Пол: Сием сине бут среќна! Ноември, 1985 берш, цидинѓем те џа ки амари прво мисионерско задача, ки Либерија (Западно Африка). Ко џајбе ачхилем ко Сенегал. И Ен вакерѓа: „Отприлика јекхе саатеске ка ова ки Либерија“. Ама, пало адава ресља јекх известување: „О патникија баши Либерија, мора те хулен таро авиони. Иси марибе баши власт“. Адалеске, деш диве ачхилем ко мисионерија ко Сенегал. Секова диве ко вести шунаја сине кај ки Либерија сине мударде бут мануша, кај иси полициски час хем кај о војникија мударена секас со на поштујнела о полициски час.

Ен: Обично, амен сием бут претпазлива. Уствари, панда сар тикни викинена ман сине и дарутни Ени. Дар уклела ман чак кеда ваљани те накхав и улица! Ама, сием сине одлучна те џа ки амари задача.

Пол: Ме хем и Ени сием бијаме ко западно дело тари Англија хем адава само офто километрија дур јекх јекхестар. О солдуј џене почминѓем е пионерско службаја одма откеда завршинѓем е средно школаја. Ман ко адава поттикнинѓе ман мле родителија, а е Ени лакири дај. Ола бут радујнѓе пе со одлучинѓем те ова ки полновремено служба хем бут поддржинена амен сине. Кеда сине ман 19 берш, сине ман чест те почминав те служинав ко Бетел, а и Ен почминѓа те служинел ко Бетел откеда женинѓем амен ко 1982 берш.

Ен: Бут мангаја сине о Бетел, ама сине амен желба те служина адари коте со сине побари потреба. Џикоте соработинаја сине хем дружинаја амен сине пхраленцар хем пхењенцар ко Бетел кола со англедер сине мисионерија, адава панда повише бајрарѓа амари желба. Трин берш секоја рат молинаја амен сине башо адава. Хем бут сием сине радосна со ко 1985 берш, добинѓем покана те ова ко 79 класи ко Гилеад! Сием сине бичхалде те служина ки Либерија (Западно Африка).

Пол: Кеда шај сине палем те летинел пе ки Либерија, уклилем одма ко прво авиони со џала сине адари. Адари и ситуација панда на сине шукар хем панда сине полициски час. Сетинава ман јекх диве ко пазари јекх врда мукхља хари погласно звуко хем тари дар о мануша почминѓе те викинен хем те нашен. Те шај те ачхова смириме секоја рат читинаја  сине нешто таро Псалмија. Ама бут мангаја сине амари задача. И Ен сине мисионерка ко подрачје, а ме сиум сине ко Бетел хем керава сине бути е пхралеа Џон Чарук. Ле сине ле баро искуство хем бут шукар хаљола сине е пхрален хем е пхењен. Шај сине бут те сикљовав лестар.

Ен: Соске добором сигате заманглем и Либерија? Себепи амаре пхраља хем пхења. Ола сикавена сине аменге баро мангипе, сине искрена хем верна. Улем паше ленцар, улем ленцар фамилија. Ленгере советија керѓе те ова позорале ко духовно поглед. И служба сине меракоске. О мануша на мангена сине те џа аменге сигате. Ки секоја страна о мануша керена сине лафи башо библиска теме. Едноставно шај сине те ачхове хем те вклучине тут ко разговор. Адалеске со сине амен бут библиска курсија сине предизвик те реса ко са. Ама адава сине јекх таро шуже проблемија!

Пол: Пало штар берш откеда џи негде сине мир, ко 1989 берш са менинѓа пе — почминѓа граѓанско војна. Ко 2 јули, 1990 берш о бунтовничка групе заробинѓе и околина узо Бетел. Трин масек нашти сине никасаја те контактирина со сине авријал тари држава, машкар коленде со сине амари фамилија хем о главно седиште. Сине баро насилство, сине хаос сегде, сине бут хари хајбаске хем бут џувља сине силујме. Адаја ситуација трајнѓа 14 берш хем влијајнѓа упри цели пхув.

