Jovan 11:1-57
11 Jekh manuš so vikinela pe sine Lazar sine nasvalo. Ov sine tari Vitanija, o gav kotar so sine i Marija hem lakiri phen i Marta.
2 I Marija sine adaja koja so pokasno čhorgja upro Gospodari mirislivo maslo hem koslja leskere pre ple balencar. Lakoro phral o Lazar sine nasvalo.
3 Adaleske o phenja e Lazareskere bičhalgje haberi dži ko Isus: „Gospodare tlo manglo amal tano nasvalo“.
4 Keda o Isus šungja adava, vakergja: „Akava nasvalipe nane te anel meribe, nego ka anel slava e Devleske hem čest e Devleskere Čhaveske“.
5 O Isus mangela sine e Marta, lakere phenja hem e Lazare.
6 Ama, keda šungja kaj o Lazar tano nasvalo, ov ačhilo panda duj dive ko than kote so sine.
7 Palo adava vakergja ple učenikonge: „Ajde palem te dža ki Judeja“.
8 A o učenikija vakergje leske: „Rabi,* samo so mangle o Judejcija te mudaren tut barencar. Zarem palem ka dža adari?“
9 O Isus odgovoringja lenge: „Nane li ko dive 12 saatija svetlina? Ako nekoj phirela diveskoro, nane te sopkinel pe soske dikhela i svetlina akale svetoskiri.
10 Ama ako nekoj phirela rakjate, ka sopkinel pe soske nane svetlina ki leste“.
11 Palo adava ov vakergja: „Amaro amal o Lazar zasukja, ama me džava adari te vazdav le taro sojbe“.
12 A o učenikija vakergje leske: „Gospodare, ako sovela tegani ka ovel leske pošukar“.
13 Ama o Isus kerela sine lafi bašo e Lazareskoro meribe, a ola mislinena sine kaj ov kerela lafi bašo obično sojbe.
14 Tegani o Isus otvoreno vakergja lenge: „O Lazar mulo.
15 Radujnava man so na sium sine adathe, soske adava so ka kerav, ka kerel tumari vera pozorali. Ajde te dža ki leste“.
16 Tegani o Toma, so vikinena le sine Bliznako, vakergja e javere učenikonge: „Te dža amen da hem te mera lea“.
17 Keda o Isus reslja, vakergje leske kaj o Lazar tano više štar dive ko grobo.
18 A i Vitanija sine okolu trin kilometre* paše uzo Erusalim.
19 A but Evreija više ale ki Marta hem ki Marija te utešinen len adaleske so mulo lengoro phral.
20 Keda i Marta šungja kaj avela o Isus, iklili hem geli ki leste, a i Marija ačhili khere.
21 Tegani i Marta vakergja e Isuseske: „Gospodare, te ove sine tu akate, mo phral nane te merel sine.
22 Ama akana da džanava kaj o Devel ka del tut sa so ka rode lestar“.
23 O Isus vakergja lake: „Tlo phral ka uštel“.
24 A i Marta vakergja leske: „Džanava kaj ka uštel keda ka ovel o voskresenie ko posledno dive“.
25 Tegani o Isus vakergja lake: „Me sium o voskresenie hem o životo. Koj sikavela vera ki mande, te merel da, palem ka živinel.
26 Hem sekoj so živinela hem sikavela vera ki mande, nikogaš nane te merel. Verujnea li ko akava?“
27 Oj odgovoringja leske: „Oja Gospodare, me verujnava kaj tu sian o Hristos, o Čhavo e Devleskoro, okova kaske so sine prorokujmo kaj ka avel ko sveto“.
28 Keda vakergja adava, geli hem vikingja ple phenja e Marija, hem vakergja lake bizo o javera te šunen: „O Učiteli tano akate hem vikinela tut“.
29 Keda šungja adava, i Marija sigate uštili hem geli ko Isus.
30 O Isus panda na alo ko gav, nego ačhilo ko than kote so arakhlja pe e Martaja.
31 Keda o Evreija so ale ko kher te utešinen e Marija, dikhle kaj oj sigate uštili hem iklili, gele pali late soske mislingje kaj oj džala ko grobo te rovel adari.
