ΚΕΦΑΛΑΙΟΣ 35

Σαρ Μπορίναβα τι Αβάβ Αμάλ ι Ντεβλέσαρ;

Εκ πρόβλημας σο νακχλάς ο Τζέρεμι βοηθιντάς-λες τι αγαβέλ καζόμ σημαντικός ισί τι αβέλ αμάλ ι Ντεβλέσαρ. «Κάνα ισινόμας 12 μπρεσένγκο, μο ντατ μουκχλάς-αμέν ντα νασλό» βοβ βακερέλα. «Εκ ιράτ κεράβας προσευχή μι κρεβατίστε ντα μολίναβας ι Ιεχωβάς τι κερέλ μι νταντές τι βουρτίνελ παλάλ».

Κάνα ισινέ απελπισμέ, ο Τζέρεμι αρχισάλο τι διαβάνελ πι Γραφή. Κάνα ντικχλάς ο εδάφιος Ψαλμός 10:14, λιντάς-λες ροϊπέ. Ανταβά εδάφιος βακερέλα ι Ιεχωβάσκε: «Τούτε μουκχέλα πο νεαυτός ο τζενό σο τσσίντελα μπουτ. Τούι ισινάν βοηθός ι τσσαβέσκε σο να τθερέλα νταντές». Ο Τζέρεμι βακερέλα: «Νιωσάλομ ότι ο Ιεχωβά κερέλας μάντζαρ λάφι ντα βακερέλας μάνγκε ότι βοβ ισινέ μο βοηθός, μο Ντατ. Καβά ντατ κα μπορίνελας τι αβέλ πο λατσσό λέσταρ;»

 ΕΙΤΕ νακχέσα τούι-ντα κάτι ασακό σαρ ο Τζέρεμι είτε όχι, η Γραφή σικαβέλα ότι ο Ιεχωβά μανγκέλα τι αβέλ τούσαρ αμάλ. Επίσης, η Γραφή βακερέλα: «Τζαν πασέ κο Ντεβέλ, ντα βοβ κα αβέλ πασέ τουμέντε». (Ιακώβου 4:8) Σκέφτινε σο μανγκένα τι βακερέν ανταλά λάφια: Παρόλο σο ναστί ντικχέσα ι Ιεχωβά Ντεβλές—ντα ισινάν μπουτ χουρντό ανγκλά-λέστε—βοβ καλίνελα-τουτ τι αβές λέσκο αμάλ!

Αλλά για τι αβές αμάλ ι Ντεβλέσαρ πρέπει τι κερές τούι-ντα κάτι. Σκέφτινε ακαβά παράδειγμας: Βάκερ ότι τθερέσα εκ λουλούδι τι κχερέστε, τζανέσα ότι να μπορίνελα κορκορό τι ατσσόλ ντα τι μπαριόλ. Για τι μπορίνελ τι μπαριόλ πρέπει τι φροντίνες-λες, τι τσσουβές λέσκε συνέχεια πανί ντα τι τθερές-λες σε εκ τθαν σο κα βοηθίνελ-λες τι μπαριόλ. Ο ίδιος αβέλα-πες εμ κι φιλία ι Ντεβλέσαρ. Σαρ μπορίνεσα τι μπαριαρές τι φιλία ι Ντεβλέσαρ;

Η Μελέτη Ισί Μπουτ Σημαντική

Για τι αβές αμάλ εκχέ τζενέσαρ πρέπει εμ τι ασουνές εμ τι κερές λάφι. Ο ίδιος αβέλα-πες με τη φιλία ι Ντεβλέσαρ-ντα. Κάνα διαβάνασα ι Γραφή, ασουνάσα σαρέ οντουλά σο τθερέλα τι βακερέλ αμένγκε ο Ντεβέλ.—Ψαλμός 1:2, 3.

Βέβαια, μπέκιμ ο διάβασμας μα τι αβέλ το πο αγαπημέ πράγμας. Μπουτ τερνέ μπεϊντίνενα πο μπουτ τι ντικχέν τηλεόραση, τι κχελέν καέκ παιχνίδι ή απλά τι νακχέν πουμαρό σαάτι πουμαρέ αμαλέντζαρ. Αλλά, άμα μανγκέσα τι τθερές εκ λατσσί φιλία ι Ντεβλέσαρ, να αβέλα-πες γιαβέρτουλους. Χρειαζίντιβελα τι ασουνές-λες, δηλαδή τι διαβάνες λέσκο Λάφι.

