Амен сар е Јеховаскере сведокија, трудинаја амен те икера адава со сикавела сине о Исус хем те служина е Девлеске сар со керѓе о апостолија. Ки акаја статија кратко ка објаснина амаре основна верувања.

1.   Девел. Амен обожавинаја е единствено чачутне Девле, кова сој Семоќно хем со керѓа са. Лескоро анав тано Јехова (Псалм 83:18; Откровение 4:11). Леске служинена сине о Авраам, о Мојсеј хем о Исус (2. Мојсеева 3:6; 32:11; Јован 20:17).

2.   Библија. Амен дикхаја ки Библија сар лил кова со авела таро Девел дендо са е манушенге (Јован 17:17; 2. Тимотеј 3:16). Амаре верувања темелинаја лен ко са о 66 лила со иси ки лате, кола сој дело таро „Пурано завет“ хем таро „Нево завет“. Башо акава о професори Џејсон Бедун вакерѓа кај е Јеховаскере сведокија темелинена „пле верувања хем пле постапке само ко адава со пишинела ки Библија, бизо англедер те претпоставинен песке кај адава пишинела ки лате“. a

    Амен прифатинаја цели Библија, ама адава на значинела кај секова лафи ваљани те хаљова ле дословно. Хаљоваја кај несаве делија ки Библија тане пишиме ко симболично начин хем кај на ваљани дословно те хаљова лен (Откровение 1:1).

3.   Исус. Амен икераја адава со сикавѓа о Исус, џаја пало лескоро пример хем поштујнаја ле сар амаро спасители хем сар е Девлескоро Чхаво (Матеј 20:28; Дела 5:31). Значи, амен сием христијања (Дела 11:26). Ама, тари Библија сикљоваја кај о Исус нане Семоќно Девел хем кај нане библиско основа те верујна ко Тројство (Јован 14:28).

4.   Е Девлескоро Царство. Адаја тани чачутни влада сој тани ко небо, а на ко виле е христијаненгере. Ов ка заменинел са о манушикане владе хем ка керел те исполнинел пе е Девлескири намера ки Пхув (Даниел 2:44; Матеј 6:9, 10). Адава ка овел бут сигате, соске о библиска пророштвија сикавена кај живинаја ко „последна диве“ (2. Тимотеј 3:1-5; Матеј 24:3-14).

    О Исус тано Цари ко е Девлескоро Царство ко небо. Ов почминѓа те владинел ко 1914 берш (Откровение 11:15).

5.   Спасибе. Преку и откупно жртва е Исусескири ослободиме сием таро грево хем таро мерибе (Матеј 20:28; Дела 4:12). Те шај о мануша те овен лен корист тари акаја откупно жртва нане доволно само те верујнен ко Исус него ваљани те керен промене ко пло живото хем те крстинен пе (Матеј 28:19, 20; Јован 3:16; Дела 3:19, 20). И вера сикавела пе постапкенцар (Јаков 2:24, 26). Ама адава на значинела кај амен заслужинаја о спасение. Адава и доказ башо е Девлескоро шукарипе со на заслужинаја ле (Галатите 2:16, 21).

6.   Небо. О Јехова о Девел, о Исус Христос хем о верна ангелија тане ко небо b (Псалм 103:19-21; Дела 7:55). Само јекх тикно број таро мануша — 144.000 — ка овен воскресниме те живинен ко небо те шај те владинен е Исусеа ко е Девлескоро Царство (Даниел 7:27; 2. Тимотеј 2:12; Откровение 5:9, 10; 14:1, 3).

7.   Пхув. О Девел керѓа и пхув те шај о мануша вечно те живинен ки лате (Псалм 104:5; 115:16; Проповедник 1:4). О Девел е послушно манушенге ка дел совршено састипе хем вечно живото ко рај ки Пхув (Псалм 37:11, 34).

8.   Лошнипе хем муке. О лошнипе хем о муке појавинѓе пе кеда јекх ангели бунинѓа пе против о Девел (Јован 8:44). Адава ангели, кова со уло против о Девел хем пало адава сине леске денде анава „Сатана“ хем „Бенг“, убединѓа е прво манушен те овен тари лескири страна хем адава анѓа баре последице са е манушенге (1. Мојсеева 3:1-6; Римјаните 5:12). Те шај те дел пе одговор ко спорна пучиба, о Девел мукхља те овел лошнипе хем муке, ама ов нане те мукхел ола засекогаш те трајнен.

