,чхаво е Мелхискоро,чхаво е Јанајескоро,чхаво е Јосифескоро,
25 чхаво е Мататијаскоро,чхаво е Амосескоро,чхаво е Наумескоро,чхаво е Еслискоро,чхаво е Нагајескоро,
26 чхаво е Маатескоро,чхаво е Мататијаскоро,чхаво е Семеинескоро,чхаво е Јосехескоро,чхаво е Јодаскоро,
27 чхаво е Јоананескоро,чхаво е Резаскоро,чхаво е Зоровавелескоро,чхаво е Салатиелескоро,чхаво е Нерискоро,
28 чхаво е Мелхискоро,чхаво е Адискоро,чхаво е Косамескоро,чхаво е Елмодамескоро,чхаво е Ирескоро,
29 чхаво е Исусескоро,чхаво е Елиезерескоро,чхаво е Јоримескоро,чхаво е Мататескоро,чхаво е Левискоро,
30 чхаво е Симеонескоро,чхаво е Јудаскоро,чхаво е Јосифескоро,чхаво е Јонамескоро,чхаво е Елијакимескоро,
31 чхаво е Мелеаскоро,чхаво е Менаскоро,чхаво е Мататаскоро,чхаво е Натанескоро,чхаво е Давидескоро,
32 чхаво е Јесеескоро,чхаво е Овидескоро,чхаво е Воозескоро,чхаво е Салмонескоро,чхаво е Насонескоро,
33 чхаво е Аминадавескоро,чхаво е Арнискоро,чхаво е Есромескоро,чхаво е Фаресескоро,чхаво е Јудаскоро,
34 чхаво е Јаковескоро,чхаво е Исакоскоро,чхаво е Авраамескоро,чхаво е Тараскоро,чхаво е Нахорескоро,
35 чхаво е Серухескоро,чхаво е Рагавескоро,чхаво е Фалекескоро,чхаво е Еверескоро,чхаво е Саласкоро,
36 чхаво е Каинанескоро,чхаво е Арфаксадескоро,чхаво е Семескоро,чхаво е Ноескоро,чхаво е Ламехескоро,
37 чхаво е Метузалемескоро,чхаво е Енохескоро,чхаво е Јаредескоро,чхаво е Малелеелескоро,чхаво е Каинанескоро,
38 чхаво е Еносескоро,чхаво е Сетескоро,чхаво е Адамескоро,чхаво е Девлескоро.
Footnotes
^ Дословно: „о тетрархо“.
^ Или: „е свети духоја“. Дикх ко речнико баши „Девлескири сила“.
^ Тхан коте со чхивела пе о гив.
^ Или: „о свети дух“. Дикх ко речнико баши „Девлескири сила“.