Ен: Мануша таро несаве племија марена пе сине хем мударена пе сине манушенцар таро јавера племија. Сегде ко улице сине бунтовникија колен со сине лен бут оружје. Сине чудно уравде хем кхувена сине ко кхера хем лена сине со мангена. Несаве вакерена сине кај те мударен манушен тано ленге сар „те чхинен кхајна“. Ко контролна пунктија сине бут мударде мануша, а некобор асавке пунктија сине паше узо Бетел. Сине мударде хем несаве пхраља хем пхења, машкар коленде со сине амаре дуј мангле мисионерија.

О пхраља хем о пхења ризикујнена сине пумаро живото те шај те гаравен јаверен, кола со сине таро племија колен со прогонинена сине хем мударена сине. Адава исто керена сине о мисионерија хем о бетелитија. Ко телуно спрати таро Бетел, совена сине несаве пхраља хем пхења со нашле, а несаве совена сине ко амаре собе ко упруно спрати. Ки амари соба совела сине аменцар јекх фамилија хем ола сине ефта џене.

Пол: О бунтовникија секова диве пробинена сине те кхувен ко Бетел те шај те дикхен дали гараваја некас. Измислинѓем јекх начин сар те предупредина амен. Дуј џене терѓовена сине ко џами хем дикхена сине, а јавера дуј џене џана сине ки порта хем керена сине лафи е војниконцар. Ако адала дуј џене со сине ки порта икерена пумаре васта  англал, адава значинела сине кај нане нисаво проблеми. Ама, ако чхивена сине пле васта палал адава значинела сине кај о војникија тане агресивна хем тегани адала со сине ко џами џана сине сигате те гаравен е пхрален хем е пхењен.

Ен: Пало бут курке, јекх група хољаме бунтовникија кхувѓе силаја андре ко Бетел. Ме хем јекх пхен пханлем амен ко купатило, сине амен јекх шкафи хем тели лесте сине јекх тикно тхан гарајбаске. И пхен успејнѓа те кхувел андре хем гаравѓа пе. О војникија але упре пушкенцар ко вас. Почминѓе са пле силаја те кхувен ко удар. О Пол молинела лен сине: „Молинава тумен аџикерен ми ромни тани ко веце“. Џанава кај керава сине галама џикоте пхандава сине о капако таро гаравдо тхан хем џикоте иранава сине о буќа ко шкафи, хем бут дарандиљум цело тресинава сине. Со ка овел кеда ка пхравав о удар? Молинѓум ман ки манде хем душаја родинѓум таро Јехова те поможинел ман. Тегани пхравѓум о удар хем успејнѓум несар смирено те поздравинав е војникон. Јекх лендар гуринѓа ман, одма гело ко шкафи хем почминѓа те родел ко рафтија. Нашти те верујнел сине кај ништо на аракхља. Пало адава, ов хем са о војникија родинѓе ко са о собе хем ко тавани. Ама палем на аракхле ништо.

Пол: Масеконцар на сине амен скоро ништо со те ха. Икерела амен сине о духовно хајба. О единствено „сабалуко“ сине и сабалутни библиско програма, хем осетинѓем кобор сила дела амен.

Џанлем кај ако икљоваја таро Бетел те рода хајбе хем пани ка нашти сине те заштитина адален со гараваја лен сине. Хем веројатно ка овен сине мударде. Бут пути о Јехова денѓа амен адава со ваљанѓа аменге ко право време, хем адава керела сине ко начин со сине аменге сар чудо. О Јехова грижинела пе сине аменге хем поможинела амен сине те контролирина амари дар.

Кобор и ситуација ко свето овела сине полошно, добором повише о чачипе дела амен сине надеж. Бут таро амаре пхраља хем пхења мора сине те нашен те шај те спасинен пумаро живото, ама успејнѓе те ачховен смириме хем те овел лен зорали вера. Несаве чак вакерена сине кај и војна „спреминела лен баши бари неволја“. Сине храбра старешине хем терне пхраља кола со керена сине са те шај те поможинен е пхраленге. Кеда ваљани сине те нашен ко јавер тхан о пхраља хем о пхења поддржинена пе сине, почминена сине те проповединен ко неве подрачја. Ола користинена сине са со ка аракхен ки шума те шај те керен едноставна дворане хем те икерен о состанокија. Ко адала пхаре времија о состанокија хем о проповедибе бут охрабринена сине е пхрален хем дена лен сине надеж. Кеда анаја сине хајбаске, шеја хем јавера буќа, бут таро амаре пхраља родена сине ташне службаке наместо шеја. Адава бут погодинѓа амен. Бут мануша со дикхле хем со доживинѓе лошна буќа ки војна мангена сине те шунен башо шукар хабери. Нашти сине те верујнен кобор радосна хем позитивна сине о Сведокија. Ленгири светлина силно светинела сине  ки темница! (Мат. 5:14-16). Кеда дикхле кобор ревна тане амаре пхраља хем пхења, чак несаве таро адала лошна бунтовникија уле амаре пхраља.