9.   Мерибе. О мануша со мерена више на постојнена (Псалм 146:4; Проповедник 9:5, 10). Ола на мучинена пе ко пекол.

    О Девел ка воскреснинел буте манушен со муле (Дела 24:15). Ама окола со пало пло воскресение ка одбинен те икерен пе ко е Девлескере мерилија, ка овен уништиме засекогаш, бизи надеж палем те воскреснинен (Откровение 20:14, 15).

10.   Фамилија. Амен икераја амен ко е Девлескоро мерило кај о брако ваљани те овел заедница машкар јекх мурш хем јекх џувли. Единствено причина башо развод тани и прељуба (Матеј 19:4-9). Увериме сием кај и мудрост тари Библија поможинела те шај о фамилие те овен успешна (Ефешаните 5:22—6:1).

11.   Амаро обожавибе. На користинаја крсто, иконе хем кипија (5. Мојсеева 4:15-19; 1. Јованово 5:21). Е Девле обожавинаја ле ко акава начин:

    •   Молинаја амен е Девлеске (Филипјаните 4:6).

    •   Читинаја хем проучинаја и Библија (Псалм 1:1-3).

    •   Размислинаја башо адава со сикљоваја тари Библија (Псалм 77:12).

    •   Кхедаја амен те молина амен заедно, те проучина и Библија, те гиљава, те кера лафи башо адава ко со верујнаја, хем те охрабрина амен амаре пхраленцар хем е јаверенцар (Колошаните 3:16; Евреите 10:23-25).

    •   Проповединаја „о шукар хабери башо царство“ (Матеј 24:14).

    •   Поможинаја адаленге каске со ваљани помош (Јаков 2:14-17).

    •   Градинаја хем одржинаја амаре дворане хем исто аѓаар јавера да објектија кола со користинена пе те шај те проповединел пе панда повише о шукар хабери тари Библија (Псалм 127:1).

    •   Поможинаја кеда иси природна катастрофе (Дела 11:27-30).

12.   Амари организација. Организириме сием ко собранија, хем секова собрание тано надгледимо таро некобор старешине. Ама, акала старешине нане свештеникија хем на приминена плата баши бути со керена ла (Матеј 10:8; 23:8). На даја десеток хем на кхедаја прилогија ко амаре состанокија (2. Коринќаните 9:7). Са амаре активностија финансиринена пе доброволна прилогонцар.

     О Водечко тело тани тикни група таро зрела христијања кола со керена бути ко амаро главно седиште. Ола дена упатствија е Јеховаскере сведоконге ко цело свето (Матеј 24:45).

13.   Јекхипе. О буќа коленде со верујнаја тане иста ко цело свето (1. Коринќаните 1:10). Машкар аменде на делинаја амен ко социјална, расна, етничка хем ко класна групе (Дела 10:34, 35; Јаков 2:4). Адава со сием ко јекхипе на значинела кај нане амен амаро лично мислење или избор. Секова Сведоко одлучинела коркори песке, спрема пли совест која тани обликујми спрема о библиска мерилија (Римјаните 14:1-4; Евреите 5:14).

14.   Амаро понашибе. Трудинаја амен са со кераја те овел таро мангипе спрема о јавера (Јован 13:34, 35). На кераја адава со на мангела о Девел. Сар на пример, на приминаја рат соске адалеа злоупотребинаја о рат (Дела 15:28, 29; Галатите 5:19-21). Амен сием мирно народо хем на учествујнаја ко војне (Матеј 5:9; Исаија 2:4). Поштујнаја и влада коте со живинаја хем икераја амен ко лакере законија са џикоте на џана против е Девлескере законија (Матеј 22:21; Дела 5:29).

15.   Амаре односија е јаверенцар. О Исус денѓа заповед: „Манг те пашутне сар коркори тут“. Исто аѓаар вакерѓа кај о христијања „нане дело таро акава свето“ (Матеј 22:39; Јован 17:16). Адалеске трудинаја амен „те кера шукарипе сариненге“, ама на мешинаја амен ко политичка буќа хем на сием поврзиме јавере религиенцар (Галатите 6:10; 2. Коринќаните 6:14). Ама, поштујнаја е јаверенгоро избор башо акала буќа (Римјаните 14:12).

 Ако иси тут јавера да пучиба башо адава ко со верујнена е Јеховаскере сведокија, шај те читине баши аменде ки амари интернет-страна, пишин џи ки јекх таро амаре подружнице, ава ко амаре состанокија или лично кер лафи јекхе Јеховаскере сведокоја.