Μα άγχωνε, όμως. Ο διάβασμας ι Γραφιάκο να χρειαζίντιβελα τι κερές-λες ζορίσαρ. Μπορίνεσα τι σικλιός τι απολαμβάνες-λες—ατζέ-ντα άμα τζανέσα ότι να μπεϊντίνεσα ο διάβασμας. Ο πρώτος πράγμα σο μπορίνεσα τι κερές ισί τι αρακχές καβά σαάτι κα μπορίνεας τι διαβάνες ι Γραφή. «Τθεράβα πρόγραμμας», βακερέλα η Λαΐς. «Ο πρώτος πράγμας σο κεράβα κάνα ιστιάβα κάθε πρωί ισί τι διαβάναβ εκ κεφάλαιος κατά Γραφή». Η Μαρία σο ισί 15 μπρεσένγκι τθερέλα γιαβέρ πρόγραμμας. Βόι βακερέλα: «Διαβάναβα εκ χουρντό κομμάτι κατά Γραφή κάθε ιράτ πριν τι τζαβ τι σοβάβ».

Για τι τσσουβές τούι-ντα εκ πρόγραμμας σο κα διαβάνες ι Γραφή, ντικχ  ο πλαίσιος κι σελίδα 292. Σοράν, γράφινε ατθέ κάνα κα μπορίνεας για επκάς σαάτι τι διαβάνες ο Λάφι ι Ντεβλέσκο.

․․․․․

Ο σαάτι σο κα τσσουβές ισί σάντε η αρχή. Κάνα κα αρχίνες τι διαβάνες, μπέκιμ τι αγαβές ότι μπάζιμα η Γραφή νανέ εκ εύκολος βιβλίος. Μπέκιμ τι συμφωνίνεσα με τη Τζέζριλ, σο ισί 11 μπρεσένγκε ντα βακερέλα: «Μερικά λάφια ι Γραφιάκε ναστί αγαβέσα-λεν εύκολα ντα να πουτάρντιβελα το γκι καζόμ διαβάνεσα-λεν». Άμα τθερέσα τούι-ντα ι ίδια άποψη, μα μουκχ-τουτ. Πάντα τι τθερές τι γκοντιάτε ότι κάνα διαβάνεσα ι Γραφή, νακχέσα σαάτι τι αμαλέσαρ, ι Ιεχωβάσαρ, ντα ασουνέσα-λες. Κι πραγματικότητα ισί τιρέ βαστέντε άμα κα μπεϊντίνες ο διάβασμας ι Γραφιάκο ντα άμα κα μουκχές-λα τι κερέλ τούκε λατσσιπέ!

Η Προσευχή Ισί Μπουτ Σημαντική

Η προσευχή ισί ο τρόπος σο κεράσα λάφι ι Ντεβλέσαρ. Αν τι γκοντιάτε καζόμ μπαρό δώρος ισί η προσευχή! Μπορίνεσα τι κερές λάφι ι Ιεχωβάσαρ καβά-ντα σαάτι μανγκέσα είτε ισί ντισάρα είτε ισί ιράτ. Βοβ ισί πάντα οτθέ τούκε. Ντα όχι σάντε ανταβά, αλλά μανγκέλα μπουτ τι ασουνέλ σαρέ οντουλά σο τθερέσα τι βακερές Λέσκε. Άκ’ σόσκε η Γραφή βακερέλα τούκε: «Σο-ντα τι αβέλ-πες, για τι βακερέν ι Ντεβλέσκε οντουλά σο μανγκένα λέσταρ, κερέν προσευχή, μολίνεν-λες ντα βακερέν λέσκε ευχαριστώ».—Φιλιππησίους 4:6.

Σαρ σικαβέλα ανταβά εδάφιος, μπορίνεσα τι κερές λάφι ι Ιεχωβάσκε μπουτέ πραγματένγκε. Αντρέ ανταλέντε ισί το προβλήματα, το ανησυχίες ντα ο πράγματα σο μανγκέσα τι σικαβές εκτίμηση. Για παράδειγμας, να βακερέσα ευχαριστώ τι αμαλένγκε κάνα κερένα τούκε κάτι λατσσό; Αντικάς τι βακερές ευχαριστώ κο Ιεχωβά-ντα, σόσκε βοβ κερντάς τούκε μπουτ πο μπαρέ ντα πο λατσσέ πράγματα σαρέ τι αμαλένταρ.​—Ψαλμός 106:1.