32 Keda i Marija reslja ko Isus, peli anglo leskere pre hem vakergja: „Gospodare, te ove sine tu akate mo phral nane te merel sine“.
33 Keda o Isus dikhlja sar rovela oj hem sar rovena o Evreija so ale laja, sine leske but pharo hem sine tažno.
34 Tegani ov pučlja len: „Kote parungjen le?“ Ola odgovoringje leske: „Gospodare, ava hem dikh“.
35 O Isus počmingja te rovel.
36 Keda dikhle adava o Evreija, vakergje: „Dikhen kobor mangela le sine!“
37 A nesave vakergje: „Akava manuš so kergja o korolo te dikhel, našti li sine te kerel o Lazar te na merel?“
38 E Isuseske palem sine but pharo hem gelo dži ko grobo. Adava sine jekh peštera, a angli late sine jekh baro bar.
39 O Isus vakergja: „Ciden o bar!“ A i Marta, i phen e muleskiri, vakergja leske: „Gospodare, dži akana ov sigurno khandela, soske nakhle štar dive sar mulo“.
40 O Isus vakergja lake: „Na vakergjum li tuke kaj ako verujnea, ka dikhe kobor baro tano o Devel?“*
41 Tegani cidingje o bar. A o Isus dikhlja ko nebo hem vakergja: „Mo Dad, blagodarinava tuke so šungjan man.
42 Me džanljum kaj tu sekogaš šunea man, ama akava vakergjum bašo narodo so tergjola akate, te verujnel kaj tu bičhalgjan man.“
43 Otkeda vakergja adava, glasno vikingja: „Lazar, ikljov!“
44 Hem o mulo iklilo. Leskere vasta hem leskere pre sine pakjarde zavoja, a leskoro muj sine pakjardo platnoja. O Isus vakergja lenge: „Phraven le hem mukhen le te phirel!“
45 Agjaar, but Evreija kola so ale ki Marija, keda dikhle so kergja o Isus, verujngje ki leste.
46 A nesave lendar gele ko fariseija hem vakergje lenge so kergja o Isus.
47 Adaleske o glavna sveštenikija hem o fariseija, rodingje te khedel pe o Sudsko sovet* hem vakergje: „So te kera? Akava manuš kerela but čudija!
48 Ako mukhaja le agjaar, sarine ka verujnen ki leste. Tegani ka aven o Rimjanja hem ka len amendar amaro hrami hem amare narodo“.
49 Ama jekh lendar, o Kajafa, kova so adava berš sine prvosvešteniko, vakergja lenge: „Tumen na džanena ništo
50 hem na haljona kaj pošukar ka ovel tumenge, jekh manuš te merel bašo narodo, nego celo nacija te ovel uništimi“.
51 Ama adava na vakergja le korkori pestar, nego adaleske so adava berš sine prvosvešteniko, ov prorokujngja kaj o Isus ka merel bašo narodo,
52 hem na samo bašo narodo, nego hem te khedel e Devleskere čhaven soj tane rasturime.
53 Agjaar, taro adava dive počmingje te dogovorinen pe sar te mudaren le.
54 Adaleske o Isus na phirela sine više javno maškar o Evreija, nego adathar gelo paše uzi pustina, ki diz koja so vikinela pe Efrem hem adathe ačhilo ple učenikoncar.
55 A avela sine o vreme te slavinel pe o evrejsko prazniko Pasha* hem but džene taro adava than gele ko Erusalim te šaj angleder i Pasha te očistinen pe sar so rodela e Mojseeskoro zakoni.
56 O manuša rodena sine e Isuse, hem džikote sine ko hrami ola pučena pe sine jekh jekhea: „So mislinea, ka avel li praznikoske ili na?“
57 A o glavna fariseija hem o sveštenikija zapovedingje kaj sekoj so ka džanel kote tano o Isus, mora te javinel lenge te šaj te astaren le.
Footnotes
^ Dikh i fusnota bašo Matej 23:7.
^ Doslovno: „okolu 15 stadie“. Jekh stadija tani 185 metre.
^ Ili: „e Devleskiri slava“.
^ Dikh i fusnota bašo Matej 26:59.
