O prorok Mojsije phenđa so ako šunaja e Devlese zapovestija, ov ka blagoslovini amen (Ponovljeni zakoni 10:13; 11:27). Amen na šunaja e Devle odolese so daraja so ka kaznini amen. E Devlese šukar osobine podstakninena amen te šuna le odolese so mangaja le hem na mangaja te ćera diso so ka povredini le. „O mangipe premalo Devel značini te ićera olese zapovestija“ (1. Jovanova 5:3).

Sar šaj te dobina e Devleso blagoslov ako šunaja le? Hajde te dikha duj načinija.

„Me, o Jehova, me hijum to Devel, kova sikavi tut te šukaripase hem kova legari tut drumoja koleja valjani te đa.“ (ISAIJA 48:17)

O Jehova, amaro Stvoritelj, penđari amen hem dela amen vođstvo kova valjani amenđe. Ako mangaja olese sikljoviba te pomožinen amenđe te ana mudra odluke, valjani te sikljova ando oleso Lafi so ov mangela te ćera hem te primenina odova.

„Bahtale tane okola so šunena e Devleso lafi hem ićerena le!“ (LUKA 11:28)

Avdije milionija manuša kola šunena e Devleso Lafi tane ćaće bahtale. Na primer, jekh manuš andi Španija hine le but lošno navika te holjani sigate hem ponašinđa pe grubo premalo avera, ćak premali pi romni. Jekh dive ov čitinđa so o prorok Mojsije pisinđa ando e Jakoveso ćhavo, o Josif, kova hine blago. Iako o Josif hine bikimo sar robo hem nepravedno phanlo, ov aćhilo blago, smireno hem hine spremno te oprostini. (Postanak, o poglavlja 37–45). O manuš andi Španija phenđa: „Ked razmislinđum ando e Josifeso primer, odova podstakninđa man te razvijinav blagost, šukaripe hem samokontrola. Odolese, akana isi man bahtalo đivdipe.“

Ko e Devleso Lafi arakhaja but savetija sar te ponašina amen averencar. Ko aver članko ka vaćera pobuter odolestar.