Γράφινε πο τελέ καλέ πραγματένγκε σο ντινάς-τουτ ο Ιεχωβά ισινάν τούι προσωπικά πφερντό εκτίμηση.

․․․․․

Σίγουρα αβένα ντιβεσά, σο νιωθίνεσα ότι τασαβένα-τουτ ο ανησυχίες ντα η νταρ. Ο εδάφιος Ψαλμός 55:22 βακερέλα: «Μουκχ κο Ιεχωβά ο πφαριπέ σο βάντεσα, ντα βοβ κα ντελ-τουτ ζορ. Ποτές να κα μουκχέλ τι περέλ ο δίκαιος».

Ακατέ, γράφινε σο ανησυχίες τθερέσα ντα μανγκέσα τι κερές λένγκε προσευχή.

․․․․․

Ο Πράγματα σο Νακχλάν τι Ζωγιάτε

Κι φιλία σο τθερέσα ι Ντεβλέσαρ ισί κάτι ατζέ σο πρέπει τι αγαβές. Ο ψαλμωδός Δαβίδ γραφιντάς: «Δοκιμάνεν ντα ντικχέν ότι ο Ιεχωβά ισί λατσσό». (Ψαλμός 34:8) Χάνικ πριν τι γραφίνελ ανταλά λάφια ο Δαβίδ κο Ψαλμός 34, νακχλάς κάτι μπουτ πφαρό. Γκεραβέλας-πες κατά Βασιλιάς Σαούλ σο μανγκέλας τι μουνταρέλ-λες, ανταβά ισινέ μπουτ μπαρί δοκιμασία ι Δαβιδίσκε. Σοράν όμως, αναγκασάλο τι τζαλ τι γκεραβέλ-πες αντρέ πι ντουσμανίντε, κο Φιλισταίοι. Ενώ ντικχίντιβελας ότι σίγουρα κα μερέλας, βοβ με μπουτ έξυπνος τρόπος κερντάς-πες ντινιλό ντα μπορισάλο τι σώντιβελ.​—1 Σαμουήλ 21:10-15.

Ο Δαβίδ να ισαρντάς-πες επειδή ισινέ έξυπνος ντα σωσάλο. Αλλά ισαρντάς ι Ιεχωβάς σόσκε βοβ βοηθιντάς-λες τι σώντιβελ. Εκχέ γιαβερέ εδαφιόστε κο ψαλμός σο βακερντάμ πο τζανγκλέ, ο Δαβίδ γραφιντάς: «Πουτσλόμ ι Ιεχωβάς ντα απαντιντάς μάνγκε. Νασκιαρντάς ντουρ μάνταρ σαρέ ο πράγματα σο νταραβένας-μαν». (Ψαλμός 34:4) Οτθάρ, ο Δαβίδ μπορίνελας τι βακερέλ ι γιαβερένγκε «δοκιμάνεν ντα ντικχέν ότι ο Ιεχωβά ισί λατσσό» a επειδή βοβ ο ίδιος ντικχλάας-λες ανταβά πι ζωγιάτε.

Μπορίνεσα τι ανές τι γκοντιάτε κάτι σο νακχλάν ντα αγαντάν ο βας ι Ιεχωβάσκο τι ζωγιάτε; Άμα βα, γράφινε-λες πο τελέ. Ντικχ: Τι εμπειρία να χρειαζίντιβελα τι αβέλ μπουτ εντυπωσιακή. Αν τι γκοντιάτε σο ευλογίες τθερέσα κάθε ντιβές, μερικές λένταρ μπέκιμ τι ντικχίντιβενα χουρντέ ντα συνηθισμέ.