Пол: Џикоте трајнела сине и војна, некобор пути ваљани сине те икљова тари пхув, трин пути кратко време хем дуј пути по цело берш. Јекх мисионерка бут шукар објаснинѓа сар осетинаја амен сине. Ој вакерѓа: „Ко Гилеад сикавѓе амен те кера амари задача цело амаре вилеа, хем адава керѓем да“. Хем акана кеда ваљани те мукха амаре пхрален ко асавке околностија адава керѓа амен бут тажна. Ама шукар тано со шај сине те поддржина о активностија ки Либерија таро пхувја со сине паше узи лате.

Ен: Ко мај 1996 берш, штар џене амендар цидинѓем те џа е бетелско врдаја кова со сине пхердо важна документенцар. Ваљани сине те патујна 16 километрија ко јекх побезбедно тхан, ки јавер страна тари диз. Ама баш тегани адава тхан сине нападимо. О хољаме бунтовникија почминѓе те пукајнен ко воздух. Ачхавкерѓе амен хем амен е тринен икалѓе амен аври, леле амаро врда хем продолжинѓе те возинен, а о Пол сине панда андре. Ачхилем ки улица шокириме. Тегани таро јекх пути дикхлем сар о Пол тари гужва авела ки аменде, лескоро чекат сине ратвало. Ки цели адаја буна мислинѓем кај тано ранимо, ама халилем кај ако тано ранимо ка нашти те пхирел. Јекх таро бунтовникија кхувѓа ле кеда икалѓа ле таро врда. Среќаке сине само хари повредимо.

Паше сине јекх воено камиони кова со сине пхердо манушенцар со дарана сине. Адалеске со андре на сине тхан тло про кај те чхиве, ваљани сине те икера амен тари авруни страна ки приколка. О шофери добором сигате возинела сине со едвај икераја амен сине. Молинаја ле сине те ачховел ама дарала сине. Несар издржинѓем, ама кеда ачхило о камиони цело тресинаја сине, хем тари дар хем таро умор.

Пол: Тегани дикхлем амен хем са сием сине мелале, амаре шеја сине пхаравде хем нашти сине те верујна кај панда сием џивде. Суќем авријал ки јекх нива узо јекх хеликоптери, кова со са сине кхувдо хем погодимо таро куршумија хем колеа со о тајсутно диве гелем ки Сиера Леоне. Сием сине благодарна со ачхилем џивде, ама исто аѓаар сием сине бут секириме башо амаре пхраља ки Либерија.

Ен: Кеда реслем ко Бетел ко Фритаун (Сиера Леоне), сием сине безбедна хем о пхраља бут шукар грижинѓе пе аменге. Ама, почминѓе те иранен пе манге са о лошна буќа со случинѓе пе ки Либерија. Дивескоро са дарава сине кај ка случинел пе нешто лошно хем нашти сине шукар те размислинав. А раќате бут пути уштава сине хем сиум сине жрка пани, цело тресинава сине хем са мислинава сине кај нешто лошно ка овел аменге, нашти сине те дишинав. Тегани о Пол гушинела ман сине хем молинела пе сине заедно манцар. Гиљаваја сине теократска гиља са џикоте на чхинавава сине те тресинав. Мислинава сине кај нашавава мли годи хем кај нашти више те служинав сар мисионерка.

