O Devel dengja e manušenge jekh posebno poklon — i sposobnost te komunicirinen lea hem te vakeren leske ple čuvstvija ki molitva. O pekamberi o Dauti (David) vakergja: „Tu sian adava so šunela o molitve, ki tute avela sekova manuš“ (Psalm 65:2). Ama sar valjani te molina amen te šaj o Devel te šunel amare molitve hem te del amen bereketi?

Adava so ka moline tut tle lafencar ka pomožinel tuke te vakere leske sa so pašljola tuke ko vilo, javere lafencar te vakere leske sar osetinea tut (Psalm 62:8). O Semokjno Devel ceninela o iskrena molitve so avena taro vilo.

Iako e Devle isi le but titule, isi le samo jekh anav. Ko e Devleskoro Lafi pišinela: „Me sium o Jehova. Adava tano mo anav“ (Isaija 42:8). O anav Jehova pojavinela pe okolu 7.000 puti ko e Devleskoro Lafi. But pekamberija koristinena sine e Devleskoro anav keda molinena pe sine leske. O Ibrahimi vakergja leske: „Molinava tut Jehova... mukh man te vakerav [tuke] panda nešto“ (1. Mojseeva 18:30). Amen da valjani te koristina e Devleskoro anav, Jehova, keda molinaja amen.

Bizi razlika ki koja čhib keraja lafi, o Devel haljola amare misle hem čuvstvija. Leskoro Lafi uverinela amen: „O Devel nane pristrasno, nego ov tari sekoja nacija prifatinela okole so darala lestar hem kerela adava soj pravedno“ (Dela 10:34, 35).

Ama, te šaj te dobina bereketija taro Devel, nane dovolno samo te molina amen. Ko sledna statie ka dikha so javer valjani te kera.