․․․․․

Μπέκιμ το ντατ ντα τι ντάι τι σικλιαρντέ-τουτ ι Γραφιάκε. Άμα βα, ανταβά ισί εκ ευλογία. Όμως, για τι τθερές εκ ζουρανί φιλία ι Ντεβλέσαρ, πρέπει τούι κορκορό τι μπαριαρές-λα. Άμα να τθερέσα-λες κερντό ατζέκ ανταβά, ο λάφια σο βακερέλα ανταβά κεφάλαιος κα βοηθίνεν-τουτ τι κερές ι αρχή. Ο Ιεχωβά κα ευλογίνελ το προσπάθειες. Η Γραφή βακερέλα: «Μα τσσιναβέν τι μανγκέν κατά Ντεβέλ ντα κα ντιντιόλ-τουμέν, μα τσσιναβέν τι ρόντεν ντα κα αρακχέν».​—Ματθαίος 7:7.

ΔΙΑΒΑΝΕ ΠΟ ΜΠΟΥΤ ΑΝΤΑΛΕ ΘΕΜΑΣΚΕ ΚΟ ΤΟΜΟΣ 1, ΚΕΦΑΛΑΙΑ 38 ΝΤΑ 39

ΚΟ ΓΙΑΒΕΡ ΚΕΦΑΛΑΙΟΣ

Ισί τούκε δύσκολος τι κερές λάφι ι Ντεβλέσκε κο γιαβερά; Σίκλιουβ σαρ μπορίνεσα τι υπερασπίνες οντουλά σο πακιάσα.

[Υποσημείωση]

 ΒΑΣΙΚΟΣ ΕΔΑΦΙΟΣ

«Ευτυχισμέ ισί οντουλά σο αγαβένα καζόμ μπαρί ανάγκη τθερένα ι Ντεβλές».​—Ματθαίος 5:3.

 ΣΥΜΒΟΥΛΗ

Άμα κα διαβάνες σταρ σελίδες κατά Γραφή κάθε ντιβές, κα διαβάνες-λα σαρί περίπου αντρέ εκχέ μπρεσέστε.

ΤΖΑΝΕΑΣ-ΟΤΙ . . .;

Αφού διαβάνεσα ανταβά βιβλίος ντα κερέσα ο συμβουλές ι Γραφιάκε σικαβέλα ότι ο Ιεχωβά πφαμπόλα τούκε προσωπικά.​—Ιωάννης 6:44.

 ΟΝΤΟΥΒΑ ΣΟ ΚΑ ΚΕΡΑΒ!

Οντουβά σο κα κεράβ για τι βοηθίντιβαβ πο μπουτ κατά μελέτη ι Γραφιάκι ισί․․․․․

Οντουβά σο κα κεράβ για τι προσευχίντιβαβ πο μπουτ φαρ ισί․․․․․

Οντουβά σο μανγκάβα τι πουτσάβ μι νταντές ντα μι νταγιά ανταλέ θεμάσκε ισί․․․․․

 ΣΟ ΠΑΚΙΑΣΑ ΤΟΥΙ;

● Σαρ μπορίνεσα τι μπεϊντίνες πο μπουτ ο διάβασμας ι Γραφιάκο;

● Σόσκε ο Ιεχωβά μανγκέλα τι ασουνέλ ο προσευχές σο κερένα ατελείς τζενέ;

● Σαρ μπορίνεσα τι κερές το προσευχές πο λατσσέ;

[Πρόταση που τονίζεται κι σελίδα 291]

«Κάνα ισινόμας πο χουρντί, βακεράβας εμ ο ίδια λάφια μι προσευχιέντε. Ακανά προσπαθίναβα τι προσευχίντιβαβ εμ ι πραγματένγκε σο κερένα-μαν τι χαιρίναβ εμ ι πραγματένγκε σο στεναχωρίνενα-μαν κάθε ντιβές. Κάνα σκεφτίναβα ότι ο εκ ντιβές νανέ ντιπ ίδιος ι γιαβερέ ντιβεσέσαρ, ανταβά βοηθίνελα-μαν μα τι βακεράβ εμ ο ίδια πράγματα μι προσευχιέντε».—Ιβ

 [Πλαίσιος/Φωτογραφία κι σελίδα 292]

 Χάντζουβ τι Γραφιάτε

1. Τράμπινε εκ ιστορία κατά Γραφή σο κα μανγκέας τι διαβάνες. Κερ προσευχή για τι αβές γκοντιαβέρ ντα για μπορίνες τι αγαβές οντουλά σο διαβάνεσα.

