2 LEKCIJA
Koj tano o Devel?
1. Soske valjani te služina e Devleske?
O čačutno Devel kergja sa. Leste nane le početok hem niked nane te ovel le kraj (Psalm 90:2). Lestar avela o šukar haberi tari Biblija (1. Timotej 1:11). Adaleske so o Devel dengja amen dživdipe, valjani samo leske te služina. Čitin Otkrovenie 4:11.
2. Savo tano o Devel?
Nijekh manuš na dikhlja e Devle soske ov tano Duho, adava značinela kaj leskoro dživdipe tano poupreder taro e manušeskoro, kova so dživdinela ki Phuv (Jovan 1:18; 4:24). Šaj te dikha savo tano o Devel taro bukja so kergja len. Na primer, adava so isi različna ovošja hem lulugja sikavela amenge leskoro mangipe hem mudrost. Adava kobor tano baro o nebo hem i Phuv sikavena kaj isi le bari sila. Čitin Rimjanite 1:20.
Panda pobuter šaj te džana bašo Devel ako čitinaja i Biblija. Na primer, oj vakerela amenge so mangela o Devel a so na mangela, sar postapinela e manušencar hem so kerela ko različna situacie. Čitin Psalm 103:7-10.
3. Isi li e Devle anav?
O Isus vakergja: ,Amaro Dad so sian ko nebo, te slavinel pe tlo sveto anav‘ (Matej 6:9). Iako e Devle isi le but titule, leste isi le samo jekh anav. Ki sekoja čhib, ov različno vakerela pe. Ko romane tano „Jehova“, ili palem „Jahve“. Čitin Psalm 83:18.
E Devleskoro anav sine ikaldo taro but Biblie hem ko leskoro than bešena o titule Gospod ili Bog. Ama, keda sine pišimi i Biblija, ki late paše 7.000 puti bešela sine e Devleskoro anav. O Isus vakerela sine e Devleskoro anav e manušenge keda sikavela len sine. Čitin Jovan 17:26.
Dikh o videoklipi Dali e Devle isi le anav?
4. Dali o Jehova grižinela pe amenge?
Sar akava zagrižimo dad, o Devel grižinela pe keda amenge pharo
Dali adava so isi but problemija hem pharipe sikavela kaj o Jehova tano Devel so na grižinela pe amenge? Nesave mislinena kaj ov mukhela te mučina amen adaleske so mangela te iskušinel amen, ama adava nane čače. Čitin Jakov 1:13.
O Devel dengja e manušeske korkori te birinel so te kerel. Zarem na valjani te cenina akava pravo so šaj korkori te birina te služina e Devleske? (Isus Navin 24:15). Ama, but džene birinena te keren lošnipe e javerenge, adaleske but manuša cidena. E Jehovaske tano but pharo so dikhela asavki nepravda. Čitin 1. Mojseeva 6:5, 6.
O Jehova tano Devel so grižinela pe amenge. Ov mangela te uživina ko dživdipe. Panda hari ov ka cidel sa o dukha hem okolen so kerena o javera te ciden. Džikote na kerela adava, e Devle isi le šukar pričina so adžikerela nesavo vreme. Ki 8-to lekcija ka sikljova koja tani adaja pričina. Čitin 2. Petrovo 2:9; 3:7, 13.
5. Sar šaj te ova paše e Devlea?
O Jehova mangela te ova lea paše agjaar so ka kera lea lafi ki molitva. Ov interesinela pe sekole manušeske (Psalm 65:2; 145:18). Ov tano spremno te prostinel. O Devel dikhela kobor mangaja te kera adava so ov rodela, čak keda disavo puti grešinaja. Iako siem nesovršena, amen šaj te ova paše lea. Čitin Psalm 103:12-14; Jakov 4:8.
Adaleske so o Jehova dengja amen dživdipe, valjani te manga le pobuter taro sa (Marko 12:30). Ka sikava kaj mangaja le ako sikljovaja baši leste hem keraja sa so rodela amendar hem tegani ka ova sa popaše lea. Čitin 1. Timotej 2:4; 1. Jovanovo 5:3.
