Ки секоја религија иси мануша со чаче верујнена ко Девел. О Девел дикхела адале манушен хем мангела те поможинел лен. Ама, жално тано адава со бут религие керена лошна буќа (2. Коринќаните 4:3, 4; 11:13-15). Сар со пишинела ко новине, несаве религие мешинена пе ко тероризам, геноцид, војне хем злоупотребинена чхавен. Са акава бут разочаринела околен со чаче верујнена ко Девел. Читин Матеј 24:3-5, 11, 12.

И чачутни религија славинела а Девле, а и ховавни лаџакерела ле. И ховавни религија сикавела буќа со нане ки Библија, сар со и о ховавно сикљојбе башо Девел хем о сикљојбе башо адава со овела е муленцар. Ама, о Јехова мангела о мануша те џанен о чачипе баши лесте. Читин Езекиел 18:4; 1. Тимотеј 2:3-5.

О Девел на прифатинела е религиен со вакерена кај мангена ле, а мангена о сумнал е Сатанаскоро (Јаков 4:4). Ки Библија, са е ховавне религиенге тано вакердо кај тане о ‚Баро Вавилон‘. О Вавилон сине јекх диз котар со почминѓа и ховавни религија, пало о Потоп ко е Ноескоро време. Панда хари, о Девел таро јекх пути ка анел крајо е религиенге со ховавена хем со мучинена е манушен. Читин Откровение 17:1, 2, 5, 16, 17; 18:8.

Ама, иси панда јекх шукар хабери. О Јехова на бистерѓа е искрена манушен таро ховавне религие ко цело сумнал. Ов кхедела асавке манушен аѓаар со сикавела лен башо чачипе. Читин Михеј 4:2, 5.

О Јехова мангела те поможинел е манушенге со мангена о чачипе хем адава со и шукар. Ов вакерела ленге те мукхен и ховавни религија. О мануша со мангена е  Девле тане спремна те керен промене ко пло џивдипе те шај те овен сар Ов со мангела. Читин Откровение 18:4.

Ко прво веко, кеда о искрена мануша шунге таро апостолија со сикавела и Библија, радосно прифатинге адава. Ола таро Јехова сиклиле сар пошукар те џивдинен, те овел лен смисла хем надеж ко џивдипе. Ола тане аменге шукар пример адалеске со прифатинге о шукар хабери адалеа со чхивге е Јехова ко прво тхан ко пло џивдипе. Читин 1. Солуњаните 1:8, 9; 2:13.

О Јехова канинела адален со мукхена и ховавни религија те служинен леске заедно сар фамилија, лескере верна слугенцар. Ако прифатинеа е Јеховаскири покана, ка ове лескоро амал, ка ове дело тари адаја фамилија таро верна слуге со мангена пе јекх јекхеа хем ка добине вечно џивдипе. Читин Марко 10:29, 30; 2. Коринќаните 6:17, 18.

Шукар тано адава со панда хари и ховавни религија ка овел уништими. Соске тано адава шукар? Адалеске со ка локхјарел е манушен таро са о неправде со керела и ховавни религија. Никед побутер и ховани религија нане те ховавел хем те одвојнел е манушен. Сарине заедно ка служинен е чачутне Девлеске. Читин Откровение 18:20, 21; 21:3, 4.