2. Διάβανε ι ιστορία προσεκτικά. Μα σίνγκιαρ. Οντουλά σο διαβάνεσα κερ-λεν φαντασία. Τσσουβ τι κχελέν σαρέ το αισθήσεις: Προσπάθινε τι ντικχές σαρέ οντουλά σο αβένα-πες, τι ασουνές ο φωνές ι τζενένγκε, τι σουνγκές ι μπαρμπάλ, τι χας ο χαμπέ. Τζούβντιαρ ι ιστορία τι γκοντιάτε!

3. Σκέφτινε οντουλά σο μόλις διαβαντάν. Πουτς το νεαυτός:

● Σόσκε τσσουντάς ο Ιεχωβά ανταγιά ιστορία αντρέ πι Λαφίστε;

● Καλέ τζενέντε αξίνελα τι μοιάζαβ, ντα καλέντε νανέ λατσσό τι μοιάζαβ;

● Σο σικλιάβα κατά ιστορία ανταγιά σο διαβαντόμ ντα μπορίναβα τι κεράβ-λες μι ζωγιάτε;

● Σο σικλιαρέλα-μαν ανταγιά ιστορία ι Ιεχωβάσκε ντα ι τροπόσκε σο συμπεριφερίντιβελα;

4. Κερ εκ χουρντί προσευχή κο Ιεχωβά. Βάκερ λέσκε σο σικλιλάν κατά διάβασμας ι Γραφιάκο, ντα σαρ κα κερές τι ζωγιάτε οντουλά σο σικλιλάν. Τι βακερές συνέχεια ευχαριστώ κο Ιεχωβά σο ντινάς-τουτ ανταβά σουκάρ δώρος​—πο Λάφι, ι Αγία Γραφή!

[Φωτογραφία]

«Το λάφι ισί φως μι πιντρένγκε ντα μι ντρομέσκε».​—Ψαλμός 119:105.

 [Πλαίσιος/Φωτογραφία κι σελίδα 307]

Σο Τσσουβέσα Πρώτος;

Να ερεσαβέσα τι προσευχίντιβες; Να τθερέσα σαάτι τι διαβάνες ι Γραφή; Ο πο μπουτ φαρ φταίνελα η σειρά σο τσσουβέσα ο πράγματα τι ζωγιάτε.

Κερ ακαβά πείραμας: Λε εκ κουβάς ντα τσσουβ αντρέ μπερεκέτι μπαρέ μπαρά ντα κούμι. Ακανά πφερ ο κουβάς κούμι​—μέχρι ντιπ οπρέ. Ακανά ισί-τουτ, εκ κουβάς πφερντό μπαρά ντα κούμι.

Σοράν, τσούτσαρ ο κουβάς ντα ατσσίκιαρ ο ίδια μπαρά ντα ο ίδιος κούμι. Ακανά κερ-λες ανταβά γιαβερέ τροπόσαρ: Τσσουβ κο κουβάς ο κούμι ντα σοράν προσπάθινε τι τσσουβές ο μπαρά. Ερεσλέ αντρέ ανταγιά φαρ; Ανταβά αβέλα-πες επειδή ανταγιά φαρ τσσουντάν πρώτα ο κούμι κο κουβάς.

Σο σικλιάσα; Η Γραφή βακερέλα: «Τι αβέν σίγουροι ότι αγαβένα καλά ισί ο πο σημαντικά πράγματα». (Φιλιππησίους 1:10) Άμα τσσουβέσα κι πρώτη θέση χουρντέ πράγματα σαρ ισί η διασκέδαση, αζομάν κα ντικχίντιβελ ότι να κα υπαρχίντιβελ ποτές τι ζωγιάτε μπουτ χώρος ι μπαρέ πραγματένγκε, σαρ ισί ο πνευματικά πράγματα. Άμα, όμως, ακολουθίνεσα ανταβά σο βακερέλα η Γραφή, κα ντικχές οτι κα τθερές χώρος εμ για τι μπορίνες τι τσσουβές πρώτα ι Βασιλεία τι ζωγιάτε εμ για τι διασκεδάνες. Ο θέμας ισί σο κα τσσουβές κο κουβάς πρώτος.

[Φωτογραφία κι σελίδα 290]

Η φιλία ι Ντεβλέσαρ χρειαζίντιβελα φροντίδα για τι μπαριόλ, σαρ ο φυτά σο τθεράσα αμαρέ φαμιλιάτε.