Никогаш нане те бистрав со случинѓа пе тегани. Ко исто адава курко добинѓем дуј списанија. Јекх лендар сине Џангавѓовен! 8 септември 1996 берш. Ки лесте сине јекх статија е насловеа: „Соочување со нападите на паника“. Тегани халиљум со значинена мле симптомија. А о дујто сине Стражарско кула таро 15 мај 1996 берш, коте со сине и статија „Откаде ја добиваат својата сила?“ Ки кула сине јекх слика тари јекх повредими пеперутка. Ки статија сине објаснимо кај исто сар со јекх пеперутка шај понадари да те хранинел пе хем те летинел иако иси ла повредиме пака, амен да е Јеховаскере силаја шај понадари да те поможина е јаверенге иако амен да коркори сием емоционално дукхавде. О Јехова денѓа амен сила преку и духовно храна ко право време (Мат. 24:45). Бут истражинава сине хем керѓум манге јекх папка коте со керела пе сине лафи баши адаја тема. Адава бут поможинѓа ман хем сар накхела сине о време о симптомија со сине ман адалеске со доживинѓум трауме хем стрес похари накхена сине.

Пол: Кеда хем те ирана амен сине ки Либерија сием сине бут радосна. Ко крајо таро 2004 берш, ки Либерија служинаја сине више околу 20 берш. И војна више завршинѓа. Ко Бетел керена пе сине планија башо јекх градежно проекти. Ама бизо те очекујна пучле амен дали ка прифатина неви задача.

 Адава сине баро испит аменге. Пхаро сине аменге те мукха амаре духовно фамилија адалеске со сием сине бут паше. Ама, кеда мукхлем амаре фамилија те шај те џа ко Гилеад, дикхлем кај ако мукхаја амен е Јеховаске ко васта ов благословинела амен хем адалеске прифатинѓем и неви задача. Адава значинела сине кај ваљани те џа ки Гана.

Ен: Бут рунѓем кеда гелем аменге тари Либерија. Изненадинѓем амен кеда о Френк, јекх мудро хем попхуро пхрал, вакерѓа аменге: „Мора те бистрен амен!“ Ама тегани објаснинѓа: „Џанаја кај никогаш нане те бистрен амен, ама акана цело вилеа мора те концентриринен тумен ки тумари неви задача. Акаја задача туменге таро Јехова адалеске концентриринен тумен ко пхраља хем ко пхења адари“. Адава денѓа амен сила те трудина амен те кера аменге неве амала ко тхан коте со скоро на џанаја сине никас хем коте со са сине аменге нево.

Пол: Ама на ваљанѓа аменге бут време те шај те заманга амаре неве духовно фамилија ки Гана. Адатхе иси бут Сведокија! Бут сиклилем тари бари вера со сине амаре амален. Ки Гана служинѓем 13 берш, хем тегани ало јекх нево изненадување. Сием сине замолиме те служина ко Бетел ки Источно Африка, Кенија. Фалинена аменге сине амаре амала таро пхувја коте со англедер служинаја сине, ама одма осетинѓем амен паше амаре верна пхраленцар хем пхењенцар ки Кенија. Хем панда служинаја акате ко јекх баро подрачје коте со иси бари потреба.

Ен: Ко берша со накхле бут пути случинѓа пе манге те тресинав тари дар. О опасна хем о стресна ситуацие ко живото, шај те мукхен белегија хем ко физичко хем ко емоционално поглед. О Јехова на заштитинела амен чудоја таро адава. Чак авдиве да, кеда шунава пукајбе, почминела те чхадел пе манге хем трнонена мле васта. Ама сиклиљум те овел ман доверба ко Јехова хем те користинав са адава со ов керела те шај те дел амен сила, сар на пример преку амаре пхраља хем пхења. Хем халиљум кај ако иси амен шукар хем редовно духовно рутина, о Јехова шај те поможинел аменге те издржина ки амари задача.

Пол: Понекогаш, некој ка пучел: „Мангена ли тумари задача?“ Оја, иси бут шуже пхувја, ама и ситуација ки ленде шај бут локхе те менинел пе хем те овел опасно. Тегани сој тано адава со мангаја повише него и пхув коте со служинаја? Амаре мангле пхрален хем пхењен, амаре фамилија. Шај сием таро различно потекло, ама сарине исто размислинаја. Мислинѓем кај сием бичхалде амен те охрабрина лен, ама уствари ола охрабринѓе амен.

Секова пути кеда џаја јавертхе те служина, дикхаја чачутно чудо, амаро пхралипе. Са џикоте сием дело таро несаво собрание, амен иси амен фамилија, иси амен кхер. Увериме сием кај ако понадари да иси амен доверба ко Јехова, ов ка дел амен сила те издржина бизи разлика со ка случинел пе (Фил. 4:13).