БЕРШЕНЦАР, о критичарија е Библијакере вакерена сине кај о Валтазар, кова сој спомнимо ко библиско лил Даниел, тано измислими личност (Дан. 5:1). Ола верујнена сине ко акава соске о археолозија на успејнѓе те аракхен доказија кај о Валтазар чаче постојнѓа. Ама, акава менинѓа пе ко 1854 берш. Соске?

Адава берш, јекх британско конзули со викинела пе Џон Тејлор истражинѓа о рушевине тари пурани диз Ур, кола со аракхљовена ко јужно дело таро авдисутно Ирак. Адари, ки јекх бари кула, акава истражувачи аракхља некобор цилиндрија тари глина. Секова јекх лендар сине дугачко околу 10 сантимија хем сине ле натпис клинесто писмоја. Ко јекх лендар сине пишими и молитва башо баро живото е вавилонско царескоро о Набонид хем лескере најбаре чхавескоро, о Валтазар. Чак о критичарија да мора сине те признајнен — акава сине доказ кај о Валтазар чаче постојнела сине.

Ама, и Библија вакерела кај о Валтазар на само со постојнела сине него исто аѓаар кај сине цари. О критичарија на согласинѓе пе ни адалеа. На пример, о Вилијам Талбот, јекх англиско научнико таро 19 веко, пишинѓа: „Несаве вакерена кај о Велсарусур [Валтазар] владинѓа ко исто време пле дадеа, о Набонид. Ама башо акава нане нисаве доказија“.

Акаја дилема сине решими кеда таро натписија таро јавера цилиндрија сине откримо кај о дад е Валтазарескоро, о цари о Набонид, понекогаш сине авријал таро Вавилон чак по некобор берш. Со случинела пе сине џикоте ов на сине адатхе? Спрема јекх енциклопедија, „кеда на сине ки пли пхув, о Набонид мукхела сине о престол е Валтазареске хем мукхела сине леске баро дело тари војска“ (Encyclopaedia Britannica). Ко адава време, о Валтазар владинела сине ко Вавилон ко тхан пле дадескоро. Адалеске, о Ален Милерд, јекх археолого хем лингвисти, вакерела кај тано соодветно со „ко лил Даниел, башо Валтазар вакерела пе кај тано ’цари‘“.

Џанѓола пе, е Девлескере слугенге, ки Библија иси о најважна доказија кај о лил Даниел тано веродостојно хем тано таро Девел (2. Тим. 3:16).